Psonm 58
58
Lapriyer pour Demann Bondye Pini bann Malfeter
En poenm David. Pour sef lakoral. ‘Pa detri!’
1Bann dirizan! Eski zot vreman koz lazistis?
Konmsa ki zot ziz bann imen avek ladrwatir?
2Non! Dan zot leker, zot mazin zis dimal;
avek zot lanmen, zot fer vyolans lo later.
3Depi dan vant zot manman, bann malfeter i pratik sa ki mal.
Depi zour zot nesans,
zot in pran move semen e zot manter.
4Zot annan move venen parey en serpan.
Zot bous zot zorey parey en serpan ki sourd,
5pour zot pa antann ni lavwa zot donter
ni lanmizik en pli bon mazisyen.
6Bondye! Kas zot ledan dan zot labous.
SENYER!
Aras zeyer sa bann zenn lyon.
7Fer zot disparet parey delo ki koule!
Parey zerb,
zot ava ganny kraze anba lipye e fletri.
8Parey en kolimason,
zot ava disparet dan zot lagli.
Parey en pti baba ki ne mor,
zanmen zot pou war soley.
9Avan ki dife lapay i tous marmit,
zot ava ganny balye dan tourbiyon son lakoler,
avan ki manze dan marmit i ganny letan kwi!
10Sa enn ki zis ava kontan
ler i ava war ki vanzans in ganny fer.
I ava lav son lipye dan disan bann malfeter.
11Dimoun ava dir:
Vreman! I annan en rekonpans
pour bann dimoun ki zis.
Vreman! I annan en Bondye ki ziz later!
Currently Selected:
Psonm 58: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
