Psonm 48
48
Siyon, Lavil Bondye
En kantik, en psonm sorti kot bann garson Kore.
1SENYER i gran.
Dan lavil nou Bondye,
son montanny sakre, i merit tou louanz.
2Montanny Siyon, lavil gran lerwa dan Nor,
i en lavil elegan.
I fer lazwa lo later antye.
3Bondye ki asir sekirite dan lavil
i en fortres.
4Bann lerwa ti fer konplo ansanm
kont montanny Siyon.
5Ler zot ti war SENYER, zot ti sezi;
zot ti per e zot ti sove.
6Zot ti tranble parey en fanm dan douler lanfantman;
7parey ler en divan sorti dan Les,
i kraz bann gro bato sorti Tarsis.
8Sa ki nou ti'n antann dir,
nou'n osi war dan lavil SENYER liniver,
dan lavil nou Bondye ki i'n etabli solid pour touzour.
9Mon Bondye! Dan ou tanp,
nou mazin ou fidelite.
10Mon Bondye! Ou non ek ou grander
i ganny selebre partou lo later.
Ou ranpli avek lazistis.
11Montanny Siyon i dan lazwa,
bann lavil Zida i selebre,
akoz ou bann zizman.
12Fer letour miray Zerizalenm
e kont son bann tour defans.
13Admir son bann miray,
kontanple son bann pale.
Konmsa ou ava kapab rakont prosen zenerasyon
14ki sa Bondye i nou Bondye pour touzour;
i pou gid nou pour touzour.
Currently Selected:
Psonm 48: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
