Psonm 57
57
Lapriyer pour Demann Led
Pour sef lakoral. ‘Pa detri.’ En poenm David ler i ti sov Sail dan kavern.
1Pran pitye pour mwan, mon Bondye!
Pran pitye pour mwan.
Ou mon protekter.
Mon vin rod proteksyon anba ou lezel,
ziska ki bann dezas i pase.
2Mon kriy ver Bondye Treo;
Bondye ki fer tou pour mwan.
3Lao dan lesyel i anvoy son sekour
e fer kanmi sa bann ki pourswiv mwan.
Bondye pou touzour montre mwan
son lanmour ek son fidelite.
4Mon'n ganny antoure par bann lyon feros,
bann zonm ki annan ledan parey lans ek dart.
Zot lalang i koupe parey en lepe byen fite.
5Mon Bondye!
Montre ou grander ki depas lesyel!
Fer ou laglwar kouver later antye!
6Zot ti'n met en latrap lo mon semen
pour fer mwan pliye.
Zot ti'n fouy en trou lo mon semen,
me zot menm ki'n tonm ladan.
7Mon Bondye! Mon leker i ranpli avek konfyans.
Mon vreman annan konfyans.
Mon pou sante,
mon pou zwe lanmizik pour ou.
8Reveye, mon leker!
Reveye, bann lenstriman lanmizik!
Mon pou fer lizour aparet.
9SENYER!
Mon pou loue ou parmi bann pep.
Mon pou sant ou louanz parmi bann nasyon.
10Ou lanmour i osi gran ki lesyel.
Ou fidelite i monte ziska dan nyaz.
11Mon Bondye!
Montre ki ou grander i pli o ki lesyel
e ki ou laglwar i kouver later antye.
Currently Selected:
Psonm 57: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
