SOLOMON VEI LOU 5
5
Poutuna
1Atupai, aleshipai, avei kipei hisü E vere,
Enou avei kainüvei pou khesü pojülaire,
Enou voudzü sü avei voudzüpho koa nou toulai,
Enou rashidzü sü avei chonaodzü koa sho-e.
Naotupai
Toukhaio, Oh aleshipu, alia ke khaio;
lesha nasü nenou khamo koute ke khaio.
Lou Adai Chena
Naotupai
2E zütae, ana alesü kai-a bubaie.
Keikhaio! Aleshipu nou kikhu sü khou-a bure.
Poutuna
Eye kikhu houthou peio, atupai, aleshipai,
Avei khao, avei chahche paire;
daiolouzü apei sü vidzü nou chare,
apeishu-a khei vei dzü zaoyu vanou chare.
Naotupai
3Ewo asahnü phawure;
E kabüa süsü thoupulou khailai?
Aphi-a dzü khüwure,
E daisounou süsü nai napu khailai?
4Aleshipu nou kikhu hi puh bah thaithou deire,
ae ale khevai sü sayu nou phoukhare.
5E-a aleshipu ye sü kikhu houthou peilai tea tashue.
Abah sü kaiveipou nou naloue,
ae abah teutu hisü kainüvei pou nou naloua kou kikhu khukhai touyu nasü phapeie.
6Enou aleshipu ye sü kikhu houpeie,
ana aleshipu hai ta-a baire.
E puh vei pai choloua lülou hoa baire.
E puhye phouta-e, ana puhye ngaolou moe,
E puhye la-e, ana puhnou khüpei moe.
7Nuh khomai taonou nuh sühao zhutayu phaki,
puletao nou Eye ngaolou-a baire,
puletao nou Eye dapeie, puletao nou Eye zipeie;
romü khoyu maitao nou avei sahpu nasü soupha peia baire.
8Oh Jerusalem hi naotumai taore,
E neletao hi khowe,
neletao nou aleshipu ye ngaolouzü,
E lesha vanou sou-a bure tea puh hi paopeio.
Naotu Maitao
9Oh naotumai hrohinou hüvei khapaire,
ne leshipu hai mai kukhe mai leshipu jünou daie kouyu bue?
Ne leshipu hai mai kukhe vei leshipu jünou daie veipuyu bua ne
Etao hi puh daikinou bue touyu paopeio touwe?
Naotupai
10Aleshipuo hüvei shoe alia khouko-a bue;
puh hai mai thekirou hrohinou dopa khaitouyu mai alie.
11Puh pei hai veikayu sana-e;
puh peishu sü kheireireiwe,
ae teivayu lütei büwe.
12Puh nghithou hai chonaodzü hinou theasha loua dzünghou hinou pa dadou-a buyu rahouh büa hüveie.
13Puh baitu hai kainüvei papeiyu pou kaivei kipei büa veie.
Puh mütai hai kainüvei lily poupa dzü büe.
14Puh baokao sü sana nou ngasouthou khaitoua mutei chuh nou roukhai touyu büe,
puh pfüphao hai muteiyu paongi nou veishoa souho khaitouyu büe.
15Puh phi haisü sana nou beikhei soua albaster chuh nou shokhai touyu deka büe.
Puh zhurao hai Lebanon hi dopa khaitouyu sedar süübe kue.
16Puh chipao hai-a jühka-e,
alia puh hai hali-hala hinou lichekhai toue.
Aleshipu ae asamai nahai haibüe,
Oh Jerusalem hi naotu maitaore.
Currently Selected:
SOLOMON VEI LOU 5: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
