Psonm 68
68
En Kantik Nasyonal Laviktwar
En psonm, en kantik David. Pour sef lakoral.
1Bondye i leve.
Son bann lennmi i fann kler.
Son bann ladverser i disperse devan li.
2Parey lafimen, ou fer zot disparet.
Parey lasir devan dife, ou fer zot fonn.
Bann malfeter pou disparet devan Bondye.
3Zot ki zis! Montre zot lazwa.
Selebre devan Bondye dan lazwa.
4Sant pour Bondye!
Loue son non par bann kantik!
Sant en kantik pour sa enn ki vini
dan nyaz lo son kales.
SENYER i son non.
Selebre avek lazwa devan li!
5Dan son sanktyer sakre,
Bondye i en papa pour bann orfelen
e i protez bann vev.
6Bondye i donn en fanmir sa enn ki tousel.
I ouver laport laliberte pour bann prizonnyen.
Me bann ki revolte i viv dan en later sek.
7Mon Bondye! Ler ou ti kondwir ou pep,
ler ou ti mars devan zot dan dezer,
8devan ou, Bondye Sinai!
Devan ou, Bondye Izrael!
Later ti tranble, lapli ti deverse depi lesyel.
9Mon Bondye!
Ou ti fer en kantite lapli tonbe partou;
ou'n redonn lavi ou pep ki ti'n randi.
10Ou pep in ganny en plas pour etabli li.
Mon Bondye! Dan ou labonte,
ou'n prepar sa pei pour bann malere.
11SENYER i donn lord;
en gran lafoul fanm i anons sa bon nouvel:
12Bann lerwa ek zot larme pe sove!
Zot pe sove!
Bann fanm ki'n reste dan kan
pe partaz bann depouy lager.
13Lezel pizon i kouver avek larzan
e son bann plim i kouler lor pal.
14Ler Bondye Toupwisan ti sas bann lerwa,
lannez ti pe tonbe lo montanny Salmon.
15Montanny Basann i parey montanny Bondye!
Basann i en montanny avek en kantite latet.
16Akoz sa montanny ki annan en kantite latet
i zalou montanny kot Bondye i'n swazi pour li reste,
la kot SENYER pou reste pour touzour?
17Bondye i sorti Sinai;
i desann dan son sanktyer sakre
avek bann kales lager par milye.
18SENYER Bondye! Ou'n mont lao.
Ou'n anmenn bann prizonnyen avek ou.
Bann pep in ofer ou kado,
menm bann ki rebel kont ou.
19Remersye SENYER tou le zour!
Bondye ki nou Sover!
20Nou Bondye i en Bondye sover.
BONDYE i Senyer ki sov nou dan lanmor.
21Me Bondye pou kraz latet son bann lennmi ki,
avek zot seve long,
zot kontinyen viv en lavi koupab.
22SENYER i deklare:
Mon pou fer zot retournen sorti Basann.
Mon pou fer zot sorti dan profonder lanmer.
23Konmsa, zot ava patoze dan disan;
ou bann lisyen ava lis zot par disan lennmi.
24Mon Bondye!
Nou'n war ou bann laprosesyon solannel,
bann kortez mon Bondye, mon Lerwa,
antre dan sanktyer.
25Bann santer i mars devan,
bann mizisyen deryer.
Dan milye, bann zenn fiy pe zwe lo tanbouren.
26Bann sours Izrael! Loue SENYER Bondye.
Remersye Bondye dan bann lasanble.
27Benzamen ki pli pti tribi i vin premye;
apre li, bann sef Zida dan lenz brode,
bann sef Zabilon ek bann sef Neftali.
28Bondye! Montre ou pwisans.
Bondye! Montre ou lafors
parey ou'n deza fer pour nou.
29Kot ou tanp dan Zerizalenm,
bann lerwa ava anmenn kado pour ou.
30Menas Lezip,
ki parey en zannimo sovaz dan lanmar!
Menas kont bann nasyon
ki parey en troupo toro ek bann zenn toro.
Zot ava vin bes zot latet devan ou
e ofer ou zot kado.
Fer fannen bann pep ki kontan lager!
31Bann dimoun enportan pou vini, sorti Lezip.
Bann Etyopyen pou vin ver Bondye,
lanmen leve anler.
32Tou bann pep partou dan lemonn!
Sant pour Bondye!
Loue SENYER!
33Atraver lesyel lo son kales,
i fer tande son lavwa pwisan.
34Proklanmen ki Bondye i pwisan;
i gouvern Izrael;
i montre son pwisans dan lesyel.
35Bondye i formidab dan son sanktyer.
Li, Bondye Izrael,
i donn son pep pouvwar ek lafors.
Loue Bondye!
Currently Selected:
Psonm 68: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
