Psonm 65
65
Kantik Louanz ek Remersiman
En psonm David. En kantik. Pour sef lakoral.
1Mon Bondye!
Ou ki dan Zerizalenm,
ou merit ganny loue.
Nou devre gard nou promes anver ou.
2Akoz ou ekout nou lapriyer,
tou zabitan later ava tourn ver ou.
3Pwa mon fot i tro lour pour mwan.
Ou pou pardonn tou nou pese.
4I byennere sa enn ki ou swazir
pour anmenn viv dan ou sanktyer!
Nou pou rasazye avek tou bann bon keksoz
ki sorti kot ou dan ou tanp sakre.
5Mon Bondye, nou Sover!
Ou bann gran mervey i delivrans pour nou.
Ou menm lespwar bann zabitan later
e atraver lanmer, ziska bann zil lwenten.
6Par ou lafors, ou'n plas bann montanny.
Ou ranpli avek pwisans.
7Ou kalme tapaz lanmer;
tapaz son bann laroul
ek gronnyman bann nasyon.
8Zabitan dan bout later
i dan lafreyer par ou bann siny.
Ou fer bann pei dan Les e dan Was
kriy zot lazwa.
9Ou pran swen avek later.
Ou fer lapli tonbe, ou anrisi li
e rann li fertil.
Larivyer Bondye i plen avek delo;
ou donn bon rekolt bann zabitan later.
La koman ou prepar later:
10Ou met delo dan rigol, delo pour irigasyon.
Ou kas bann boul later,
ou fer zot mou.
Ou aroz li avek lapli
e fer pouse bann plant.
11Ou kouronn lannen avek en kantite byenfe.
Kot ou pase i annan labondans.
12Bann landrwa ki ti sek i donn bon rekolt;
bann kolin i ranpli avek lazwa.
13Laplenn i ranpli avek bann troupo.
Bann vale i kouver avek dible.
Zot kriye e sante dan lazwa.
Currently Selected:
Psonm 65: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
