Matye 26
26
Konplo kont Zezi
(Mrk 14.1-2; Lk 22.1-2; Zn 11.45-53)
1Kan Zezi ti'n fini ansennyen, i ti dir avek son bann disip, 2“Zot konnen dan de zour i lafet Pak#26.2 War Egz 12.1-27., e Fis-de-Lonm pou ganny livre pour li ganny krisifye.”
3Alor, bann gran-pret ek bann ansyen ti zwenn ansanm dan pale Gran-Pret, ki ti apel Kaif. 4Ansanm, zot ti deside pour aret Zezi par riz e pour touy li. 5Me zot ti dir, “Fodre pa aret li pandan lafet, pour pa fer lepep revolte.”
En Fanm I Vid Lesans lo Latet Zezi
(Mrk 14.3-9; Zn 12.1-8)
6Zezi ti Betani kot Simon ki ti'n deza ganny maladi ki parey lalep. 7Letan Zezi ti pe manze, en fanm ti apros li avek en flakon plen avek en lesans ser. I ti vid sa lesans lo latet Zezi. 8Kan bann disip ti war sa, zot ti ankoler. Zot ti dir, “Akoz sa gaspiyaz? 9Nou ti ava kapab vann sa lesans pour en bon pri e donn sa larzan bann pov!”
10Me Zezi, ki ti konnen sa ki zot ti pe dir, ti dir zot, “Akoz zot pe trakas sa fanm? I'n fer en bon aksyon pour mwan. 11Pou touzour annan bann pov parmi zot. Me mwan, mon pa pou toultan la avek zot. 12Sa fanm i'n vers lesans lo mon lekor pour prepar mwan pour mon tonbo. 13Mon dir zot, sa i laverite: Partou kot sa Bonn Nouvel pou ganny anonse dan lemonn antye, sa ki sa fanm in fer, pou ganny rakonte an son memwar.”
Zida I Trai Zezi
(Mrk 14.10-11; Lk 22.3-6)
14Apre sa, Zida Iskaryot, enn parmi sa 12 disip, ti al kot bann gran-pret. 15I ti demann zot, “Ki zot pou donn mwan si mon livre zot Zezi?”
Zot ti pey li 30 pyes larzan. 16Apartir sa moman, Zida ti rod en lokazyon pour trai Zezi.
Zezi I Selebre Pak avek Son bann Disip
(Mrk 14.12-21; Lk 22.7-14, 21-23; Zn 13.21-30)
17Premye zour lafet Dipen san lelven, bann disip ti vin kot Zezi. Zot ti demann li, “Kote ou oule nou prepar repa Pak?”
18Zezi ti dir zot, “Al dan lavil kot entel e dir li: Met i dir: Mon ler in arive. Mon pou selebre lafet Pak avek mon bann disip kot ou.”
19Sa bann disip ti fer parey Zezi ti'n dir zot e zot ti prepar repa Pak.
20Kan aswar ti fer, Zezi ti asiz avek son 12 disip. 21Pandan ki zot ti pe manze, Zezi ti dir zot, “Mon dir zot, sa i laverite: Enn parmi zot pou trai mwan.”
22Son bann disip ti sagren e konmans demann li enn apre lot, “Senyer, mwan sa?”
23Zezi ti reponn, “Sa enn ki'n met son lanmen dan pla avek mwan, pou trai mwan. 24Parey in ganny ekri dan Lekritir, Fis-de-Lonm pou ale#26.24 War Ps 22.2-19; Eza 53.. Me maler pour sa zonm par ki Fis-de-Lonm i ganny trai! I ti ava preferab pour li, si i pa ti'n zanmen ne!”
25Zida, sa enn ki ti trai Zezi, ti demande, “Met, mwan sa?”
Zezi ti reponn li, “Ou menm ou'n dir.”
Repa Senyer
(Mrk 14.22-26; Lk 22.14-20; 1 Kor 11.23-25)
26Pandan ki zot ti pe manze, Zezi ti pran en dipen. I ti remersye Bondye, kas sa dipen e donn son bann disip. I ti dir, “Pran, manze; sa i mon lekor.”
