SOLOMON VEI LOU 7
7
Poutuna
1Oh vemaipfü büa ngaveiyu pai,
ne phipha hai raidao phika nouyu phaki daizhouzhou ngaoveisa!
Ne nahke hai raishoyu mainou mutei chuh nou soukhai touyu büre.
2Ne poula hai thouhrü khaitouyu rashidzü teisa nou hakhai moyu pai ali büe.
Ne pou hai southou hinou lily poupa nou sühao khaitoua buyu büwe.
3Nevei naonao ahai hai shuhteuteu pa-a toukhai touyu büre,
alia kholü ahai buyu büre.
4Ne ngu hai praongi nou souyu ki aku ali büe,
Ne nghithou sü Heshbon hi dzübvütao Bathrabbim robomü peh hinou buyu büre.
Ne nghou sü Damaskas hilo zhuchopoa buyu Lebanon hi ki kuyu ali büe.
5Ne pei nou neye Karmel deichi büa vepeirü rüpeie,
alia nevei peishu shubo veih hai zaiyu sah aveih khana büre;
haina vei aveih sünou vemai ali koute-a nükhaiwu baie.
6Daizhou koute ne hai hüveisa, alia savade sarou;
Oh leshiyu napai, vashoyu naotupai!
7Ne hai nghabe ali büa lachü toue,
alia ne nao hai süna vei bo büre.
8Enou paoe, E nghabe na hi ngaopalai,
alia sühi botao hinou pa rashi sü hailai.
Oh! ne naonao ye sü panou darkhashi nou naoyu bütheo,
alia ne ssü hai panou phoshi kaivei büo.
9Alia nevei mümu apei nahai panou rashidzü veikayu büpeio.
Naotupai
Panou maohzüzüyu rashidzü nasü Aleshipu vei mütai ae huh hinou küpoa louwuo.
10Esü aleshipu veie,
alia puhvei jüpa nasü E baie.
11Khe, aleshipu ahai koa sühao talai,
alia rükounou ho zü bailai she.
12Koa darkha kipei hi zishoa nou talai khe,
alia darkhabe hai lahpa pamoyu zhulai,
darkha pa pahpa pamoyu zhulai,
ae vajüshithou be pah pamoyu zhulai.
Sühinou alesha sü E neye peilai.
13Kaivei shoyu mandrak kai hai ne nghia bailai,
alia ahai kikhu pei hisü touveiyu rashi tya teitei nou bue,
Enou neye peire donou ashutya ae kutya pokhai pei khaitoue, Oh aleshipu.
Currently Selected:
SOLOMON VEI LOU 7: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
