Psonm 69
69
Lapriyer pour Demann Sekour
Pour sef lakoral. Lo ler: Bann Lis sorti kot David.
1Mon Bondye! Sov mwan.
Delo in mont ziska mon likou.
2Mon pe anfons dan labou,
mon napa en landrwa solid
pour mwan poz mon lipye.
Mon pe anfons dan kre
e kouran pe anmenn mwan.
3Mon fatige afors kriye;
mon lagorz i sek.
Mon lizye i fatige
afors esper mon Bondye.
4Sa bann ki ay mwan san okenn rezon,
zot pli bokou ki seve lo mon latet;
en kantite zot i oule detri mwan;
mon bann lennmi i oule detri mwan
avek zot fo lakizasyon.
Eski fodre mon rann sa ki mon pa'n vole?
5Mon Bondye! Devan ou, mon tor pa en sekre;
ou konn byen tou mon bann pese.
6Senyer BONDYE liniver!
Fodre pa ki dimoun ki'n met zot lespwar dan ou
i ganny imilye akoz mwan.
Bondye Izrael!
Ki personn ki'n met son konfyans dan ou
i ganny abese akoz mwan.
7Pour ou, mon aksepte ganny imilye;
laont i kouver mon figir.
8Mon'n vin en etranze pour mon bann frer,
en nanryen ditou,
menm anver bann zanfan mon manman.
9Lanmour ki mon annan pour ou tanp
i brile dan mwan parey en dife.
Bann lensilt ki ganny fer kont ou
i retonm lo mwan.
10Ler mon ti plere e zennen,
mon ti ganny ensilte.
11Zot ti fer zistwar lo mwan
ler mon ti met lenz dey.
12Bann ki asiz obor semen i malparl mwan;
bann soular i konpoz mwan dan sanson.
13SENYER! Mwan, mon adres ou mon lapriyer.
Mon Bondye!
Reponn mwan dan ou letan favorab.
Dan labondans ou fidelite, reponn mwan,
ou ki vreman mon Sover.
14Sov mwan!
Pa les mwan anfons dan labou.
Delivre mwan dan lanmen mon bann lennmi
e dan fon lanmer.
15Pa les kouran delo trenn mwan,
ni les mwan desann dan gran fon,
ni latonm ferm lo mwan.
16SENYER, Reponn mwan!
Ou fidelite i fer mwan dibyen.
Dan ou gran konpasyon, tourn ver mwan!
17Pa vir ledo avek ou serviter,
akoz mon dan maler.
Pa tarde pou reponn mwan.
18Vin pros avek mwan, sov mwan,
delivre mwan akoz mon bann lennmi.
19Ou konn bann lensilt ki mon gannyen,
mon laont ek mon dezoner;
ou konn tou mon bann lennmi.
20Mon leker i fermal afors ganny ensilte;
mon dan dezespwar.
Mon vin rod senpati,
me personn pa pran pitye pour mwan,
personn pa'n vin rekonfort mwan.
21Zot donn mwan pwazon pour manze.
Ler mon ti swaf,
zot ti donn mwan vineg pour bwar.
22Zot bann bon repa pou vin
en latrap pour zot
e en pyez pour zot bann zanmi.
23Zot lizye ava vin sonm
e zot pou nepli war kler.
Zot leren ava touzour kourbe.
24Devers ou lakoler lo zot!
Ki i bril zot parey en dife!
25Detri zot kanpman
e ki personn pa reste dan son latant!
26Annefe, zot pe persekit
sa bann ki ou'n deza pini;
zot kont bann kou ki i'n gannyen.
27Fer en lalis tou zot bann krim,
pour zot pa zanmen ganny ou faver.
28Efas zot non dan liv lavi!
Pa kont zot parmi bann zis!
29Me mwan, mon malere e mon pe soufer;
Mon Bondye!
Ou sekour ki pour protez mwan!
30Mon pou loue non Bondye par en kantik;
mon pou anons son grander avek rekonesans.
31Sa i ava fer plezir SENYER
plis ki en bef oubyen en toro avek korn ek sabo.
32Ler zot ava war sa,
bann ki'n ganny imilye ava dan lazwa.
Sa bann ki rod Bondye ava repran kouraz.
33Annefe, SENYER i ekout dimoun
ki dan bezwen.
I pa rezet son bann fidel ki dan prizon.
34Lesyel, later, lanmer
e tou sa ki bouze i rann li laglwar,
35akoz Bondye pou sov Zerizalenm.
I pou rekonstri bann lavil dan Zida.
Son pep pou vin viv la
e sa pei ava pour zot.
36Bann desandan son bann serviter
pou erit sa later
e sa bann ki kontan son non pou reste la.
Currently Selected:
Psonm 69: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
