MATHI 27
27
Jisu Pilat Yang Norocho
(Mrk 15.1; Luk 23.1-2; Jhn 18.28-32)
1Nyajang bebü ayingti ko azibarüti atümungnü Jisu süsohnung arah külüpcho. 2Arühnü ixilihnü abi xohpü nowü, Roman Governor Pilat khyang khakhuchüjücho.
Judas Thsingsehcho
(R. Ngu 1.18-19)
3 #
R. Ngu 1.18-19; Azk 23.18 Kihyochüjübong Judas-nü Jisu tsü mülangjüko pü yuchinü, abi lasih thsamülali thsi taripi sangre tsü hiwü bebü ayingti ko azibarüti khyang jücho. 4Abinü yocho. “Mülang müliba nyüh khüdu süsohnung kihyochonü Ihnü amünyi shitpahko!”
“Arühnü lalingcho, hütsü ihrü nguchi mah. Hütsü nü jangjang thsaang!”
5Judas-nü thsi tsü Amübükuh la tsü tsayohchüjüpü tsipecho; hütsüpü abi wünü ajangjangthsa thsingsehcho.
6Bebü ayingtinü thsi tsü thro hironü yocho, “Hiba hi ashüh thsie, ko hi amübü thsibong la zahkehnung ihsa Yuzengnü mümüla.” 7Achotsü arühnü kihtapü thsi tsünü shirü kongyo thsanung, fühtangrü lih lihcho. 8Hütsünü hütsüba lih te chünye yingcheh “Ashüh lih” pü dsire.
9 #
Zek 11.12-13
“Hütsüta Jeremia azikehbanü choyohcho yuje tikehcho: Israelrünü abi khyang jünung nyengchoba thsi taripi sangre tsü khyücho. 10Ko Abüdongba-nü Ite mülacho roh-i, arühnü hütsü fühtangrü lih ngang jücho.”
Pilat-nü Jisu te Yutsingcho
(Mrk 15.2-5; Luk 23.3-5; Jhn 18.33-38)
11Jisu te yu tsingdhingba Roman Governor jingte tsü abi yacho. Abinü tsingdhingcho, “Jihudarü yangthsaba tsü nüh mah-o?”
Jisu-nü lalingcho, “Nüpunü yore.” 12Bebü ayingti ko azibarütinü abi mülangjünye abinü tusü mülalingcho.
13Hütsünü Pilat-nü abi te yocho, “Arühnü nüh mülangjüba hitoi hi nühnü müyuchirü do?”
14Ta Jisu-nü yu khüdusü mülalingcho, hütsünü governor khütang nyemüyangcho.
Jisu Süsohnung Mülangjücho
(Mrk 15.6-15; Luk 23.13-25; Jhn 18.39—19.16)
15Phungkhu Thsüti müipi arangyoh la lirü nyüh khüdu amülungnü sü chingnang abi müthehnung tsü Roman governor yangthsa licho. 16Hütsü shikhela arangyoh la lirü anengkhong anengnü Barabbas licho. 17Achotsü sühdi tsü shibülungde Pilat-nü arüh te tsingdhingcho, “Ihnü nührü khyang sütpü süu müthehsohnyüro? Barabbas a mahkhang Mesia dsiba Jisu?” 18Jihudarünü Jisu mükoh dhinglangnü khakhuchüjüchoepü abinü müdhecho.
19Pilat yangthsaba pümji la pümyade, anitpünü yusi khüdu müthehchücho: “Mülang müliba nyitsarü chah tsü tu tünguchi; tunüo shomang I melang abi nengdangnü Ih dee chongchako.”
20Bebü ayingti ko azibarütinü Barabbas tsü müthechüng ko Jisu tsü süsohng pü Pilat te yosohnung amülung tsü kihchocho. 21Ta Pilat-nü amülung te tsingdhingcho, “Hinyi yola nührünü sütpü süu I khyang müthehsohnyüro?”
“Arühnü lalingcho, Barabbas!”
22Pilat-nü arüh te tsingdhingcho. “Khang, Mesia pü dsiba Jisu chah Ihnü tu nguchinung?”
