Egzod 13
13
Lord Konsernan Premye Ne
1SENYER ti dir Moiz, 2“Konsakre tou bann premye ne pour mwan. Imen koman zannimo parmi bann Izraelit i pour mwan.”
Lafet Dipen san Lelven
3Moiz ti dir lepep: Mazin byen sa zour kan zot ti sorti Lezip, kot zot ti dan lesklavaz. Par lafors son lanmen ki SENYER ti fer zot sorti Lezip. Zot pa devre manz okenn dipen avek lelven. 4Zot pe sorti ozordi, dan mwan Abib. 5Zot ava pratik sa rityel pandan menm mwan, kan SENYER ti fer zot antre dan pei bann Kananeen, Hitit, Amorit, Hivit ek Zebizit; dan sa pei ki i ti promet avek zot zanset pour li donn zot, en pei kot dile ek dimyel i koule. 6Pandan set zour, ou ava manz dipen san lelven, me setyenm zour, i ava annan en lafet an loner SENYER. 7Ou ava manz dipen san lelven pandan set zour. Fodre pa ki i annan dipen avek lelven kot ou; fodre pa ki i annan okenn lelven dan tou ou teritwar. 8Sa zour, ou ava dir ou zanfan: Mon fer sa, an memwar sa ki SENYER ti fer pour mwan letan mon ti sorti Lezip. 9I ava vin en siny lo ou lanmen e en mark lo ou fron, pour ki lalwa SENYER i dan ou labous. Annefe, par son pwisans, SENYER ti fer ou sorti Lezip. 10Ou ava obzerv sa lalwa dan letan fikse, toulezan.
Premye Ne
11“Kan SENYER ava'n fer ou antre dan pei Kanaan, parey i ti promet ou ek ou bann zanset, e ki i ava'n donn ou, 12ou ava met apar pour SENYER tou zanfan mal premye ne e tou premye porte parmi ou bann zannimo. Tou mal i pour SENYER 13Me ou ava ranplas tou bourik mal premye ne par en zenn mouton. Si ou pa fer sa, ou ava kas son likou. Ou ava osi reaste tou premye ne parmi ou bann zanfan. 14Alavenir, kan ou garson ava demann ou: Ki savedir sa? Ou ava reponn li: Par son pwisans, SENYER ti delivre nou dan lesklavaz Lezip. 15Kan dan son lantetman, Faraon ti refize les nou ale, SENYER ti touy tou premye ne dan Lezip, depi premye ne imen ziska premye ne zannimo. Pour sa rezon ki mon ofer an sakrifis pour SENYER, tou zannimo mal ki sorti premye dan vant son manman; me mon reaste tou bann garson premye ne. 16Sa i ava en siny lo ou lanmen e en mark lo ou fron ki ava fer ou rapel sa ki SENYER ti fer par son pwisans, ler SENYER ti fer nou sorti Lezip.”
Kolonn Nyaz ek Kolonn Dife
17Kan Faraon ti'n les pep Izrael ale, Bondye pa ti kondwir li dan direksyon pei Filisten, menm si sa larout ti pli direk. Annefe, Bondye ti mazinen ki si lepep i devre fer fas avek lager, i ava kapab regrete e deside retourn Lezip. 18Me Bondye ti diriz zot atraver dezer par lanmer Rouz. Pep Izrael ti sorti Lezip pare pour lager. 19Moiz ti pran bann lezo Zozef avek li, akoz Zozef ti'n demann pep Izrael fer en serman: Kan Bondye i delivre zot, zot ava anmenn mon lezo avek zot.
20Zot ti kit Soukot e al kanp Etanm, obor dezer. 21SENYER ti al devan zot dan en kolonn nyaz pandan lazournen e dan en kolonn dife aswar, pour zot kapab kontinyen marse lizour koman aswar. 22Sa kolonn nyaz pa ti kit lepep pandan lizour, ni sa kolonn dife aswar.
Currently Selected:
Egzod 13: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
