Psonm 49
49
Konfyans dan Larises I En Betiz
Pour sef lakoral. En psonm sorti kot fraternite Kore.
1Tou bann pep, ekoute!
Tou bann zabitan later, port atansyon!
2Dimoun senp koman dimoun enportan;
ris koman pov.
3Mon labous pou pronons parol lasazes;
mon leker pou medit lo keksoz profon.
4Mon'n ekout byen en proverb;
mon pou donn leksplikasyon
pandan ki mon zwe lanmizik.
5Akoz mon bezwen trakase dan letan maler,
kan mon bann lennmi in antour mwan?
6Zot met zot konfyans dan zot larzan;
zot fer vantar avek zot gran larises.
7Personn pa kapab reaste lavi,
ni pey Bondye en ranson pour li.
8Annefe, lavi napa pri.
Sa ki ou peye, pa pou zanmen ase
9pour permet li viv pour touzour
e anpes li al dan latonm.
10Me nou remarke, dimoun saz i mor
avek bann fou ek bann brit.
Zot kit zot larzan pour lezot.
11Zot ti krwar posed zot propriyete pour touzour.
Me zot latonm ki vin zot demer pour touzour,
zot abitasyon dan tou zenerasyon.
12Tou son bann larises pa kapab gard li vivan.
I mor parey en zannimo.
13La sa ki arive avek tou dimoun
ki annan lafoli grander,
ki kontan ekout zot menm koze:
14Parey mouton,
zot ganny destinen pour lanmor.
Lanmor i zot berze.
Zot desann drwat dan latonm.
Apre sa, dimoun ki zis, i kraz zot anba lipye;
zot perdi zot laform.
Lemonn lanmor i vin zot demer.
15Me Bondye pou sov mon lavi
dan pouvwar lanmor,
akoz i pou delivre mwan.
16Pa bezwen enkyet si dimoun i vin ris,
si zot larises i kontinyen grandi.
17Kan zot mor, zot pa anmenn nanryen avek zot;
zot larises pa swiv zot dan latonm.
18Ler zot ti vivan, zot ti vant zot lekor
e dimoun ti felisit zot pour zot byennet.
19Zot pou al rezwenn zot bann zanset
ki pa pou zanmen revwar lalimyer.
20Sa enn ki annan larises,
me ki napa lentelizans,
pa konpran ki i pou mor parey zannimo.
Currently Selected:
Psonm 49: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