27Apre, i ti pran en lakoup diven. I ti remersye Bondye e donn zot. I ti dir, “Bwar zot tou. 28Sa i mon disan, disan lalyans ki'n ganny verse pour bokou, pour pardon bann pese. 29Mon dir zot, sa i laverite: Mon pa pou bwar ankor sa prodwi rezen, ziska zour ki mon bwar en diven nouvo avek zot, dan Rwayonm mon Papa.”
30Apre ki zot ti'n sant bann psonm lafet,#26.30 Bann Psonm lafet: Savedir Psonm 113-118. zot ti al lo montanny Zolivye.
Zezi I Predir ki Pyer Pou Renye Li
(Mrk 14.27-31; Lk 22.31-34; Zn 13.36-38)
31Apre, Zezi ti dir zot, “Tanto menm, zot tou, zot pou abandonn mwan. Annefe, Lekritir i dir: Mon pou touy berze e bann mouton pou ganny disperse#26.31 Zak 13.7.. 32Me apre ki mon'n resisite, mon pou al esper zot dan Galile.”
33Pyer ti dir Zezi, “Menm si tou lezot i abandonn ou, mwan mon pa pou zanmen abandonn ou!”
34Zezi ti dir Pyer, “Mon dir ou, sa i laverite: Avan kok i sante tanto, par trwa fwa ou pou dir ki ou pa konn mwan.”
35Pyer ti reponn, “Menm si fodre mon mor avek ou, mon pa pou zanmen renye ou!”
Tou lezot disip ti dir parey.
Zezi I Priye dan Zarden Zetsemane
(Mrk 14.32-42; Lk 22.39-46)
36Alor, Zezi ek son bann disip ti al dan en landrwa ki ti apel Zetsemane#26.36 Non Arameen ki vedir: Landrwa kot i fer delwil.. I ti dir zot, “Asiz isi pandan ki mon al priye en pti pe pli lwen, laba.” 37I ti anmenn Pyer ek de garson Zebede avek li. I ti konmans santi li tris e angwase. 38I ti dir zot, “Mon leker i ranpli avek latristes lanmor. Reste isi e vey avek mwan.”
39I ti al en pti pe pli lwen. I ti tonm lafas ater e priye: Mon Papa! Si posib, fer sa lakoup pas lwen avek mwan. Sepandan, pa fer dapre mon lavolonte, me dapre ou lavolonte.
40I ti retourn kot son trwa disip e i ti war zot pe dormi. I ti dir avek Pyer, “Alor! Zot pa'n kapab vey menm en erdtan avek mwan? 41Veye e priye pour zot pa tonm dan tantasyon. Annefe, lespri i for, me lekor i feb.”
42Zezi ti al ankor en fwa pour priye. I ti dir: Mon Papa! Si i posib, elwanny sa lakoup devan mwan san ki mon bezwen bwar li. Me ki ou lavolonte ki ganny akonpli. 43Ankor en fwa, i ti retournen e war bann disip pe dormi; zot lizye ti lour.
44Alor pour en trwazyenm fwa, Zezi ti kit zot e i ti al priye. I ti repet menm parol. 45Apre sa, i ti retourn kot son bann disip. I ti dir zot, “Kontinyen dormi e repoze. Ler in arive pour ki Fis-de-Lonm i ganny livre dan lanmen bann malfeter. 46Leve! Annou ale. Sa enn ki pou trai mwan in arive.”
Zezi I Ganny Arete
(Mrk 14.43-50; Lk 22.47-53; Zn 18.3-12)
47Zezi ti ankor pe koze kan Zida, enn parmi son 12 disip, ti arive. En gran lafoul avek lepe ek baton ti pe swiv li. Zot ti'n ganny anvoye par bann sef pret ek bann ansyen parmi pep Zwif. 48Zida ki ti pe trai li, ti'n donn zot en siny: Sa enn ki mon pou anbrase, li menm li. Atrap li.
49Zida ti apros Zezi. I ti dir, “Bonswar, Met!”
I ti anbras li.
50Zezi ti dir li, “Mon zanmi! Sa ki ou annan pour fer, fer li.”
