Psonm 22
22
Soufrans ek Lespwar En Bon Dimoun
Psonm David. Pour sef lakoral. Sante lo en ler kouran.
1Mon Bondye! Mon Bondye!
Akoz ou'n abandonn mwan?
Akoz ou reste sitan lwen avek mwan?
Akoz ou pa ekout mon lapel?
2Mon Bondye! Mon Bondye!
Lizour mon apel ou, me ou pa reponn.
Dan lannwit mon kriye, e mon pa ganny repo.
3Pourtan, ou menm ki Sen.
Pep Izrael i sant ou louanz otour ou tronn.
4Nou bann zanset ti fer ou konfyans;
zot ti kont lo ou e ou ti delivre zot.
5Zot ti kriy ver ou,
e zot ti ganny delivre.
Zot ti fer ou konfyans
e zot pa'n dezapwente.
6Mon nepli en zonm.
Mon ganny trete koman en lever.
Dimoun i ensilte mwan,
zot tou zot mepriz mwan.
7Tou sa ki war mwan i boufonn mwan;
zot gognard mwan, zot sekwe zot latet:
8In met son konfyans dan SENYER.
Alor, ki SENYER i delivre li.
SENYER ava delivre li akoz i kontan li.
9Ou ki ti tir mwan dan vant mon manman,
e ou ti plas mwan an sekirite dan son lebra.
10Depi zour mon nesans,
mon ti ganny konfye avek ou.
Depi dan vant mon manman,
ou'n touzour mon Bondye.
11Pa reste lwen avek mwan;
danze i pros e napa personn pour ed mwan.
12Mon bann lennmi, bann toro, in antour mwan;
bann toro ki sorti Basann in anserkle mwan.
13Parey bann lyon feros,
zot ti ouver zot lagel,
pare pour desir mwan.
14Mon lafors in koule parey delo;
tou mon bann lezo in large.
Parey lasir, mon leker i fonn dan mon pwatrin.
15Mon labous i sek
parey later dekoke dan lasesres.
Mon lalang i reste kole dan mon pale.
Ou'n kit mwan dan lapousyer lanmor.
16En group malfeter in antour mwan;
zot parey en group lisyen ki'n anserkle mwan.
Zot in pers mon lanmen ek mon lipye.
17Mon kapab kont tou mon bann lezo.
Dimoun pa tir zot lizye lo mwan.
18Zot partaz mon lenz ant zot
e zot tir osor mon rob,
pour konnen lekel ki pou gannyen.
19Me ou SENYER!
Pa reste lwen avek mwan.
Ou ki mon lafors!
Vin vit pour sekour mwan.
20Delivre mwan dan lanmor vyolan;
sov mwan dan grif bann lisyen.
21Sov mwan dan lagel lyon;
delivre mwan kont korn bann toro sovaz.
22Mon pou anons ou non
avek mon bann frer.
Mon pou loue ou devan lasanble.
23Loue SENYER!
Ou ki annan respe pour li e ador li.
Zot bann desandan Zakob!
Rann li glwar.
Zot bann desandan Izrael!
Ador li avek reverans.
24SENYER pa'n ni rezet,
ni mepriz dimoun pov ki dan maler.
I pa ti kasyet li son figir;
i ti reponn li kan i ti kriy ver li.
25SENYER!
Mon pou loue ou dan gran lasanble
pour sa ki ou'n fer pour mwan.
Mon pou akonpli mon promes
devan bann ki ador ou.
26Bann pov ava kapab manze ziska zot rasazye.
Dimoun ki rod SENYER pou loue li.
Zot ava viv pour touzour!
27Later antye, ava mazin SENYER.
Zabitan later ava retourn ver li.
Tou bann fanmir bann pep ava ador li.
28Annefe, SENYER i lerwa;
i renny lo tou bann nasyon.
29Tou bann gran lo later ki'n manze,
pou prostern devan li.
Tou bann ki desann dan later,
ki pa kapab reste vivan,
pou kourbe devan li.
30Zot bann desandan pou servi li;
zot pou koz lo SENYER avek zenerasyon fitir.
31Zot pou rakont avek zot desandans,
tou bann mervey ki SENYER in fer.
Currently Selected:
Psonm 22: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
