Psonm 51
51
Lapriyer pour Demann Pardon
Psonm David ler profet Natan ti vin war li, apre ki David ti'n al kot Batseba. Pour sef lakoral.
1Mon Bondye! Dan ou gran fidelite,
pran pitye pour mwan.
Dan ou gran konpasyon, efas mon pese!
2Lav mwan e retir mon bann fot.
Pirifye mwan e anlev tou mon pese.
3Mon rekonnet mon bann tor
e mon pese i touzour devan mwan.
4Kont ou, kont zis ou ki mon'n fer sa ki mal;
devan ou ki mon'n fer sa.
Alor, ou annan rezon
kan ou pronons ou santans
e zizman ki ou rann i zis.
5Depi zour mon nesans, mon dan pese.
Mon manman ti fer mwan dan pese.
6Me ou kontan laverite ki dan fon leker.
Alor, dan pli profon mon leker,
fer mwan konn lasazes.
7Pirifye mwan avek brans izop e mon ava prop.
Lav mwan e mon ava vin pli blan ki lannez.
8Rann mwan lazwa e gou pour viv
e mon bann lezo ki ou'n kase ava rezouir.
9Pa get tou sa bann pese ki mon'n fer;
efas tou mon bann fot.
10Mon Bondye! Kree dan mwan en leker pir;
Redonn mwan en lespri nouvo.
11Pa rezet mwan lwen avek ou;
pa retir ou Lespri dan mwan.
12Redonn mwan lazwa ou delivrans
e en lespri zenere ava soutenir mwan.
13Alor, mon ava ansenny bann ki rebel
e bann peser ava retourn ver ou.
14Mon Bondye! Sov mon lavi.
Mon Bondye! Ou menm mon liberater.
Alor, dan lazwa,
mon ava proklanm ou delivrans.
15SENYER! Ouver mon labous
e mon ava sant ou louanz.
16Ou pa pran okenn plezir dan sakrifis,
menm si mon ofer ou en sakrifis konplet.
17Sakrifis ki Bondye i oule, i en leker brize;
Bondye pa zanmen rezet en leker
konpletman brize.
18Fer sa ki bon pour Siyon.
Rekonstri bann miray Zerizalenm.
19Alor ou ava aksepte
bann sakrifis ki ou demande,
bann lofrann ek bann sakrifis konplet.
Alor, nou ava kapab ofer bann toro lo ou lotel.
Currently Selected:
Psonm 51: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
