MATHI 25
25
Lazarü Dhürenü Yukitacho
1 #
Luk 12.35
“Hütsü shikhela ninglang Yanglih tsü hi kyo linung, bekhyah khüdu lazarü nyüh dhüre arüh dsi biko kukangba langmütohnung wücho. 2Arüh münga amüsithsa ko aparü münga tsü lümzehrü thsacho. 3Amüsithsarü tsü arüh dsi bicho ta michangkih alaa mühicho, 4ta lümzehrüti tsü arüh dsi nengdang michangkih abong jeng hicho. 5Kukangbong tsü münu mürocho, hütsünü lazarüti tsü nyichi yüpsehpecho.
6“Yürüptülungla züdecho, ‘kukangbong tsü hila lile, ronü abi mütohng!’ 7Lazarü dhüre tsü surocho ko palu dsi tahkehcho. 8Hütsüde amüsithsarü tsünü lümzehrü te yocho, ‘Nührü dsikih lanü ihrü khyangsü aza khülo, tunüo ihrü dsi mehle.’ 9‘Alümzehrüti tsünü lalingcho, nührü ko ihrü nengdang kükyo müzeh. Airü yang wüng ko nührübürü nengdang lihng.’ 10Hütsünü amüsithsa lazarüti tsü dsikih lihnung wücho, ko arüh tsipü lide, kukangbong tsü ro chihcho. Rungnüm liba lazarü münga tsü abi yola kukangba thsütilang tsü züducho, ko kukhang tsü khangticho.
11 #
Luk 13.25
“Akhanglang aparü lazarüti tsüsü ro chihcho. ‘Adirü, adirü! Ihrü nüyohng’ arühnü kihchicho. 12Ta kukangbong tsünü lalingcho. Ihnü nührü mümüdhe.”
13Ko Jisu-nü zika yocho, “Hütsüeko müzah lieng, tunüo nührünü nyümong tsü mahkhang bekhyah tsü mümüdhe.
Kulirü Asang Yukitacho
(Luk 19.11-27)
14“Hütsü bekhyah la ninglang Yanglih tsü hi kyo linung. Shikhe khüdu nyüh khüdu shitseh wünungthsa kangcho, abinü akulirüti dsiro akuhthsi arüh khyang müshonung jücho. 15Abinü arüh müipi khyang palunü kohnung aichi jücho: khüdu khyang hon thsi hajar münga, khüdu khyang hajar anyüh ko aparü khüdu khyang hajar khüdu. Hütsüpü abi shitseh tsicho. 16Kulirü sünü thsi hajar münga khyüchocho abinü dhsüdhsa wücho ko abinü shithsabhülehnü thsi apa hajar münga jingchocho. 17Hiroh-i tsü kulirü sünü thsi hajar anyüh khyüchocho abinü apa hajar anyüh jingchocho. 18Ta kulirü sünü thsi hajar khüdu khyüchocho abinü wünü alih jupü abi abüdongba thsi tsü rangpücho.
19“Shikhe anyahli lipü hütsüri kulirüti abüdongba tsü thali rocho ko arüh te thsi hümtacho. 20Kulirü sünü thsi hajar münga khyüchocho abi zürocho ko apa hajar münga tsü jücho. Abinü yocho, Adirü ‘Nühnü I khyang thsi hajar münga jücho, Dhing! Hila Ihnü jingchocho apa hajar münga lile.’ 21Abüdongba-nü yocho, ‘Mahso, atsa ko longlangchehba kulirü! Nüh kuthsi azikyah müshonungla longlangchehcho, hütsünü Ihnü nüh kuthsi amülah müshonung nyümkehjünung. Nüh Abüdongba akünyangla zürung!’
22“Hütsüpü kulirü sü khyang thsi hajar anyüh jücho abi züronü yocho, ‘Nühnü I khyang thsi hajar anyüh jücho, adirü. Dhing! Hila Ihnü jingchocho apa hajar anyüh lile.’ 23Abüdongba-nü yocho, ‘Mahso, nüh atsa ko longlangchehba kulirü! Kuthsi azikyah müshonungla longlangchehcho, hütsünü Ihnü nüh kuthsi amülah müshonung nyümkehjünung. Nüh Abüdongba akünyangla zürung!’