Alor, lafoul ti aprose. Zot ti met lanmen lo Zezi e aret li. 51Enn parmi bann ki ti avek Zezi, ti anvoy lanmen lo son lepe ki i ti tire. I ti donn en kou serviter Gran-Pret e sot son zorey. 52Zezi ti dir li, “Remet ou lepe dan son fouro. Annefe, tou sa ki servi lepe, pou mor par lepe. 53Eski zot pa konnen ki mon kapab demann mon Papa led, e deswit i ava anvoy mwan plis ki douz lezyon lanz? 54Me, konman Lekritir pou ganny akonpli? Annefe, Lekritir i deklare ki sa i devre arive.”
55Answit, Zezi ti dir avek lafoul, “Eski zot ti bezwen vin avek lepe ek baton pour aret mwan konmsi mon ti en bandi? Tou le zour mon ti asize dan Tanp pe ansennyen, i zot pa ti aret mwan. 56Me tousala in arive pour ki Lekritir ek parol bann profet i ganny akonpli.”
Alor, tou son bann disip ti abandonn li e sove.
Zezi devan Konsey
(Mrk 14.53-65; Lk 22.54-55, 63-71; Zn 18.13-14, 19-24)
57Bann dimoun ki ti aret Zezi, ti anmenn li kot Gran-Pret Kaif, la kot bann profeser Lalwa ek bann ansyen ti'n rasanble. 58Pyer ti pe swiv Zezi lwen deryer, ziska dan lakour Gran-Pret. I ti antre dan milye lakour e asiz ansanm avek bann gard, pour war ki mannyer tousala pou fini.
59Bann gran-pret ek Konsey antye ti esey rod fo levidans kont Zezi, pour zot kondann li anmor. 60Me zot pa ti trouv nanryen, menm si en kantite dimoun ti vin donn fo levidans kont Zezi. Finalman de zonm ti vin devan. 61Zot ti dir, “Sa zonm in dir: Mon kapab detri Tanp e rekonstri li dan trwa zour#26.61 War Zn 2.19..”
62Alor, Gran-Pret ti debout. I ti dir avek Zezi, “Ou pa reponn? Ki ou annan pou dir kont lakizasyon sa bann dimoun?”
63Me Zezi ti gard silans. Alor, Gran-Pret ti dir li, “Lo non Bondye vivan, mon demann ou, dir nou si ou menm Mesi, Garson Bondye.”
64Zezi ti reponn li, “Ou menm ki'n dir. Me mon dir zot: Dezormen, zot pou war Fis-de-Lonm asize lo kote drwat Bondye Toupwisan, pe vini lo nyaz dan lesyel#26.64 Ps 110.1; Dan 7.13..”
65Alor, Gran-Pret ti desir son lenz. I ti dir, “Zot in antann li koz kont Bondye! Nou pa bezwen ankor temwen. Zot in antann son parol blasfenm! 66Ki zot mazinen?”
Zot ti reponn, “I merit lanmor#26.66 War Lev 24.16..”
67Apre, zot ti kras dan son figir e tap li. Serten ti kalot li. 68Zot ti dir, “Ou ki Mesi! Profetize. Devinen lekel ki'n tap ou?”
Pyer I Renye ki I Konn Zezi
(Mrk 14.66-72; Lk 22.56-62; Zn 18.15-18, 25-27)
69Pyer ti pe asize deor dan lakour. En servant ti apros li e dir li, “Ou osi ou ti avek Zezi, sa Galileen.”
70Me Pyer ti nye devan zot tou. I ti dir, “Mon pa konnen ki ou pe dir.”
71Alor, i ti al dan direksyon laport lakour kot en lot servant ti war li e dir avek sa bann ki ti la, “Sa zonm ti avek Zezi ki sorti Nazaret.”
72Ankor en fwa, Pyer ti nye. I ti fer serman, “Mon pa konn sa zonm.”
73En pti pe plitar, bann zonm ki ti pe debout la, ti vin kot Pyer. Zot ti dir li, “Nou sir ki ou osi, ou enn parmi zot. Ou laksan i trai ou!”
74Pyer ti fer serman e demann malediksyon lo li, “Mon pa konn sa zonm!”
Anmenmtan, en kok ti sante. 75Alor, Pyer ti rapel parol ki Zezi ti'n dir li: Avan kok i sante, ou pou renye mwan trwa fwa#26.75 War 26.34.. Pyer ti sorti e al plere asodlarm.
Labib An Kreol Seselwa © Seychelles Bible Society, 2013.