Psonm 21
21
Remersiman pour Laviktwar
Psonm David. Pour sef lakoral.
1SENYER! Lerwa i dan lazwa akoz ou for.
I tre zwaye ou'n sekour li.
2Ou'n satisfer dezir son leker;
ou pa'n refiz li sa ki i ti demann ou.
3Ou'n akey li avek bokou benediksyon;
ou'n poz en kouronn lor lo son latet.
4I ti demann ou lavi e ou'n donn li;
en lavi ki dire pour lontan e touzour.
5Gras a ou led, son laglwar in vin gran;
i'n ganny kouver avek splander ek mazeste.
6Ou akord li benediksyon pour touzour;
ou prezans in donn li lazwa.
7Lerwa i met son konfyans dan SENYER.
I pa pou tonbe,
akoz lanmour fidel Bondye Treo.
8Ou pou met lanmen lo tou ou bann lennmi.
Par ou lafors ou pou atrap
sa bann ki annan laenn pour ou.
9Zour ou pou aparet,
ou pou fer zot vin parey en gran dife.
Dan son gran lakoler, SENYER pou anval zot
e sa gro dife pou detri zot.
10I pou fer disparet zot desandans lo later
ek zot posterite parmi zabitan later.
11Si lennmi i rod fer ou dimal,
si i prepar en move kou kont ou,
i pa pou reisi.
12Ou ava tir ou bann fles kont zot,
e fer zot sove.
13Leve avek ou pwisans SENYER!
Nou pou sante,
nou pou loue ou lafors par en psonm.
Currently Selected:
Psonm 21: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
