SOLOMON VEI LOU 8
8
1Oh, ne hai apfü nou naopa peikhai touyu aprou mai ali tousarou!
Süthaio, E neye vakou nou daoyuma,
Enou neye kholoua mümu peiyu phaki maili noua Eye jüphilai moe.
2Enou neye süthai poa apfü ki hi sa-a loulai,
alia Eye hrülouyu puhvei kide nahi sa-a loulai.
Enou neye kaivei pou nou thou souyu rashidzü pa solai,
alia avei vajüshidzü sü panou kelai.
3Oh nevei bah nalao nanou apei khehi thoulo,
alia nevei bah zhoulao nahai Eye khopeio!
4Enou neletao hi chaachou soupeio tea khowe,
Oh Jerusalem hi nah naotumai taore,
süolouzü neletao nou leshaye panou la puh jüpa souloumo koute puhye soushu moa soukai laimoe teanou.
Lou Arouna: Ki hi Veyu Lou
Naotu maitao
5Rükou nou leshipai ye khopoa laiyu hona hai thaoe?
Naotupai
Phobe phinou Enou neye soukai peiwure,
buh tehinou nepfü sü veashowure,
buh sühinou neye nyapeiyu paisü veashowure.
6Eye sü nevei lethou pei hi sheesao soua khaipeio,
alia ne baokao hinou shee ali soua khaipeio,
daiolouzü lesha hai athai büa khouwe,
sounüyu hai khüh büa pou shiwe.
Puhvei meikei hai-a mei vei meikei büe,
chachih shoyu meikei ali büa taowe.
7Lesha vei meikei nahai dzü alao lathouyuma souhi louhoe,
dzüdu hai-a puhye maolou hoe.
Mai tarali nou puhvei kini nou poa lesha ye hrülai toulouzü puhye sü mainou ngaora shoa bailai.
Naotupai proumai
8Etao hi nahle shoyu tupai ali bue,
alia honapai hai naonao-a titouli bai hie,
khemainah nou puhye ve koa bulouzü Etao daisou peilai?
9Honapai hai bouvo aliyu thaio,
Etao nou puh pei hi nou shahu nou soushu peilai,
mokhaia honapai hai kikhu aliyu thai-o,
puhye sü sedar sünou lukhao souloua dakha peilai.
Naotupai
10Esü bouvo alie,
alia anaonao hai kushoyu ki alie.
Aleshipuye koa bukhai-e Ale khayu ae kaonayu hai bue touyu puhnou süwe.
Poutuna
11Solomon hai Baal Hamon hinou darkha kipei bue,
puhvei darkha kipei sü kho-apei mai hi ngapeiwe;
mai ali nou puhye sü shahu thelili pove peiwe.
12Avei darkha kipei sü avei vuzü baie,
süsü la Eye donou baie;
Veo Solomon ye sü panou theli butheo,
alia rashi kipei kho-apei mai panou kraihai butheo.
13Oh Aleshipai, ne paisü Eye panou keio;
Avei samaitao-a ne paisü keinüa kho-a bure.
Naotupai
14Aleshipu, kaiveipou hrüyu deichi hinou tayu kho-shu ali büa mokhai-a nahleyu kho-lü ali büa ahi kou khaio.
Currently Selected:
SOLOMON VEI LOU 8: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
