Egzod 15
15
Kantik Moiz
1Alor, Moiz avek pep Izrael ti sante an loner SENYER:
Mon pou sant pour SENYER;
in montre son grander dan en tre gran laviktwar.
I'n zet seval ek son kavalye dan lanmer.
2SENYER i mon lafors ek mon pwisans.
Li menm mon sover.
Li menm mon Bondye,
mon pou loue li.
Li menm Bondye mon zanset;
mon pou loue li.
3SENYER i en gerye,
Son non i SENYER.
4I'n zet dan lanmer, kales lager Faraon ek son larme.
Son bann vayan kavalye in anfons dan lanmer Rouz.
5Fon lanmer ti kouver zot.
Zot ti koul apik dan profonder parey en ros.
6Ou lanmen drwat SENYER,
i gran par son pwisans.
Ou lanmen drwat SENYER,
in kraz lennmi.
7Dan grander ou mazeste,
ou detri ou lennmi.
Ou anvoy ou lakoler
e zot ganny brile parey lapay.
8Ou soufle, e lanmer i rasanble;
laroul ti monte parey en baraz;
profonder lanmer ti vin solid.
9Lennmi ti dir:
Mon pou pourswiv zot, mon pou ganny zot.
Mon pou ganny en par dan piyaz lager
e mon pou rasazye.
Mon pou tir mon lepe e mon pour detri zot.
10Ou ti fer soufle ou divan
e lanmer ti kouver zot.
Zot ti koule parey diplon
dan en lanmer formidab.
11Lekel parmi bann bondye
ki parey ou, SENYER?
Lekel ki parey ou, e briye avek sentete,
e ki fer bann mervey?
12Ou ti lev ou lanmen drwat
e later ti anval zot.
13Dan ou fidelite,
ou ti kondwir sa pep ki ou ti sove.
Par ou lafors,
ou ti gid zot ver ou demer sen.
14Bann pep in tande, zot tranble;
douler lakousman in sezi bann Filisten.
15Bann sef Edonm i boulverse.
Bann dirizan Moab i tranble.
Tou zabitan Kanaan in perdi kouraz.
16Lafreyer ek laper in tonm lo zot.
Par lafors ou lebra,
zot perdi laparol, parey en ros,
ziska ki ou pep SENYER, in fini pase,
ziska ki sa pep SENYER, ki ou'n sove, in fini pase.
17Ou pou anmenn zot e etabli zot
lo montanny ou posesyon,
en landrwa ki ou'n prepare
pour ou reste, SENYER,
dan sa sanktyer ki ou lanmen in prepare, SENYER.
18SENYER i lerwa pour touzour!
19Bann seval Faraon, son bann kales lager ek son bann kavalye ti koule dan lanmer. SENYER ti fer lanmer retourn lo zot, me pep Izrael ti mars lo later ferm atraver lanmer.
Kantik Mirianm
20Mirianm, en profetes, ser Aaron, ti pran en tanbouren. Tou bann fanm ti sorti e swiv li. Zot ti zwe tanbouren e zot ti danse. 21Mirianm ti sant avek zot:
Sant pour SENYER akoz in ganny laviktwar:
Seval ek kavalye in ganny zete dan lanmer.
Delo Anmer
22Apre, Moiz ti fer pep Izrael kit lanmer Rouz; zot ti al dan direksyon dezer Sour. Zot ti mars pandan trwa zour dan dezer e zot pa ti war okenn delo. 23Zot ti ariv Mara kot zot pa ti kapab bwar sa delo akoz i ti anmer. Alor, zot ti apel sa landrwa Mara, savedir anmer.
24Pep Izrael ti mirmire kont Moiz. Zot ti dir, “Ki nou pou bwar?”
25Moiz ti kriy ver SENYER e SENYER ti montre li en pye dibwa. I ti zet en morso dan delo ki ti vin delo dou. La ki SENYER ti donn lepep en lalwa ek en regleman; la osi ki i ti teste zot.
26I ti dir, “Si ou vreman ekout SENYER, ou Bondye, si ou fer sa ki byen devan li, si ou port atansyon son bann komannman e gard tou son bann lalwa, mon pa pou fer ou sibir sa bann maladi ki mon ti anvoy lo Lezip: Mwan SENYER, ki geri ou.”
27Zot ti ariv Elim kot ti annan 12 sours delo e 70 pye palm. Zot ti kanp la, obor delo.
Currently Selected:
Egzod 15: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
