Psonm 25
25
Lapriyer pour Demann Gidans ek Proteksyon
Psonm David.
1SENYER!
Mon vin kot ou.
2Mon Bondye!
Mon'n fer ou konfyans;
pa tronp mwan.
Pa les mon bann lennmi ganny laviktwar.
3Pa les sa ki'n met zot konfyans
dan ou ganny tronpe.
Me fer onte sa enn ki trai ou san rezon.
4SENYER! Fer mwan konn ou semen.
Ansenny mwan viv koman oule.
5Gid mwan, ansenny mwan dan ou laverite.
Ou menm Bondye ki sov mwan.
Mon kont lo ou tou le zour.
6SENYER!
Pa oubliy ou konpasyon ek ou fidelite
ki ou'n touzour montre.
7Oubliy bann pese ek bann fot
dan letan mon lazenes.
Dan ou fidelite, mazin mwan
akoz ou telman bon, SENYER.
8SENYER i bon e zis,
i remet bann peser lo bon semen.
9I gid dimoun senp lo semen lazistis;
i ansenny zot son lavolonte.
10Dan tou son santye, SENYER i montre fidelite ek lwayote
anver tou bann ki gard son lalyans
ek son bann regleman.
11SENYER!
Pour loner ou non,
pardonn mwan bann gro pese ki mon'n fer.
12SENYER pour montre sa enn
ki annan respe pour li,
ki semen pou pran.
13I pou viv touzour dan prosperite
e son bann desandan pou posed sa pei.
14SENYER i konfye son bann sekre
avek sa enn ki obei li.
I ava fer li konn son lalyans.
15Mon touzour tourn mon lizye ver SENYER,
akoz i pou delivre mwan dan danze.
16Tourn ver mwan SENYER!
Pran pitye pour mwan,
akoz mon tousel e mon malere.
17Liber mwan dan mon langwas;
delivre mwan dan mon detres.
18Get mon lanmizer ek mon lapenn
e pardonn mwan tou mon bann pese.
19Get sa kantite lennmi ki mon annan;
zot annan en laenn vyolan kont mwan.
20Protez mwan! Delivre mwan!
Mon'n met mon konfyans dan ou.
Pa fer mwan onte.
21Mon kont lo ou;
gard mwan san repros e touzour onnet.
22Mon Bondye! Sov pep Izrael!
Delivre li dan tou son tourman.
Currently Selected:
Psonm 25: BSK
Highlight
Share
Compare
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
