Psonm 50
50
Vre Ladorasyon
Sa psonm i proklanmen ki Bondye i ziz Izrael e lemonn antye. En psonm sorti kot Asaf.
1Bondye Toupwisan, SENYER Bondye
in koze e i konvok later antye
depi en bout later ziska lot.
2Depi Zerizalenm, sa lavil avek en labote parfe,
SENYER i aparet dan lalimyer.
3Nou Bondye pe vini, i pa pe gard silans.
Devan li, en dife ki devor tou.
Otour li, i annan en tanpet vyolan.
4I kriy ver lesyel lao e ver later
pou ziz son pep:
5Rasanble mon bann fidel
ki'n fer en lalyans avek mwan par en sakrifis!
6Lesyel i proklanmen ki Bondye i zis.
Bondye i sel ziz!
7Mon pep! Ekout mwan.
Mon annan sa pour dir ou:
Izrael! Mon pou temwanny kont ou.
Mwan Bondye, ki ou Bondye!
8Mon pa akiz ou akoz ou bann sakrifis;
ou'n touzour ofer mwan bann sakrifis konplet.
9Mon pa bezwen en toro ki sorti kot ou,
ni kabri ki sorti dan ou troupo.
10Annefe, tou bann zannimo lafore
ek bann troupo ki dan laplenn
lo montanny i pour mwan.
11Mon konn tou bann zwazo dan lesyel.
Tou kreatir lo later i pour mwan.
12Si mon lafen, mon pa pou bezwen fer ou konnen,
akoz later ek tou sa ki i annan dan lemonn
i pour mwan.
13Eski mon pou manz lavyann toro?
Eski mon pou bwar disan kabri?
14Ofer Bondye en sakrifis remersiman
e gard tou ou bann promes
ki ou'n fer anver Bondye Treo.
15Apel mwan zour ou dan maler;
mon ava delivre ou
e ou ava sant mon laglwar.
16Me Bondye i demann sa malfeter:
Akfer ou repet mon bann komannman
e gard mon lalyans lo ou labous,
17ou ki pa aksepte ganny korize
e ki rezet mon parol?
18Ou fer zanmi avek en voler ki ou rankontre;
ou frekant dimoun ki komet adilter.
19Ou labous i koz zis dimal,
ou lalang i koz mansonz.
20Ou asize e koz kont ou frer;
ou sali repitasyon zanfan ou prop manman.
21Tousala, ou'n fer e oule mon gard silans?
Ou ti krwar mon ti parey ou?
Aprezan mon denons ou,
e mon pou akiz ou anfas.
22Zot ki'n oubliy Bondye! Fer byen atansyon.
Otreman, mon pou desir zot
e personn pa pour vin delivre zot.
23Sa enn ki anmenn mwan son lofrann,
i onor mwan.
Sa enn ki mars dan bon semen,
mon pou fer li war delivrans Bondye.
Currently Selected:
Psonm 50: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
