MATHI 26
26
Jisu Nyüm Arah
(Mrk 14.1-2; Luk 22.1-2; Jhn 11.45-53)
1Khode Jisu-nü hiri atümung yokacho, abinü amonoti te yocho, 2“Nyümong anyüh lipü, Phungkhu Thsüti ronung nührünü müdhele, ko Nyitsarü Tsurü tsü khala chah hamkehnung khakhuchüjünung.”#Nüch 12.1-27
3Hütsüde bebü ayingti ko azibarüti Bebü amungthriba Kaifas kuh la shibülungcho, 4ko Jisu rangnung ko müpsehnung lümchung rang külüpcho. 5“Arühnü yocho, Ihsanü hütsü thsüti shikhela münguchibae” mahkhang yu chüronung.
Bethany la Jisu Müyühjücho
(Mrk 14.3-9; Jhn 12.1-8)
6Jisu Bethany la mübhira kehba Simon kuh la pümcho. 7Jisu Yangtsu pümde, khingkurü khüdu angang athsah axümlichi tuji alabaster füh#7.37 Alabaster Füh: Mrk 14.3 tsü dhing. khüdu jeng bipü ro abükyünü abi thah chah tungkehjücho.#Luk 7.37-38 8Monotinü hütsü ngu zichürocho. “Tuepü hi müzangro?” Arühnü tsingdhingcho. 9“Hütsü adrong ngang ipü thsi tsü ailümrü khyang jüba thsako!”
10Jisu-nü arühnü yoba tsü müdhe abinü arüh te yocho, “Tuepü khingkutpü tsü longmüziro? Abinü Ite nguchiba hi dee atsae. 11Ailümrü nührü te lede linung, ta Ihlü nührü te lede mülinung.#Azk 15.11 12Abükyünü Ifü la axümlichi tungkehjüba tsü Ih dhrürangnung rungnümsohre. 13Ade, Ihnü nührü te yore, limih atümunglang khüdederü yuse atsa thsingyunang, abükyü lümkehnung nengdang abükyünü tu nguchicho hütsü yonung.”
Judas-nü Jisu Kihyochünung Nyengchore
(Mrk 14.10-11; Luk 22.3-6)
14Hütsüde mono dhüreanyüh yola, khüdu anengnü Judas Iskariot, bebü ayingti yanglang wüpü 15tsingdhingcho, “Ihnü nührü khyang Jisu khakhuchüjükhang, nührünü I khyang tu jünung?” Arühnü taripi thsi sangre abi khyang khi yohjücho.#Zek 11.12 16Hütsütinü Judas-nü arüh khyang Jisu khakhuchüjünung nengdang thsatsa yangchicho.
Jisu-nü Amonoti Yola Phungkhu Tsuyong Tsucho
(Mrk 14.12-21; Luk 22.7-13, 21-23; Jhn 13.21-30)
17Bhüpza müyohba hümdhse thsüti adikeh nyümong monotinü Jisu yang ronü tsingdhingcho, “Nü nengdang Phungkhu Thsüti khüde rungnümsohnyüro?”
18Abinü arüh te “Yangdi la tsü nyüh khüdu yang wüng, ko abi te young: ‘I bekhyah chihko; nü kuh la Ih ko I monotinü Phungkhu Thsüti müzehnungepü adobanü yore.’ ”
19Monotinü Jisu-nü yocho roh-i nguchicho ko Phungkhu Thsüti tsü rungnümcho.
20Khode nyüzehcho, Jisu ko monoti tsü yangtsunung pümcho. 21Yangtsu chah tsü Jisu-nü yocho, “Ihnü nührü te yore, nührü yola nyüh khüdunü Ih kihyochünung.”
22Monoti tsü longyüpehcho ko abi te khüdu khüdunü tsingdhingcho, “Hütsü Ih mah-o, Abüdongba?”
23Jisu-nü lalingcho, “Sünü tbhü la Ite abi hümdhse dhsangro abinü Ih kihyochüjünung.#N. Khi 41.9 24Amüsa yunü yocho roh-i Nyitsarü Tsurü sünung, ta sünü nyitsarü Tsurü tsü kihyochünang hütsüba nyitsarü nengdang khüta ahohah! Hütsüba nyitsarü tsü müsurojungcho atsau thsako!”
25Kihyochübong Judas-nü yocho, “Hütsü Ih mah-o?”
Jisu-nü lalingcho, “Nüpunü yore.”
Abüdongba Thsüti
(Mrk 14.22-26; Luk 22.14-20; 1 Kor 11.23-25)
26Arüh yangtsude, Jisu-nü hümdhse khyücho, anengse jücho, chenahcho ko amonoti khyang jonü yocho, “Hi khyüng ko tsung; hi Ifü lile.”
