SOLOMON VEI LOU 4
4
Poutuna
1Aleshipai, ne hai daizhou koute hüveisa!
Ne nghithou sü pahosah khenou khao nghithou büa bue.
Ne peishu hai Gilead deishao hi takouyu nghitu khome ali büe.
2Ne huh hai zhaotu mai saiwua dzü khesha touloua tapayu büre,
alia teitei nou pa-pa buyu,
alikhei-a thaido moyu zhaokhome ali büre.
3Ne mütai hai homarayu phapo ali büa hüvei shore,
Ne baitu sü touchü hinou lyavai khaitouyu vajüshihithou büa pahosah khevai nou bue.
4Ne ngu hai David veo nou reihna khaibu soua kushoa soukhai touyu ki,
reih poa soure basei thethe khaiyu büre.#4.4 Hebrew hi sheesha moe.
5Ne nao ahai sü kho pfüna büre,
lily poupa hrohinou poutoua buyu shuh teutu ahai büre.
6Shona teikhai hümo koute,
ae khungu hatamo sasü Ewo kaivei pou deichü hi
alia kaivei theadzü deichi hisü bua bailai.
7Aleshipai, newo hali hala veikhai toua baie,
ne hiwo chaa taoyu ali-a hae.
8Enou nyalaiyu napaire, Eye koa Lebanon hinou ta-a baikhe!
Eye koa Lebanon hinou ta-a baio.
Kipeikhaodu alia shirakhao nou buyu buh Amana deichitao hinou,
Senir alia Hermon deichi hinou tavai talo.
9Nenou Alesü sousasho peiwure, atupai,
Enou nyalaiyu pfüpai,
Ne nghithou Eye bakhali zhupeiyu nanou,
alia nevei touh mutei chuh alinou Alesü sousa-vasho peiwure.
10Atupai, Enou nyalaiyu pai,
nevei lesha nahai daizhou koute jüh-e!
Nevei leshiyu nahai zhaoh jünou veipu shohie,
alia nevei kaiveipou hai kaiveipou kukhe jünou veipu shohie.
11Aleshipai, ne mütai hio voudzü buyu büe,
voudzü alia chonaodzü hai ne mali khehi buyu büre;
Nevei sahbanü hi kaivei hai Lebanon hi buyu kaiveipou tao bucheyu büre.
12Atupai, aleshipai,
ne hai bokha khaitouyu kipei ali büre,
khangi khaitouyu dzühla ali büe.
13Ne hai vajüshithou alia rashibe aveih tyanou doloua shokhai touyu kipei büre,
alia kainüvei henna ae nard paitya hrüyu kipei büe.
14Sühisü saffron, kalamus, ae sinnamon,
sütao koa kaiveipou ae kaivei theadzü,
kainüvei na matsütao teitei nou sühisü koa buche-e.
15Ne hai dzühla payu kipei-e;
hriyu dzükhao,
alia Lebanon deichi hinou kükouyu reitou alie.
Naotupai
16Kaishulo, Oh reilo teikhai,
alia tave-o, khelo teikhai!
Avei kipei hi ve hüpeio,
panou puhvei kainüvei nasü pfüa vakou raolai.
Aleshipu ye panou la puhvei peida hi vewo,
alia puhnou jüpayu rashi khesü ve touwuo.
Currently Selected:
SOLOMON VEI LOU 4: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
