Matye 27
27
Zezi Devan Pilat
(Mrk 15.1; Lk 23.1-2; Zn 18.28-32)
1Granmaten, bann gran-pret ek bann ansyen parmi lepep ti deside pour kondann Zezi anmor. 2Zot ti anmar li e anmenn li devan Pilat ki ti gouverner Romen.
Lanmor Zida
(Akt 1.18-19)
3Kan Zida, sa enn ki ti'n trai Zezi, ti war ki Zezi ti'n ganny kondannen anmor, i ti ranpli avek remor. I ti retourn kot bann gran-pret ek bann ansyen avek sa 30 pyes larzan. 4I ti dir zot, “Mon'n fer pese, akoz mon'n livre disan en inosan!”
Zot ti dir li, “Sa pa konsern nou. Sa i ou zafer!”
5Zida ti zet sa larzan dan Tanp e i ti al pann son lekor.
6Bann gran-pret ti ranmas sa bann pyes larzan. Zot ti dir, “Sa larzan disan; i kont Lalwa pour met dan trezor Tanp.”
7Apre ki zot ti'n tonm dakor, avek sa larzan, zot ti aste propriyete en potye pour fer en simityer pour bann etranze. 8Pour sa rezon, ziska ozordi, sa landrwa in ganny apele Laplenn Disan.
9Alor, sa ki profet Zeremi ti'n dir, ti ganny realize:
Zot ti pran sa 30 pyes larzan#27.9 Valer estimen par serten parmi pep Izrael pour peye pour li.
10e zot ti servi pou aste propriyete sa potye,
parey Senyer ti'n ordonn mwan.
Pilat I Kestyonn Zezi
(Mrk 15.2-5; Lk 23.3-5; Zn 18.28—19.16)
11Alor, Zezi ti debout devan gouverner ki ti kestyonn li, “Ou menm ou lerwa bann Zwif?”
Zezi ti reponn, “Ou menm, ki pe dir.”
12Me i pa ti reponn lo bann lakizasyon bann gran-pret ek bann ansyen.
13Pilat ti dir li, “Ou pa tande tou sa bann lakizasyon kont ou?”
14Me Zezi pa ti reponn en sel mo. Sa ti sirprann gouverner en kantite.
Zezi I Ganny Kondannen Anmor
(Mrk 15.6-15; Lk 23.13-25; Zn 18.39—19.16)
15Sak lafet Pak, gouverner ti annan koutim larg en prizonnyen ki lafoul ti demande. 16Dan sa letan, ti annan en prizonnyen renonmen ki ti apel Zezi Barabas#27.16 Plizyer ansyen maniskri pa fer mansyon sa non Zezi.. 17Kan lafoul ti'n rasanble, Pilat ti demann zot, “Lekel ki zot oule mon large: Zezi Barabas, oubyen Zezi ki zot apel Mesi?”
18Annefe, Pilat ti konnen ki lotorite Zwif ti'n livre Zezi dan son lanmen par zalouzi.
19Pandan ki Pilat ti ankour, son fanm ti anvoy li sa mesaz, “Pa mel ou dan zafer sa zonm zis. Akoz li, mon'n soufer bokou dan en rev sa lannwit.”
20Bann gran-pret ek bann ansyen ti ensiste avek lafoul, pour demann liberasyon Barabas e kondannasyon anmor pour Zezi. 21Gouverner ti demann zot ankor, “Lekel ant sa de, zot oule mon large?”
Zot ti reponn, “Barabas.”
22Pilat ti demann zot, “Alor, ki mon pou fer avek Zezi ki zot apel Mesi?”
Zot tou, zot ti reponn, “Krisifye li!”
23Me Pilat ti demande, “Ki krim in komet?”
Me zot ti kriy pli for, “Krisifye li!”
24Pilat ti war ki pa ti vo lapenn kontinyen, e ki en revolt ti pe al konmanse. Alor, i ti pran delo e lav son lanmen devan lafoul. I ti dir, “Mon pa responsab disan sa zonm! Sa i zot zafer!”
25Lafoul antye ti reponn, “Nou demande ki son disan i tonm lo nou e lo nou bann zanfan!”
26Alor, Pilat ti larg Barabas. Apre ki i ti'n fer fwet Zezi, i ti livre li dan zot lanmen pour li ganny krisifye.
Bann Solda I Monk Zezi
(Mrk 15.16-20; Zn 19.2-3)
27Bann solda gouverner ti anmenn Zezi dan pale gouverner. Latroup antye ti rasanble otour li. 28Zot ti tir son lenz e met li en rob rouz. 29Zot ti tres en kouronn avek bann brans pikan e met lo son latet. Zot ti met en baton dan son lanmen drwat. Azenou devan li, zot ti gognard li, “Viv lerwa bann Zwif!”
30Zot ti kras lo li, pran sa baton e tap li lo latet.
31Kan zot ti'n fini gognard li, zot ti tir sa rob e remet li son lenz. Apre, zot ti anmenn li pour li ganny krisifye.
Zezi I Ganny Krisifye
(Mrk 15.21-32; Lk 23.26-43; Zn 19.17-27)
32Koman zot ti pe sorti dan lavil, zot ti zwenn en zonm ki ti apel Simon, sorti Sirenn. Zot ti fors li anmenn lakrwa Zezi.