Arüh atümungnü lalingcho, “Abi hamkehng!”
23Ta Pilat-nü tsingdhingcho, “Abinü tu thsamehcho?”
Hütsütade arühnü khütang züdenü yocho: “Abi hamkehng!”
24 #
Azk 21.6-9
Khode Pilat-nü tu chotanung müdhsüdah, alaa mümüp shingchehnungduepü dhingchehcho, abinü kih hironü sühdi bete tsünü akheh mütsahnü yocho, “Hiba Nyitsarü sücho nengdang I bha müthsanung! Hi nührünü nguchire!”
25Sühdishünü lalingcho, “Abi süsohcho ngang akhingchi tsü ihrü ko ihrü tsurüti chah küdusohng!”
26Hütsüde Pilat-nü arüh khyang Barabbas müthehcho; ko Jisu chah xüpsohpü hamkehsohnung khakhuchüjücho.
Rothsarütinü Jisu Müthsamünyücho
(Mrk 15.16-20; Jhn 19.2-3)
27Hütsüpü Pilat athrungrütinü Jisu tsü governor kulang nozüducho, ko sühdi shünü abi mükangticho. 28Arühnü abi shü khohpehjücho ko anyahrüm shü phakehjücho. 29Hütsüpü arühnü zengshünü yangthsarü kuthri chehpü athah la thrijücho, ko akheh tsalang ja khüdu bisohcho; hütsüpü arühnü abete mükhukeh abi müthsamünyü yocho. “Jihudarü yangthsaba, ku tsüp lieng!” 30Arühnü abi chah müchohkehjücho, ko ja tsü khyonü athah la xüpcho. 31Khode müthsamünyükacho, anyahrüm shü tsü khohpehjüpü apu shü thali yohjücho. Hütsüpü arühnü abi hamkehnung nücheh tsicho.
Jisu Hamkehcho
(Mrk 15.21-32; Luk 23.26-43; Jhn 19.17-27)
32Arüh tsiyade, arühnü nyüh khüdu Cyrene lanü anengnü Simon mütohcho ko rothsarütinü abi khyang Jisu khala khing dhisohcho. 33Arühnü lih müdüm khüdu Golgotha, khüi adüzü “Thahrü lih” pü dsiba lang rocho. 34#N. Khi 69.21 Hütsüla arühnü Jisu khyang Cikih akha te yohrütapü ayongnung jücho, ta hütsü müjangdhingpü, abinü müyongcho.
35 #
N. Khi 22.18
Arühnü abi hamkehcho ko ajengki arüh yola zii thsadhingpü changtacho. 36Hütsüpü arühnü hütsüla abi dhing pümcho. 37Abi thah te arühnü abi mülangjücho yu tsü thrahkehpüjücho “Hiba hi Jisu, Jihudarü yangthsaba.” 38Hütsüpü arühnü Jisu yola afüashi nyüh anyüh abi tsalang khüdu ko fülilang khüdu hamkehcho.
39 #
N. Khi 22.7; 109.25 Lahkhulahlarünü mii aku ngahchi Jisu mükhimüngucho: 40#Mat 26.61; Jhn 2.19 “Amübükuh tphüpü nyümong asang lipü thali thsachehbong! Nüh Tsingrangba Tsurükhang nü jangjang khümchoung, Khala chah tsünü jürung!”
41Hütsüroh-i bebü ayingti Yuzeng adorüti ko azibarütinü müthsamünyücho: 42“Abinü bürülü khümchocho, ta apulü mükhümchochehre! Israel yangthsaba tsü abi mahrü do? Abinü ade khala chah tsünü jürokhang, Ihrünü abi chah yudsinung! 43#N. Khi 22.8 Abinü Tsingrangba chah longlangre ko Tsingrangba Tsurü epü yore. Khang Tsingrangba-nü abi khümcho a mükhümchonang Ihsanü dhingdhingnung!”
44Abi te hamkehrü afüashi tsünüsü hütsü roh-i du tsü abi müthsamünyücho.
