MATHI 24
24
Amübükuh Thsangnyangnung Choyohcho
(Mrk 13.1, 2; Luk 21.5, 6)
1Jisu Amübükuh pehjüpü tsichi yade, amonotinü abi yang ronü kuh nengdang tsü thongu yocho. 2Abinü yocho “Ho, nührünü hiri atümung tsa du ngule. Ihnü hi nührü te yore: hila lung khüdu mii ajojila müjonung; arüh apüm trümnyangpehnung.”
Dhsümthsedhsümloh ko Chongcha
(Mrk 13.3-13; Luk 21.7-19)
3Jisu olive zong la pümde, monoti tsü abi yang rang ronü tsingdhingcho, “Hi atümung khode tikehnung ihrü te young, ko nüh ronung ko limih changkanung bekhyah tu amüdhethsa linung.”
4Jisu-nü lalingcho, “Müzahng ko sükhyangsü nührü tüthsüyohchüsoh. 5Nyitsarü adrongnü I nengla ronü yonung, ‘Mesia tsü Ih-e’ ko arühnü adrong thsüyohchünung! 6Nührünü amünyeh ko ashula khata yuva yuchinung; ta müci türohcho. Hiri tikehnung, ta hütsü achangka mah. 7Yuchoti khüdunü khüdu te khatanung, ko yanglih khüdunü khüdu iichitanung. Apümlang yangkongthsükong ko alihyo zingba linung. 8Hiri atümung tsü azarü surode akhudiba mikhung kyo linung.
9“Hütsüde nührü rangnü khingchisohnung ko süsohnung khakhuchüjünung. I khyanglangnü amüi tsurü atümungnü nührü thrünyinung.#Mat 10.22 10Hütsüde adrongnü arüh yudsi pehjünung; arüh khüdunü khüdu itsutanung ko khüunü khüu thrünyitanung. 11Hütsüde arahkheh azikehrü adrong chüronung ko nyitsarü adrong thsüyohchünung. 12Hütsüta amünyi bholonung ko nyitsarü adrong amüi rü-ü kangnung. 13Ta sünü achangchi rangchonang abi khümchonung.#Mat 10.22 14Ko hiba ninglang yanglih nengdang yuse atsa limih apümlang amüi tsurü atümung te yuzithsanung thsingyunung; hütsüpü achangka tsü ronung.
Athrünyinung Adrünung
(Mrk 13.14-23; Luk 21.20-24)
15“Nührünü ‘Athrünyinung adrünung’#24.15 Athrünyinung adrünung: Yangpirü yangthsarütinü Jerusalem mahchehpü Amübükuh la arüh kyothri müdongpüba te dsire. (Daniel 9.27, 11.31, 12.11 tsü dhing) khüi nengdang azikehrü Daniel-nü chocho hütsü ngunung. Hütsü Amüsa müdüm chah yanung. (Akhirünü müdhenungba: hi adüzü tunang nyichehng!) 16Hütsütade sürü Judea la liro arüh azonglang tsieng. 17Sü kumungchah liro abi arüh kuh la licho kohro khyünung tüjowü.#Luk 17.31 18Sü luh la liro abinü ashü khyünung thali tüwülung. 19Hütsüri nyümongla khingkurü sürü fü müdengro ko akhunga liba atpati nengdang khütoh-i adrünung thsanung! 20Nührü tsichi nyümong tsü tsingkangde mahkhang Sabath nyümong mütikehnung Tsingrangba te kihchieng! 21Tunüo hütsüba nyümongla thsamütsa tsü limih thripü chünye yingcheh tikeh rocho tenü dee alaa thsanung, mahkhang hütsü kyo khodesü mütikehnung.#Dan 12.1; Mis 7.14 22Ta Tsingrangba-nü nyümong adrong khipehjüko; hütsüta müthsalang, süsü mükhümchonung. Ta abi athrochehrüti khyanglangnü Tsingrangba-nü nyümongti tsü khipehjünung.
23“Hütsüde khürünü nüte, ‘Dhing, Mesia tsü hila lile!’ Mahkhang, abi hütsüla lilepü yokhang, hütsü tüyudsi. 24Tunüo arahkheh Mesia ko arahkheh azikehrüti chüronung; kohkhang, arühnü Tsingrangba athrochehrüti mii thsüyohchünung nengdang thsayahiya ko anyemüyangnung nguchinung. 25Nyieng! Ihnü nührü te amüngunü hi yopehko.
26“Mahkhang, khürünü nührü te, Dhing, abi lipilih la tsü lile, hütsülang tüwü; mahkhang, ‘Dhing, abi hila rang pümlepü yokhang, hütsü tüyudsi.’#Luk 17.23-24 27Tunüo Nyitsarü Tsurü tsü ningmüla khüinü ning atümung khu nyüchürolangnü nyüzüdu chii tehro hütsü roh-i ronung.