24“Hütsüpü kulirü sünü thsi hajar khüdu khyüchocho abi züronü yocho, ‘Adirü, Nüh atürütseh nyitsarüepü Ihnü müdhele; nühnü müchicho lanü maxare, ko nühnü müshuhcho lanü yangyore. 25Ihnü drücho tsü wünü nü thsi tsü alih la rangpüjüchoe. Dhing! Hila nüpu thsi adongdong lile.’
26“Ta abi abüdongba-nü yocho, ‘Nüh amükhyu ko amüngang kulirü! Ihnü müchicho lanü xare, ko müshuhcho lanü yangyorepü nühnü müdhecho ang? 27Khang, nühnü I thsi tsü thsikuh la yohpüba thsako, arelang Ih thali rode I thsi tsü ajeyoh zehpü apüm nguliba thsako. 28Ade, abi kheh lanü thsi tsü khyüng ko sü thsi hajar dhüre liro abi khyang jüng. 29#Mat 13.12; Mrk 4.25; Luk 8.18 Tunüo sü lango liro, alaa mii jünung, ko abi thangchi linung; ta sü müliro, abi azikyah liba tsüsü abi chahnü hitsinung. 30#Mat 8.12; 22.13; Luk 13.28 Ko akhyüchah müliba kulirü tsü dongkhu amarürah la tsü tphahchehchüpehng; ko hütsüla abi tranung ko aha mütrehkehtanung.’
Achangka Yukhaba
31 #
Mat 16.27; 19.28 “Khode Nyitsarü Tsurü yangthsarü kyo abi yola riwürü atümung zeh ronang, abi apu ahechi yangthsaba pümji la pümnung, 32ko yucho atümung abi jingte nübülungnung. Hütsüde San nyahrünü miza lanü san changshocho kyo abinü arüh mülung anyüh kang changsahnung. 33Abinü amüsarüti abi tsalang ko aparü abi fülilang yohpünung. 34Hütsüde yangthsabanü abi tsalang liba nyitsarüti te yonung, ‘Rung, I U-nü müwajürüti! Rung, ko limih thridinü nührü nengdang rungnüm liba Yanglih tsü khyüng. 35Ih yangseh lide nührünü Ih yangtüpcho, Ih xoseh lide nührünü I khyang tihcho; Ih shirüthsa lide nührünü Ih nüyohcho, 36Ih tbhüdeng lide nührünü Ih müpisohcho; Ih füdhsa lide nührünü Ih xodhingcho. Akhangti la lide nührünü Ih xodhingcho.’
37“Amüsarütinü hütsüde abi te lalingnung, ‘Abüdongba, khode nüh yangseh ngu Ihrünü yangtüpcho, mahkhang nüh xoseh ngu tihcho? 38Khode nüh shirüthsa ngu Ihrünü nüyohcho, mahkhang tbhüdeng ngu müpisohcho? 39Khode nüh füdhsa mahkhang akhangtikuh la ngu Ihrünü xodhingcho?’ 40Yangthsabanü lalingnung, ‘Ihnü nührü te yore, khodederü nührünü I jünirü azauba khüdu te nguchicho, hütsü I khyang nguchiko!’
41“Hütsüpü abi fülilang lirüti te yonung, ‘Nührü Tsingrangba chokehchola küdurüti, I tenü shehkhung! Motsing ko abi riwürüti nengdang achangka müliba michang rungnüm lichola tsü züdung! 42Ih yangseh licho ta nührünü Ih müyangdüp, xoseh licho ta nührünü I khyang müdi, 43Ih shirüthsa licho ta nührünü Ih münüyoh, tbhüdeng licho ta nührünü Ih mümüpisoh; Ih füdhsa ko akhangti la licho ta nührünü Ih müxodhing.’
44“Hütsütade arühnü abi te lalingnung, ‘Abüdongba, khode Ihrünü nüh yangseh mahkhang xoseh mahkhang shirüthsa mahkhang tbhüdeng mahkhang füdhsa, mahkhang akhangti la lide nüh ngunü mütrocho?’ 45Yangthsabanü lalingnung, ‘Ihnü nührü te yore, khodederü nührünü hiri azauba khüdu tronung dhsonglicho hütsü nührünü Ih tronung dhsongliko.’ 46#Dan 12.2 Hütsütade hiri tsü müchangkaba akhingchi la züdusohnung, ta amüsarütilü müchangkaba akang langi wünung.”
Currently Selected:
MATHI 25: SANGBSI
Highlight
Copy
Compare
Share
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