Jisu Sücho
(Mrk 15.33-41; Luk 23.44-49; Jhn 19.28-30)
45Nyüthungla limih apümlang rehtseh asang mapehcho. 46#N. Khi 22.1 Asang bekhyah kohla Jisu-nü yuva amülahnü züdecho, “Eli, Eli, lama sabak-thani?” “Khüi adüzü, I Tsingrang, I Tsingrang, tuepü Ih pehjüro?”
47Hütsü shündhün yarü khürünü yuchi yocho, “Abinü Elija dsichile!” 48#N. Khi 69.21 Hütsüde arüh yola nyüh khüdunü shang wünü, münuh acikih la dhsangpü, tbütphü müle la rahkehpü abi khyang tihnung müküpcho.
49Ta aparünü yocho, “Ying, abi khümchonung Elija ro a müronang Ihsanü dhingnung.”
50Jisu-nü anyüpiu yuva amülah chürocho ko müci longcho.
51 #
Nüch 26.31-33
Hütsüde Amübükuh la kitiba shü, athahlangnü alih chii anyüh kang rohrüpcho. Alihyo zingcho ko lung tsohrüpcho, 52kongti tsohrüp khangthrucho, ko yüpseh liba amüsarüti adrong kangchehli rocho. 53Arüh kong lanü chürocho, ko Jisu kangli ropü khanglang, arühnü Amüsa yangdi lang züducho, ko nyitsarü adrongnü arüh ngucho.
54Jisu nyahrü rothsarü anüchiba ko rothsarütinü alihyo zingcho ko atikehcho apüm ngude, arüh drüsehcho, ko “Yujeba abi Tsingrangba tsurü thsako pü yocho.”
55 #
Luk 8.2-3
Hütsüla khingkurü adrong sürü Galil lanü Jisu khanglang iirocho, ko abi rükucho arüh ashulanü dhingyacho. 56Arüh yola Mary Magdalin, Zebede tsurüti Jakob e Josef nyüh atpa Mary zeh licho.
Jisu Dhrürangcho
(Mrk 15.42-47; Luk 23.50-56; Jhn 19.38-42)
57Nyüzeh rode, Arimathia lanü alirü nyüh khüdu anengnü Josef ro chihcho; abisü Jisu mono khüdu thsacho. 58Abinü Pilat yanglang wü Jisu me tsü chingcho. Pilat-nü me tsü Josef khyang jünung yuzengjücho. 59Ko Josef-nü me tsü khyüchocho, ko anana shü la müshüpü, 60abinü lung la chiphoh licho kong asi la yohpücho. Hütsüpü abinü kong trahtri tsü lung amülah khüdunü zehti yohpüpü tsicho. 61Ko Mary Magdalin ko aparü Mary nyüh tsü hütsüla kong lahpi be pipü pümcho.
Kong Anyahrü
62Nyümong khüu, khüiba Sabath nyümong thsacho, bebü ayingti ko Farisirütinü Pilat te shirünü 63#Mat 16.21; 17.23; 20.19; Mrk 8.31; 9.31; 10.33-34; Luk 9.22; 18.31-33 yocho, “Adirü, arahkhehbong abi akang lide, ‘Nyümong asang lipü kangchehli ronungepü yocho ihrünü lümchehre.’ 64Hütsüeko abi monotinü wünü me tsü müfühchehnungthsa ko nyitsarüti te abi asücho lanü kangchehli roko pü müyosohnung thsa nyümong asang müpide abi kong tsü müzah nyahnung yuzeng jüng. Hütsüta mahkhang, hiba akaba arahkheh tsü akhudiba tenü amütsau thsanung.”
65“Pilat-nü arüh te yocho,” “Anyahrü nüng ko wü kong tsü nührünü kohcho nyahng.”
66Achotsü arühnü wü, kong tsü mükhangthrusohnung shulüm lungnü amüdhethsa shingtipü anyahrüti yasohcho.
Currently Selected:
MATHI 27: SANGBSI
Highlight
Copy
Compare
Share
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
