SOLOMON VEI LOU 6
6
Naotu Maitao
1Ne leshipu sü kalao vetare,
Oh naotu maitao hrohinou hüvei kayu paire?
Ne leshipu hai ludu kalova vetare, Eh hi paopeio;
Etao-a neye koa puhye sü phou talai.
Naotupai
2Aleshipuwo puhvei kaiveipou buyu kipei hi hotare,
puhvei zhaokhome ye panou pou toure donou alia lily poupa khaire donou tare.
3Aleshipu hai aveie, ae E-a aleshipu veie.
Puhsü puhvei zhaokhome ye sa-a lily poupatao hrohinou pou daitouwe.
Lou Angouna
Poutuna
4Aleshipai, ne hai Tirzah büa hüveie,
Jerusalem büa ngaoveie,
sahra polaiyu reihmai büa ngaopi shoe.#6.4 Hebrew hi sheesha timoe.
5Ne nghithou ahinou phereita peio,
daiolouzü sünanou ale dairei baire.
Ne peishu hai Gilead deishao hinou nghitu khome ali nou takouyu büre.
6Ne huh hai dzü khüsha loua tapayu zhaokhome ali büa kaapha toure,
teitei nou papa buyu,
alikhei-a thaido moyu zhaokhome ali büre.
7Ne baitu hai touchü nou lyavai khaitouyu vajüshithou büa pahosah khevai nou nga veishoa bue.
8Veo ye sü panou vemaipfü rairou, khusoupfü raicha,
alia kilai maipfü chosha louho soua buwu!
9Ana Ewo mai alikhei leshi-a baie,
puhsü khao büa hüvei shoe.
Puh hai puhpfü vei nah naotu alikhei soua ae puh pfünou jüpakayu nah ali soue.
Kilai maipfü taonou puhye ngaoloua lesayu pai tea kuwe;
vemaipfüa ae khusoupfü tao-a puhye paoshowe.
10Teithe payu zhai büa buyu,
khouh büa hüveiyu, teinghi büa vaveiyu,#6.10 khou...teinghi büa vaveiyu; Hebrew hi sheesha moe.
reihmai nou sahra polaiyu büa ngaopi-a buyu hai nahai thaowe?
11Enou thaoye touyu zhure donou rashi kipei hi takoue,
deikho vei poupatao zhure donou,
darkhabe tao hai lahpa pamoyu zhure donou,
vajüshithou pa pahpa mosa touyu zhure donou.
12Enou sülou mojünou,
Eye hra-a buyu naotupai nou Eye sü rheiluki ali hi veo nahpoutu mai
ali büa pothou khaiwu baire.#6.12 Phoure 12 nahai Hebrew hi sheesha toumoe.
Naotu maitao
13Dakhai velo, dakhai velo, Oh Shulam naotumai nare,
Etao-a pa neye zhure donou khaivelo, khaivelo.
Naotupai
Neletao daisounou Eye reihme ahai nghoujü hinou hrosouyu zhulai touwe?
Currently Selected:
SOLOMON VEI LOU 6: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
