Egzod 14
14
Bann Izraelit I Travers Lanmer Rouz
1SENYER ti dir Moiz, 2“Dir pep Izrael retournen e kanp pre avek Pi-Hahirot, ant Migdol ek lanmer, devan Baal-Sefonn. Zot ava kanp la, pre avek lanmer. 3Faraon pou dir lo size bann Izraelit: Pep Izrael in pri ant lanmer ek dezer. 4Mon pou andirsi leker Faraon; i pou pourswiv zot e mon pou ganny laglwar atraver Faraon ek son pep. Tou Ezipsyen pou konnen ki se mwan SENYER”. Sanmenm ki zot ti fer.
5Kan lerwa Lezip ti ganny dir ki pep Izrael ti'n ale, santiman Faraon ek son serviter ti sanze anver sa pep. Zot ti dir: Ki nou'n fer la? Nou'n les pep Izrael ale kan zot ti pe servi nou!
6Alor Faraon ti prepar son kales e i ti anmenn son larme avek li. 7I ti pran 600 meyer kales ek tou lezot kales lager dan Lezip. Lo sak kales ti annan trwa zonm. 8SENYER ti andirsi leker Faraon, lerwa Lezip, ki ti pourswiv pep Izrael. Pep Izrael ti'n sorti lib, anba proteksyon Bondye. 9Bann Ezipsyen ti pourswiv zot. Larme Faraon avek tou son seval ek kales lager, son bann kavalye ti rezwenn zot kot zot ti pe kanpe obor lanmer, pre Pi-Hahirot, anfas avek Baal-Sefonn.
10Kan Faraon ti pe aprose, pep Izrael ti lev lizye e la, zot ti war bann Ezipsyen pe pourswiv zot e zot ti per. Pep Izrael ti kriy ver SENYER. 11Zot ti dir Moiz, “Pa ti annan ase latonm dan Lezip pour ki ou anmenn nou isi pour mor dan dezer? Ki ou'n fer avek nou? 12Depi Lezip, pa nou ti dir ou: Les nou trankil e nou ava servi bann Ezipsyen? Vomye nou ti'n servi bann Ezipsyen olye vin mor dan dezer.”
13Moiz ti dir pep Izrael, “Pa per! Reste debout e regarde ki mannyer SENYER pou sov zot ozordi. Sa bann Ezipsyen ki zot war ozordi pou disparet. 14SENYER pou lager pour zot. Zot, zis reste trankil.”
15SENYER ti dir Moiz, “Akoz zot pe apel mwan? Dir pep Izrael kontiny zot larout. 16Ou! Pran ou baton, lev ou lanmen lo lanmer e fann li pour ki pep Izrael ava kapab travers apye ziska lo sek. 17Mon pou andirsi leker bann Ezipsyen pour fer zot swiv deryer. Mon pou montre zot mon grander atraver Faraon, tou son larme, son bann kales lager ek son bann kavalye. 18Bann Ezipsyen ava konnen ki mwan menm SENYER, kan zot ava war mon grander atraver Faraon, son bann kales lager ek son bann kavalye.”
19Lanz Bondye ki ti pe mars devan kan bann Izraelit, ti al plas li par deryer. Kolonn nyaz ti sorti devan e plas li deryer zot. 20I ti plas li ant kan bann Ezipsyen ek kan bann Izraelit. Sa nyaz ti fernwanr en kote; me lot kote ti kler dan lannwit. Zot pa ti apros kanmarad pandan lannwit.
21Alor, Moiz ti lev son lanmen lo lanmer. Pandan tou lannwit, SENYER ti fer lanmer rekile par en gro divan Les, e fer lanmer vin sek. 22Pep Izrael ti travers lo en semen sek dan milye lanmer. Delo ti form en miray lo zot kote drwat e lo zot kote gos. 23Bann Ezipsyen ti kontinyen pourswiv zot. Tou bann seval Faraon, son bann kales lager ek son bann kavalye ti antre dan milye lanmer deryer zot.
24Byen granmaten, atraver kolonn dife ek nyaz, SENYER ti regard troup bann Ezipsyen e senm panik parmi zot. 25I ti blok larou zot kales lager; zot ti ganny difikilte pour avanse. Alor, bann Ezipsyen ti dir, “Annou sove pour sap bann Izraelit, akoz SENYER pe konbat kont Lezip pour zot.”
26SENYER ti dir Moiz, “Lev ou lanmen lo lanmer pour ki delo i retourn lo bann Ezipsyen, e kouver zot kales lager ek zot kavalye.”
27Alor, Moiz ti lev son lanmen lo lanmer. Lo granmaten, delo ti retourn dan son plas. Bann Ezipsyen ti sove ler lanmer ti vini me SENYER ti debaras li avek zot dan milye lanmer. 28Delo ti retournen e kouver bann kales lager, bann kavalye ek larme Faraon ki ti'n antre dan lanmer, deryer bann Izraelit. Pa ti reste en sel parmi zot. 29Me bann Izraelit ti mars lo later ferm dan milye lanmer, avek en miray delo lo zot kote drwat e lo zot kote gos.
30Sa zour, SENYER ti sov pep Izrael dan lanmen bann Ezipsyen. Izrael ti war bann Ezipsyen mor lo bor lanmer. 31Pep Izrael ti war lafors lanmen SENYER kont bann Ezipsyen. Alor, lepep ti ganny respe pour SENYER. Zot ti krwar dan SENYER e dan son serviter Moiz.
Currently Selected:
Egzod 14: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