27Hütsüpü abinü shing khüdu khyücho, Tsingrangba khyang anengse jücho, ko hütsü arüh khyang jücho. Abinü yocho. “Nührü atümung hi yong.” 28“Hiba hi I azengtacho shüh lile, khüi adrong mülangpehjünung nengdang khatohcho.#Nüch 24.8; Jer 31.31-34 29Ihnü Tsingrangba Yanglih la cikih asi nührü yola yongnung nyümong tsü müchidelü Ihnü khodesü hiba cikih hi thali müyongnung.”
30Hütsüpü arühnü khi khüdu thsapü olive zonglang tsicho.
Peter-nü Münyengchonung Jisu-nü Yojungcho
(Mrk 14.27-31; Luk 22.31-34; Jhn 13.36-38)
31Hütsüde Jisu-nü arüh te yocho, “Shomülang tsatsa nührü atümungnü Ih pehjüpü tsipehnung, tunüo Amüsa yunü yore, ‘Tsingrangba-nü san nyahrü tsü müpsehnung ko santi tsü tsishonung.’ 32Ta Ih kangchehli roko khanglang, Ih nührü müngu Galil lang wünung.”
33Peter-nü Jisu te yocho. “Aparü atümungnü nüh pehjünye, Ihnü khodesü nüh müpehjünung!”
34Jisu-nü Peter te yocho, “Ihnü nüte yutsatsa yore, shomülang hüna mükhongde, nühnü Ih asangpili münyengchonung.”
35Peter-nü lalingcho, “Ih nü yola sünungsü thsanye, Ihnü khodesü hütsüta müyonung!”
Ko aparü monoti atümung nüsü hütsü roh-i du yocho.
Jisu Gethsemane la Dangkhidangnangcho
(Mrk 14.32-42; Luk 22.39-46)
36Hütsüpü Jisu-nü amonoti yola Gethsemane dsiba müdüm yang wücho, ko abinü arüh te yocho, “Ih hütsüla wü dangkhidangnangde nührü hila püm.” 37Abinü abi yola Peter ko Zebede tsurü anyüh nücho. Abi chah alongri ko lümtohnü jeng, 38abinü arüh te yocho, “I lasih la alongri tsü dirachonü Ih asünung roh-i due. Hila I yola kukeng lieng.”
39Abinü khü wüpü, alih la hapkeh dangkhidangnangcho, “Uwa, hi akohnung thsakhang, I chahnü hiba chongcha shing hi khyümüing! Ta I lümcho mah, nü lümcho thsaang.”
40Hütsüde abinü mono asang yanglang thali rocho ko arüh yüpseh ngucho; ko abinü Peter te yocho, “Nührü asang I yola rehtseh khüdu dusü kukeng mülichehba hi tuo? 41Nührü athsadsüla mülongnungthsa kukeng ko dangkhidangnang. Anbülü longphile, ta shutsala re müzeh.”
42Anyüpili Jisu-nü wü dangkhidangnangcho, “Uwa, hiba chongcha shing hi Ihnü müyongde mükhyümüichehnung thsakhang, hi nü lümcho thsaang.” 43Abi adesü thali rocho ko monoti tsü yüpseh ngucho; arühnü arüh nah trah mülichehcho.
44Asangpiusü Jisu-nü arüh pehjüpü wü yu hütsü du tsü yo dangkhidangnangcho. 45Hütsüpü abinü monoti yang thali ro yocho, “Nührü ade yingcheh kyahshang yüpjorü ang? Dhing! Nyitsarü Tsurü tsü münyirü kheh la khakhuchüjünung becho chihko. 46Shemüsung, Ihsanü wünung. Dhing, Ih kihyochüjüba nyitsarü tsü hila lile!”
Jisu Rangcho
(Mrk 14.43-50; Luk 22.47-53; Jhn 18.3-12)
47Jisu yu müchozah-e, mono dhüreanyüh yola khüdu Judas tsü ro chihcho. Abi yola bebü ayingti ko azibarütinü müthehcho nohsheng ko singdümpi bipü mülung amülah zeh rocho. 48Kihyochüjübong tsünü amülung khyang amüdhethsa khüdu jücho: “Ihnü süchah be müthsüpnang nührünü khyünyüba tsü abie. Abi rang!”
49Judas-nü müchongkhüti Jisu yang wücho ko yocho, “Tsa lieng, adorü, ko abi chah be müthsüpcho.”
50Jisu-nü lalingcho, “Müyangrü, zahding!”
