Matye 28
28
Rezireksyon Zezi
(Mrk 16.1-10; Lk 24.1-12; Zn 20.1-10)
1Apre saba, byen granmaten premye zour lasemenn, Mari Madlenn ek lot Mari#28.1 War 27.56. ti al get tonbo. 2En kou angran, ti annan en gro tranblemandter: En lanz Senyer ti desann sorti dan lesyel. I ti'n roul sa ros e asiz lo la. 3Son laparans ti parey zekler e son lenz ti blan parey lannez. 4Bann gard ti tranble avek lafreyer; zot ti parey dimoun mor.
5Sa lanz ti dir avek sa de fanm, “Pa per! Mon konnen ki zot pe rod Zezi ki'n ganny krisifye. 6I pa isi; i'n resisite parey i ti'n dir. Vin get landrwa kot zot ti'n met li. 7Al deswit dir son bann disip ki i'n resisite, e i pe al esper zot Galile#28.7 War 26.32.. Zot ava war li laba! Sanmenm sa ki mon ti annan pour dir zot.”
8Deswit, bann fanm ti kit tonbo. Zot ti per, me zot ti osi ranpli avek lazwa. Zot ti taye pour al donn sa nouvel bann disip.
9Me toutakou, Zezi ti vin rankontre zot. I ti dir zot, “Bonzour!”
Zot ti apros li, atrap son lipye e ador li. 10Alor Zezi ti dir zot, “Pa per! Al dir mon bann frer vin Galile kot zot ava war mwan.”
Rapor Gard
11Letan sa bann fanm ti pe ale, en group gard ki ti parmi bann ki ti pe vey latonm, ti al dan lavil e rakont bann gran-pret tou sa ki ti'n arive. 12Bann gran-pret ti rasanble bann ansyen. Ansanm, zot ti fer en plan. Zot ti donn bann solda en gro sonm larzan. 13Zot ti donn sa lord, “Zot ava dir: Son bann disip ti vini pandan lannwit e vol son lekor pandan ki nou ti pe dormi. 14Si sa zafer i ariv dan zorey gouverner, nou ava konvenk li, pour ki zot pa ganny problenm.”
15Bann solda ti pran larzan e fer parey zot ti'n ganny ordonnen. Alor, ziska ozordi, sa zistwar in ganny fannen parmi bann Zwif.
Zezi I Aparet avek Son bann Disip
(Mrk 16.14-18; Lk 24.36-49; Zn 20.19-23; Akt 1.6-8)
16Sa onz disip ti al Galile, lo montanny kot Zezi ti'n endik zot#28.16 War 26.32.. 17Kan zot ti war li, zot ti ador li, me serten ti annan dout. 18Zezi ti apros zot e dir zot, “Mon'n ganny tou pouvwar dan lesyel ek lo later. 19Al parmi zabitan bann nasyon, e fer zot vin mon bann disip. Batiz zot lo non Papa, lo non Garson e lo non Lespri Sen. 20Ansenny zot pour obei tou sa ki mon'n komann zot. Pa oubliye: Mwan, mon pou avek zot tou le zour, ziska lafen lemonn.”
Labib An Kreol Seselwa © Seychelles Bible Society, 2013.