33Zot ti ariv dan en landrwa ki ti apel Golgota, savedir plas koksis latet. 34Zot ti ofer Zezi diven melanze avek fyel#27.34 War Ps 69.22.. Me ler Zezi ti goute, i pa ti oule bwar.
35Kan zot ti'n krisifye li, zot ti partaz son lenz par tiraz osor#27.35 War Ps 22.19.. 36Apre, zot ti asize e vey li.
37Par lao son latet, zot ti'n ekri rezon son kondannasyon: Zezi, lerwa bann Zwif. 38Zot ti krisifye de bandi avek li, enn adrwat, lot agos.
39Dimoun ki ti pe pase ti sekwe latet e ensilte li#27.39 War Ps 22.8.: 40Ou ki ti pou detri Tanp e rekonstri li dan trwa zour#27.40 War 26.61; Zn 2.19.! Si ou Garson Bondye, sov ou lekor! Desann lo sa lakrwa.
41Bann gran-pret, bann profeser Lalwa ek bann ansyen ti gognard li. Zot ti dir, 42“I'n sov lezot! Me i pa kapab sov son lekor! Ou ki lerwa Izrael! Desann konmela menm lo sa lakrwa e nou ava krwar dan ou. 43I'n met son konfyans dan Bondye. Aprezan, si Bondye i kontan li, i ava sov li. Annefe i ti dir ki i garson Bondye#27.43 War Ps 22.9.!”
44Bann bandi ki ti'n ganny krisifye ansanm avek li, ti osi ensilte li.
Lanmor Zezi
(Mrk 15.33-41; Lk 23.44-49; Zn 19.28-30)
45Apartir midi, pei antye ti dan fernwanr pandan 3 erdtan. 46Ver 3 er apre midi, Zezi ti kriy avek en lavwa for, “Eloi! Eloi! Lama sabaktani?”
Savedir, “Mon Bondye! Mon Bondye! Akoz ou'n abandonn mwan#27.46 Ps 22.2.?”
47Serten dimoun ki ti pe debout la, ti antann li. Zot ti dir, “I pe apel Eli.”
48Enn parmi zot, ti taye e al tranp en leponz dan vineg ki i ti met lo bout en baton e donn Zezi pour bwar.
49Me lezot ti dir, “Espere! Annou gete si Eli pou vin sov li!”
50Ankor en fwa, Zezi ti kriye avek en lavwa byen for, e i ti rann son dernyen souf.
51Alor, rido dan Tanp#27.51 War Egz 26.31-33. ti desir an de, depi anler ziska anba. Later ti tranble, bann gro ros ti fann. 52Bann tonbo ti ouver e lekor plizyer krwayan ki ti'n mor, ti reganny lavi. 53Zot ti sorti dan zot tonbo. Apre rezireksyon Zezi, zot ti al dan Zerizalenm, kot bokou dimoun ti war zot.
54Sa zofisye Romen ek bann solda ki ti pe vey Zezi ti war sa tranblemandter ek tou sa ki ti'n arive. Alor, zot ti tranble avek en gran lafreyer. Zot ti dir, “Vreman! Sa zonm ti Garson Bondye!”
55Bokou fanm ti pe gete de lwen. Zot ti'n swiv Zezi depi Galile pour servi li. 56Parmi zot, ti annan Mari Madlenn, Mari, manman Zak ek Zozef, ek manman bann garson Zebede.
Zezi I Ganny Met dan Tonbo
(Mrk 15.42-47; Lk 23.50-56; Zn 19.38-42)
57Kan aswar ti fer, en zonm ris sorti Arimate#27.57 Arimate i en vilaz anviron 35 kilomet avek Zerizalenm. ti arive. I ti apel Zozef e i ti enn bann disip Zezi. 58I ti al kot Pilat e demann lekor Zezi. Pilat ti donn lord pour donn li. 59Zozef ti pran lekor Zezi e anvlop li dan en dra nef. 60I ti depoz li dan en tonbo nef, ki i ti'n fek fer fouye dan ros. Apre, i ti roul en gro ros devan lantre e i ti ale. 61Mari Madlenn ek lot Mari ti la; zot ti pe asiz fas avek tonbo.
Solda I Vey Tonbo
62Lannmen, setadir apre zour Preparasyon saba, bann gran-pret ek bann Farizyen ti rasanble kot Pilat. 63Zot ti dir li, “Ekselans! Nou rapel ki kan i ti ankor vivan, sa manter ti dir: Apre trwa zour, mon pou resisite#27.63 War 16.21; 17.23; 20.19.. 64Donn lord ki son tonbo i ganny garde ziska trwazyenm zour. Konmsa, son bann disip pa pou kapab vin vol son lekor e apre dir dimoun: I'n resisite. Sa mansonz pou pli pir ki sa enn avan.”
65Pilat ti dir zot, “Zot annan gard. Ale! Met bann sekirite ki zot oule kot sa tonbo.”
66Zot ti ale. Zot ti met sele lo sa ros ki devan lantre tonbo e plas bann gard pou veye.
Labib An Kreol Seselwa © Seychelles Bible Society, 2013.