Hütsüde arühnü ro Jisu rangpü rahcho. 51Jisu yola yarü nyüh khüdunü anohsheng tohcheh amungthriba bebürü kuliba nangku thsüp-pehjücho. 52Jisu-nü abi te yocho. “Nü noh tsü nohtrüp la thali yohpüng, Sürünü nohsheng bichinang arüh nohshengnü sünung. 53Ihnü I U te atronung dsikhang abinü khüdupinü ninglang riwürüti hajar dhüreanyüh chah keh müthehnung kohlepü nührünü mümüdhe ang? 54Hütsütakhang, Amüsa yu khüinü hi tikehbaepü yoba tsü khüta tikehnung?”
55Hütsüde Jisu-nü sühdi te yocho, “Ih Afühashirü khüdu kyo Ih rangnung nohsheng ko singdümpi biko ronungthsa kangcho ang? Amübükuh la Ih nührü te nyümong mükhu donü pümcho, ko nührünü Ih mürang.#Luk 19.47; 21.37 56Ta hiri atümung tikehba tsü Amüsa yula azikehrütinü aronung nengdang tu thrah licho hütsü tikehre.”
Hütsüde monoti atümungnü abi pehjüpü tsipehcho.
Jisu Ashimükhong Bete
(Mrk 14.53-65; Luk 22.54-55, 63-71; Jhn 18.13-14, 19-24)
57Jisu rangrütinü abi amungthriba bebü Kaifas kuh yang nowücho, khüde Yuzeng adorüti ko azibarüti müjang shibülungnü licho. 58Peter-nü bebü amungthriba kuhbe chiinü ahongkoh thü-thü iiwücho. Abinü kuhbe chii züducho ko tu tikehnang müdhenung nengdang anyahrüti yola pümcho. 59Bebü ayingti ko ashimükhong atümungnü Jisu süsohnung nengdang abi nyüm yuzi khürü yangchicho; 60ta nyitsarü adrongnü abi nyüm arahkheh yuzi jünyesü, arühnü tusü müngucho. Achangkala nyüh anyüh mütrahkeh küro 61yocho, “Hiba nyitsarünü yocho, ‘Ihnü Amübükuh hi tphüpü nyümong asang khanglang thali thsachehnung kohle.’ ”#Jhn 2.19
62Bebü amungthribanü shemüsu Jisu te yocho, “Nüh nyüm yuzi jübala tsü nüh alalingba tu mülirü ang?” 63Ta Jisu-nü ciisü müthsacho. Anyüpiusü Bebü amungthribanü abi te yocho, “Nühnü akang liba Tsingrang nengla yuchümnung Ihnü yore: Nüh Tsingrangba Tsurü, Mesia tsü a mahro, ihrü te young.”
64Jisu-nü abi te lalingcho, “Nüpunü yore. Ta Ihnü nührü atümung te yore; Tunyah mülipü nührünü Nyitsarü Tsurü Akohbong tsalang pümpü ninglang nyükhi la rolang ngunung!”#Dan 7.13
65Hi yochonü bebü amungthribanü apu shü rehnah yocho, “Müthsamünyüko! Ihsanü yuzi alaa tu müdhsütah! Nührünü ade tsatsa abinü Tsingrangba müthsamünyücho yuchiko!#Lev 24.16 66Nührü alümcho tuo?”
Arühnü lalingcho, “Abi mülangko ko abi süsohbae.”
67Hütsüde arühnü aromih chah müchohkehjücho ko abi chah shingcho; ko abi chah tangrünü#Isa 50.6 68yocho, “Mesia. Nü chah shingba tsü sünang ihrü te young!”
Peter-nü Jisu Münyengchocho
(Mrk 14.66-72; Luk 22.56-62; Jhn 18.15-18, 25-27)
69Peter kubete pümde bebü amungthriba kulilarü khüdu abi yangro yocho, “Nühsü, Galilrü Jisu yola lichoe.”
70Ta abinü arüh atümung bete münyengchonü yocho, “Nüh tu nengdang chorünang Ihnü mümüdhe.”
71Ko abi dongkhu tside, aparü kulilarü khüdunü abi ngu müshüm yarü te yocho, “Hivihi Nazaret-rü Jisu yola lichoe.”
72Anyüpiusü abinü hütsü münyengchonü lalingcho, “Ihnü yuchümre, Ihnü hütsüba nyitsarü tsü mümüdhe!”
73Azachah lipü hütsüla yarüti Peter yang rocho. “Ajüje nüh arüh yola khüdue. Tunüo nü yuvanü müdhere!”
74“Hütsüde Peter-nü apu chah chokehcholanü yuchümcho! Ihnü hütsüba nyitsarü tsü mümüdhe!”
Hütsüde hüna khongcho, 75ko Jisu-nü “Hüna mükhongde nühnü asangpili Ih müchechonung” pü yocho Peter-nü lümchehcho. Ko abinü dongkhu chüdunü khah-a tracho.
Currently Selected:
MATHI 26: SANGBSI
Highlight
Copy
Compare
Share
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