28“Khüde asücho me liro, hütsüla hogonti shibülungnung.#Luk 17.37
Nyitsarü Tsurü Roba
(Mrk 13.24-27; Luk 21.25-28)
29“Hütsü thsamütsa nyümongti khukhangyeng, nyü tsü mapehnung ko chonunü müvipehnung, ning chahnü chenghiti trümchonung, ko adukah la liba tase tsü arüh lang lanü shehmüinung.#Isa 13.10; 34.4; Ezk 32.7; Joel 2.10, 31; 3.15; Mis 6.12-13 30Hütsüpü ningchah Nyitsarü Tsurü roba amüdhethsa chüronung; ko limih la yuchoti atümungnü Nyitsarü Tsurü ninglang nyükhi la zii ko ahechi amülah te jüro ngude tranung.#Dan 7.13; Zek 12.10-14; Mis 1.7 31Rühti arangcheh mehnung, athrochehrüti alih achangka khüulangnü khüulang chii nübülungnung nengdang abinü ariwürüti limih jongnah müyülang müthehnung.
Ngurüsing Khu Anyichoba
(Mrk 13.28-31; Luk 21.29-33)
32“Ngurüsing khunü nührü khyang anyichoba khüdu jüsohng. Khode ajengzati müyah kangnü anu chüro ava thümlangnang, nührünü müyü amünyethsa rolepü müdhere. 33Hütsü kyo, khode nührünü hiri atümung ngunang, bekhyah tsü amünyethsa lile, ko ronung thsako pü nührünü müdhenung. 34Ihnü yuje nührü te yore, hiri atümung mütikehkhangde hiba shang hi mükhutsinung. 35Ning ko alih khutsinung, ta I yu khodesü mükhutsinung.
Nyümong ko Bekhyah tsü Sünüsü Mümüdhe
(Mrk 13.32-37; Luk 17.26-30, 34-36)
36“Ta hütsüba nyümong ko bekhyah tsü khode ronungnang sünüsü mümüdhe. Au chah khu ninglang riwürüti mahkhang Atsurü nüsü mümüdhe. 37Nyitsarü Tsurü roba tsü Noa chichah tu tikehcho hütsü kyo linung.#Lip 6.5-8 38Kihmülüm müngu, hütsüri nyümongla nyitsarünü tsunü ko yongnü, khingkurü ko adhrerü xengyangpitanü Noa singkong la züdu nyümong chii licho. 39Ta kihmülüm ro arüh atümung wohchi tsi yingcheh tu tikeh yacho hütsü arühnü mümüdhecho. Nyitsarü Tsurü rodesü hütsü kyonung.#Lip 7.6-24 40Hütsütade nyüh anyüh luh khüdula yuthsah yanung: khüdu notsinung ko khüdu pehjünung. 41Khingkurü nyüh anyüh thsang khüdula fürü thsü yanung: khüdu notsinung ko khüdu pehjünung.
42“Hütsüeko müzahng, tunüo tu nyümongla nührü Abüdongba ronungnang nührünü mümüdhe. 43Kuh abüdongba tsünü aführü ronung bekhyah tsü müdherelang, abinü nyahnung ko aführü tsünü abi kuh la rohphoh müzürosohnung.#Luk 12.39-40 44Hütsüeko nührüsü lede rungnüm du libae, tunüo nührünü mülongdi liba shikhe khüdula Nyitsarü Tsurü ronung.
Longlangchehba ko Longmülangchehba Kulirü
(Luk 12.41-48)
45“Khang, longlangchehba ko lümpisa kulirü tsü süo? Hütsü abüdongba-nü sü khyang kulirü aparüti khyang akyang tsuyongnung jünung nyümkehjüro abi tsüe. 46Abüdongba kulang rode akuliba tsü hütsü roh-i nguchi ngurelang, hütsüba kulibong tsü khüta akünyangnung! 47Ajüje Ihnü nührü te yore, Abüdongba tsünü hütsüba kulibong tsü abi kuthsi apüm müshosohnung. 48Ta abi tsü kulirü amütsa thsakhang, apunü Abüdongba tsü anyahli müronungepü lümnü, 49müjang dikehrü chah lahnung ko yongmücharü yola tsuyongnung dikehnung. 50Hütsüde Abüdongba tsü abinü mülongdiba ko abinü müdhe müliba shikhe nyümong khüdula ronung. 51Abüdongba tsünü abi tphahchehchüpehnung ko akhürahrüti yola zehsohnung. Hütsüla abi tranung ko ha mütrehkehtanung.
Currently Selected:
MATHI 24: SANGBSI
Highlight
Copy
Compare
Share
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
