Psonm 66
66
Kantik Louanz ek Remersiman
Pour sef lakoral. En san. En psonm.
1Tou bann zabitan later!
Kriye e sant zot lazwa pour loue Bondye!
2Sant laglwar son non!
Rann li glwar!
3Dir Bondye:
Tou sa ki ou fer i vreman formidab.
Akoz ou pwisans, ou bann lennmi i kourbe devan ou.
4Tou dimoun lo later i ador ou;
zot sant an ou loner;
zot sant an loner ou non.
5Vin get tou sa ki Bondye in fer!
Bann aksyon terib ki i'n akonpli i formidab
pour bann zabitan later.
6In fer lanmer vin later sek;
dimoun ti travers larivyer apye.
Alor, nou ti fer lafet.
7Par son lafors, i gouvern pour touzour;
i gard son lizye lo bann nasyon.
Pa les bann rebel fer vantar.
8Tou bann nasyon! Remersye nou Bondye.
Fer antann zot louanz pour li!
9I'n prezerv nou lavi.
I pa'n les nou glise.
10Mon Bondye! Ou'n teste nou.
Ou'n pirifye nou parey larzan i ganny pirifye.
11Ou'n fer nou tonm dan en latrap;
ou'n met bann fardo lo nou ledo.
12Ou'n les dimoun mont lo nou latet.
Nou'n pas atraver dife ek delo;
me ou'n fer nou sorti,
pour donn nou labondans.
13Mon pou antre dan ou sanktyer
avek bann sakrifis konplet.
Mon pou gard bann ve ki mon ti'n fer.
14Mon pou akonpli promes ki mon ti fer
ler mon ti dan maler.
15Mon pou ofer ou zannimo gra
koman sakrifis konplet.
Loder lafimen bann mouton mal
pou mont kot ou.
Mon pou ofer sakrifis toro ek mouton.
16Zot tou ki ador Bondye! Vini. Vin ekoute.
Mon ava rakont zot sa ki i'n fer pour mwan.
17Avek mon labous mon ti apel li.
Mon ti demann li son sekour e mon ti loue li.
18Si mon ti'n gard mesanste dan mon leker,
SENYER pa ti pou ekout mwan.
19Me Bondye in ekout mwan;
in antann mon lapriyer.
20Mon loue Bondye!
I pa'n rezet mon lapriyer,
ni retir son fidelite anver mwan.
Currently Selected:
Psonm 66: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
