Psonm 56
56
Lapriyer Konfyans dan Bondye
Pour sef lakoral. Lo ler ‘Kolonm i lwen dan pye dibwa.’ Poenm David ler bann Filisten ti kaptir li Gat.
1Mon Bondye!
Pran pitye pour mwan;
dimoun pe pourswiv mwan.
Tou le zour zot atak mwan
e zot kraz mwan.
2Dan son lafyerte,
mon lennmi pe pourswiv mwan.
En kantite zot pe atak mwan.
Bondye liniver!
3Kan mon per,
mon met mon konfyans dan ou.
4Mon loue Bondye akoz son parol.
Mon met mon konfyans dan li;
mon pa per.
Ki en imen i kapab fer mwan?
5Tou le zour zot tourmant mwan
avek parol blesan.
Zot mazin zis fer mwan ditor.
6Ansanm, zot kasyet pour espyonn lo mwan.
Zot vey mon bann mouvman.
Zot pare pour pran mon lavi.
7Fer zot peye pour sa bann krim.
Mon Bondye!
Dan ou lakoler, kraz sa bann zans.
8Ou konnen kantite fwa ki mon ti oblize sove.
Ou konnen ki kantite larm mon'n verse.
Tousala in ekri dan ou gran liv.
9Alor, zour mon pou apel ou,
mon bann lennmi pou rekile.
Mon konnen ki Bondye i lo mon kote.
10Mon loue Bondye akoz son parol.
Mon sant louanz SENYER, akoz son parol.
11Mon'n met mon konfyans dan Bondye;
mon pa per.
Lekel sa imen ki kapab fer mwan ditor?
12Mon Bondye! Mon pou tenir mon promes.
Mon pou ofer ou bann sakrifis remersiman.
13Ou'n delivre mwan dan lanmor
e ou'n anpes mwan tonbe.
Alor, mon kapab mars devan Bondye,
dan lalimyer ki donn lavi.
Currently Selected:
Psonm 56: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
