Psonm 5
5
Lapriyer pour Demann Proteksyon
Psonm David pour sef lakoral, avek lakonpannyman laflit.
1SENYER! Ekout mon lapriyer.
Pran ka avek mon konplent.
Ekout mwan, akoz mon pe apel ou.
2Mon Bondye! Mon lerwa!
Ekout mon lapel.
Avek ou ki mon adres mon lapriyer.
3SENYER!
Byen bomaten, ou antann mon lavwa;
tou le bomaten mon met mwan pare
e mon espere.
4Ou pa en Bondye ki pran plezir
dan mesanste;
malfeter pa reste devan ou.
5Dimoun arogan pa reste dan ou prezans;
ou deteste dimoun ki fer sa ki mal.
6Ou detri bann ki koz manti.
SENYER i deteste bann kriminel ek bann voler.
7Me mwan, akoz ou gran fidelite,
mon kapab antre kot ou;
mon pou prostern avek respe,
dan direksyon ou tanp sen.
8SENYER! Akoz mon bann lennmi,
gid mwan dan ou lazistis.
Fer disparet tou danze
lo semen ki ou'n trase pour mwan.
9Okenn laverite pa sorti dan zot labous;
zot leker i ranpli avek destriksyon;
zot lagorz i en tonbo ouver;
zot lalang i koz zis flatri.
10Mon Bondye! Fer zot peye.
Fer zot tonbe par zot prop plan;
rezet zot akoz zot kantite pese
e akoz zot in rebel kont ou.
11Me rann ere tou sa bann
ki'n met zot konfyans dan ou.
Zot ava sant zot lazwa pour touzour.
Kouver zot avek ou proteksyon.
Konmsa, tou sa bann ki kontan ou non,
ava rezoui akoz ou.
12SENYER! Ou beni sa enn ki zis.
Ou lanmour i protez li parey en boukliye.
Currently Selected:
Psonm 5: BSK
Highlight
Share
Compare
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
