Psonm 2
2
Lerwa ki Bondye in Swazir
1Akoz bann nasyon i fer konplo?
Akoz bann pep i fer bann plan initil?
2Bann lerwa lo later, zot pran zot pozisyon;
bann dirizan, zot fer konplo ant zot
kont SENYER ek sa enn ki i'n swazir.
Zot dir:
3Annou kas bann lakord
e rezet zot bann lasenn.
4Depi son tronn dan lesyel kot i asize,
SENYER i riye, i pa pran ka.
5Dan son lakoler, i pou reprimann zot.
Dan son gran lakoler i pou fer zot tranble.
I pou dir zot:
6Mwan ki'n etabli mon lerwa lo Siyon,
mon montanny sen.
7Mon pou proklanm bann regleman SENYER.
I ti dir mwan:
Ou mon garson;
ozordi mon'n vin ou papa.
8Demann mwan,
e mon ava donn ou tou nasyon
e later antye ava vin ou propriyete.
9Ou pou diriz zot avek en baton an fer;
ou pou kas zot an morso
parey en po later.
10Bann lerwa! Azir avek lasazes.
Bann dirizan later! Ekout sa lavertisman.
11Servi SENYER avek respe.
Rezoui dan limilite;
12rekonnet son garson;
pangar i pran lakoler
e ki ou mor dan semen.
Akoz son lakoler i mont fasilman.
Byennere sa enn ki met son konfyans dan SENYER.
Currently Selected:
Psonm 2: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
