Psonm 59
59
Lapriyer pour Demann Delivrans
En poenm David, ler Sail ti donn lord vey lo son lakaz pour kapab touy li. Pour sef lakoral.
1Mon Bondye!
Delivre mwan dan lanmen mon bann lennmi.
Protez mwan kont sa bann ki atak mwan.
2Delivre mwan kont sa bann malfeter.
Sov mwan kont sa bann kriminel.
3Gete! Zot pe vey mwan, pre pour zot touy mwan.
Bann zonm pe fer konplo kont mwan.
Pourtan SENYER, mon pa'n fer nanryen mal,
ni komet okenn pese.
4San ki mon'n komet okenn fot,
zot taye e zot met zot pare pour atak mwan.
Leve! Vin kot mwan e ou ava war ou menm.
5Ou SENYER, Bondye liniver,
ou menm Bondye Izrael!
Leve pour pini tou bann nasyon.
Pa pran pitye pour okenn sa bann tret.
6Tou le swar zot retournen, zot irle parey lisyen
e zot parwaze dan lavil.
7Zot labous i deborde avek parol menas.
Zot dir: Lekel ki pou antann nou?
8Me ou riy zot SENYER;
ou pa pran ka avek sa bann nasyon.
9Mon annan konfyans dan ou, mon lafors,
akoz ou mon Bondye, ou mon protekter.
10Dan son fidelite, mon Bondye ava vin kot mwan.
Mon Bondye ava fer mwan war laviktwar
lo mon bann lennmi.
11Pa touy zot, sinon mon pep ava oubliye.
Par ou lafors,
fer zot tranble e fer zot tonbe.
SENYER! Nou boukliye.
12Koman zot ouver labous,
pese ki sorti lo zot lalev.
Fer zot tonm dan latrap zot lorgey.
Pour tou sa bann malediksyon ek mansonz,
13detri zot dan ou lakoler.
Detri zot ziska ki zot disparet.
Alor tou dimoun ava konnen
ki Bondye i gouvern Izrael ek later antye.
14Tou le swar zot retournen,
zot irle parey lisyen
e zot parwaze dan lavil.
15Zot rodaye partou pour ganny manze
e zot gronnyen si zot pa ganny ase.
16Mwan, mon pou proklanm ou lafors.
Tou le bomaten, mon pou kriy byen for ou fidelite.
Ou en protekter pour mwan;
ou en labri dan letan mon maler.
17Ou ki mon lafors,
mon pou sant avek lazwa pour ou.
Ou mon Bondye, ou mon protekter.
Ou mon Bondye ki fidel anver mwan.
Currently Selected:
Psonm 59: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
