ISAIAH 1
1
1Judah hi veo Uzziah, Jotham, Ahaz ae Hezekiah mai haitao nou veo souyu phaki Amoz nahpoutu Isaiah hi Judah ae Jerusalem donou zho ngaoyutao sü haitao-e.
Ramai nou Puhvei Maitaoye Souveayu
2 Mapao nou paoe, “Oh raki ae deiphao, Enou paoyu sü kei pei khaio! Enou kiduso papei khaitouyu nahmaitao nou chuo Eye dutare. 3Kikhaorü louzü lah puletao vei paopuye süwe, alia rheisüh-a lah paopu nou to peiyu buh ngaowe. Ana Israel mai-o louzü sülou more, avei maitao hai tsü sükulou more.”
4Oh mah souyu tyahrü, vah ashi soua laiyu neletao hai daizhou koute vealaisa! Neletao vei mahmo nanou neletaoye sü paikhaowure! Neletao nou sheeyu Israel maivei Ramai Mapao ye malaiwure, ae neletao hai puh hinou tarei tare. 5Neletao daidonou puhye dupuwe? Daidonou neletao hai chua panou souveapu peiyu sü jüpawe? Nevei pei teitei nou zhimü khaibaire, ae nevei tsüle sü souloure. 6Nevei pei hinou poa phi hi koute hai veiyu ali-a hazei toure. Zhimü payu, soukao pfüyu ae zhe küpayu zhimü khaitoure. Zhimü taosü soushee loumoe, moa sah nou zülou moe, mokhaia darü-a thoulou more.
7Nevei nuh teidei khesü hazei toure, nevei nuhdu veishi sü mei nou dei hazeiwure. Ne nghoujü hinou nevei teidei sü shetumai nou poloure, alia soushi khaiwure. 8Jerusalem nuhdu likhei shokhaitoua bubaire, nuhdu sünasü darkha kipei hi repao ali büa ae rekou hi sahpao haobuyu ali büa duloure buh ali-a hazei toure. 9Khoukhoulai Mapao nou kamai-a panou hria phapei moyu thaio, Jerusalem nuhdu hai Sodom ae Gomorrah büa souhazei laire.
10Oh Jerusalem, nevei peikho maitao ae nevei mai hrülai hai Sodom ae Gomorrah hi mai büre. Mapao nou neletao hi paopeiyu chi khesü keilo, ae Eletao Ramai nou neletao hi paodou peiyu khesü leloua keilo. 11Mapao nou paoe, “Neletao nou natyatyali nou Eye pove sheela peilouzü E-a na sütao hai jüpa shulai tea neletao tsüchovu? Neletao nou zhaotu ae kikhaorü hübo veitya nou Eye meidei-a posheela peiyu sü khare. Ewo chode, zhaotu ae nghitu zhe khesü jüpa more. 12Neletao nou tave Eye thoyu phaki, thaonou neletao hi na haipaitya pove peio tea paopeige? Thaonou neletaoye avei Rathoki sü haibüa tainasasa peio tea paopeie? 13Hamako hinou Eye pove sheela peipu khaiso. Neletao nou poukai nüvei meidei-a Eye thoyu hai Ewo kai hüthoulou hore. Khouh Ashu Nüh nüyu, Soteithe reiyu alia maisou nou tave jüa buyu teitei sü Ewo zhu thoulou hore, daiolouzü sütao teitei hai neletao vei mah nou souzhai khaiwure. 14Neletao vei Khouh Ashu Nüh ae Sheeyu Khonüh khesü E ngaorae. Khonüh sütao hai Eye donou kou süre ae sütao pfüyu hai Eye donou vealere.
15“Neletao nou bah lapoa veachi paoyuma Enou zhu peilai moe. Neletao nou shusoua veachi alao paoyuma Enou keipeilai moe, daiolouzü neletao vei bah hisü zhe khai-a bubaie. 16Neletao lah soushee-a bulo, neletao hai anghingao hinou vah ashi souyu teitei sü thaokhai touwo. Vah ashi souyu nasü bailo, 17ae vah aveih souyu khesü doulo. Kaozü nasü soulo — mainou souvea souhoyu maiye soukha peio, pfüpuo hayu mai vei zü zhupeio, alia mimeapfüye vupeio.”
18 Mapao nou paoe, “Tavelo, Etao koa nou tsülou-a chi phazho laikhe. Neletao vei mah hai homara-a buyuma Enou vüra jünou soukaapu peilai, ae zhe büa hothou teiküa buyuma Enou phakaa büa soukaa peilai. 19Neletao nou süsü ae-ao tea achi zü louzü, neletao nou teidei hi pa-a buyu haveih khesü ngaotou loulai. 20Ana neletao nou khaitya-a Eye dulouzü, neletaoye sü souha bailai. Daiolouzü Mapao Enou haisü paopawure.”
Mah Souyu Nuhdu
21Raichokio louchelou veiyu nuhdu nasü chuo khakhapfü ali büre. Raichokio kaozü soua hrüyu ae acheche mainou phoutao-a buyu nuhdu nasü chuo maiye southayu mai khaitoure. 22Jerusalem, ne hai raichokio shahu büa bue, ana chuo huba datare; ne hai raichokio darkha zhaoh veitya büe, ana chuo dzü büre. 23Neletao vei süthai-apei maitao hai maishi tare, ae avao maiye koa samai khamai soutare. Puletao hai seihla züpa tare alia sapeina khesü thaihu tare. Puletao hai vearou nahtouye sü vupei more alia mimeapfütao nou paoyu chi sü keipei bare.
24Südonou chuo Khoukhoulai Mapao, Israel maivei khoushoyu Ramai nou haibüa paoyu sü keikhaio, “Eye ngaobayu maitao hisü khüngu phouta laire, ae neletao nou Eye souveapu laimore. 25Enou neletao pei hisü abah thaithou talaire. Enou neletaoye sü hu hai pothou meidei-a sousheeyu büa soushee peilai alia neletao hi sheemoyu veishi sü soushee peikhai touwulai. 26Enou neletao hisü raichoki büa peikhoyu mai ae paodou apei maiye sü peilai. Süthaisü Jerusalem hai chilee checheyu ae louche louveiyu nuhdu tea kulai.”
27Daiolouzü Mapao hai acheche nasüe, südonou puhnou Jerusalem nuhdu ae sühinou leda louyu mai hrülaiye sü vupa peilai. 28Ana puhnou mah souyu maitao ae puhye khaityayu maitao sü souhawulai; puhye malaiyu mai hrülaiye sü puhnou southawulai.
29Daiolouzü neletao hai süübe taoye thoyu donou alia jüpasho-a sheeyu kipei.#1.29 sheeyu kipei: Maikhe mainou puletao vei kipei hai tou-dzü ae thoudzü vei rah hi popeithou louzü, puletaoye rah sünanou shiha peilai tea louchewe. soulai tea dokupa khaitouyu donou hraongu ngaolai. 30Neletao hai süünghou raita-a kitayu phüsüübe büa thaita-a bailai, alia dzü züpei moyu kipei ali büa bailai. 31Rouvao hai meipa ali nou dei louyu büa khouchi shoyu maitaoye sü puletao vei vah ashi nanou lah souhawu bailai, ae mai linoua puletaoye sü vupa peilou laimoe.
Currently Selected:
ISAIAH 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
