MATHI 28
28
Kangchehli Rocho
(Mrk 16.1-10; Luk 24.1-12; Jhn 20.1-10)
1Sabath nyangnyü khüu, tsingsede, Mary Magdalin ko aparü Mary kong tsü dhingnung wücho. 2Dhrongyengnü alihyo zingcho; ko Abüdongba riwürü khüdu ninglangnü jüro lung tsü zehpehpü hütsü michah pümcho. 3Adhingnung ningmüla müjang ko abi shü shurü roh-i athru thsacho. 4Anyahrüti tsü khura drüchonü dhridhriseh asücho roh-i kangcho.
5Ninglang Riwürü tsünü khingkurüti te chota yocho, “Nührü tüdrü,” “Jisu sü hamkehcho nührünü abi yangchirepü Ihnü müdhele. 6Abi hila mühle; abinü yocho roh-i, abi kangli roko. Hila rung ko abi yüpcho la dhing. 7Zah wüng ko amonoti te young, ‘Abi asücho lanü kangchehli roko ko ade abi nührü müngu Galil lang wüle; hütsüla nührünü abi ngunung!’ Ihnü nührü te tu yocho lümchehng.”
8Achotsü arühnü zah kong tsü pehjücho, ko drünye ta akünyangnü jeng amonoti te yonung shang wücho.
9Dhrongyengnü Jisu-nü arüh shirücho ko yocho, “nührü te atbachi lieng.” Arühnü ro abi jing chah marehnü abi mübücho. 10“Jisu-nü arüh te yocho, tüdrü, wüng ko I jünirüti te Galil lang wüng ko young ko hütsüla arühnü Ih ngunung.”
Anyahrü Yusi
11Khingkurüti tsü tsichi yade, kong nyahrü rothsarü khürünü yangdi lang tsü thali wü bebü ayingtite atikehcho apüm yocho. 12Bebü ayingtinü azibarütite shirücho ko arah külüpcho; arühnü rothsarüti khyang tsü thsi khütango jünü 13yocho, “Ihrü yüpjode, amonoti amala ronü me tsü fotsipehchoepü nührünü young. 14Ko hi governor-nü yuchikhang, Ihrünü nührü tsü yuje-epü kihchonung, ko nührü hütsü nengdang tu lümxünung mühle.”
15Anyahrüti tsünü thsi tsü khyücho ko arüh te yocho kyo nguchicho. Hütsünü hiba yusi tsü Jihudarünü chünye chii dangchire.
Jisu Amonoti te Chüro Ngusohcho
(Mrk 16.14-18; Luk 24.36-49; Jhn 20.19-23; R. Ngu 1.6-8)
16Mono dhürekheh tsü Galil la liba, Jisu-nü arüh te yochoba azonglang tsü wücho.#Mat 26.32; Mrk 14.28 17Khode arühnü abi ngucho, arühnü abi mübücho, ta khürünülü tütohnyünyehcho. 18Jisu-nü arüh münyehthsa ronü arüh te yocho, “Ninglang ko limih la I khyang tase atümung jüko. 19Hütsüeko yucho apümlang wüng, ko arüh I mono kangsohng: Au, Atsurü ko Anbü Amüsa nengla arüh baptijüng.#R. Ngu 1.8 20Ko Ihnü nührü te tuturü mülacho apüm bichinung arüh te young, ko limih müchangde Ih nührü yola lede zeh linung.”
Currently Selected:
MATHI 28: SANGBSI
Highlight
Copy
Compare
Share
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
