Psonm 62
62
Konfyans dan Proteksyon Bondye
En psonm David. Pour sef lakoral. Dapre Yedoutoun.
1Zis Bondye ki fer mwan konn trankilite.
Zis li tousel ki kapab sov mwan.
2Zis li mon Ros protekter e li tousel ki sov mwan,
mon fortres; mon pa pou zanmen tonbe.
3Ziska kan zot pou antoure pour atak en dimoun?
Eski zot oule zet li parey en miray ki pre pour tonbe,
oubyen en baraz ki'n kabannen?
4Zot mazin zis sali loner en dimoun enportan.
Zot plezir i dan mansonz;
zot dir zoli parol avek zot labous,
me dan fon zot leker zot modi li.
5Zis Bondye ki fer mwan konn trankilite,
akoz mon'n met mon lespwar dan li.
6Li tousel mon Ros protekter, mon Sover, mon fortres.
Mon pa pou zanmen tonbe.
7Mon delivrans ek mon laglwar
i repoz lo Bondye
mon pwisan protekter, mon labri.
8Pep! Fer li touzour konfyans.
Dir li sa ki zot annan lo zot leker.
Bondye i en labri pour nou.
9Bann et imen i parey en souf respirasyon;
bann zabitan later, zot manter.
Si zot mont lo en balans,
zot pa pou pez plis ki en souf.
10Pa met ou konfyans dan vyolans;
pa esper vin ris avek keksoz vole.
Menm si ou larises i ogmante,
pa met ou leker lo la.
11Bondye in dir e mon'n antann repete:
Zis Bondye tousel ki posed lapwisans.
12SENYER! Ou fidelite i pour touzour.
Ou rekonpans sakenn dapre son bann aksyon.
Currently Selected:
Psonm 62: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
