SOLOMON VEI LOU 3
3
1Kheikou azüphao hinou,
ahrümai nou loua leshiyu puhye sü phoue;
E puhye phoue, ana ngaolou moe;
E puhye la-e, ana puhnou keala peimore.
2Chuo E tashu loua nuhdu hisü hotalai,
taho züdu alia kibvü kinou Aleshipu ye sü phoutalai.
Enou puhye phoue, ana puhye phou hare.
3Enou nuh sühao-a zhutayu phaki nuh khomai ye ngao-e,
Enou puletao hi noue, “Neletao aleshipu ye ngao homoe?”
4E puletao ye tacho poa takouyu phaki,
Ahrümai nou loua leshiyu aleshipu ye ngaoloue.
Enou puhye kholoure, alia puhye apfü ki hi salou loumo koute,
alia apfü nou Eye hrülouyu kide nahi salou loumo koute puhye Enou phapei laimoe.
5Oh Jerusalem hi naotu maitaore,
E neletao hinou khowe,
taveiyu kho-shu zhih hinou lesha naye lah puh jüpa souche loumo koute,
neletao nou puhye daishu moa daikailai moe tea chaachou soupeio.
Lou Asü chena
Naotupai
6Rükou nou meikhao vei deka büa pa-a buyu kaivei pou alia kaivei theadzü husoumai nou poa laiyu nahai daie?
7Zhukhaio, haihai Solomon vei vebue!
Süpehao hisü Israel maitao hrohinou khouko veishoyu khouko abu mai rairou laie.
8Puletao hrülai hai khoche poveiwe;
alia reih sousü mai khai touwe.
Kheikou ha ashi vepare dure donou puletao hrülai hai khoche pfükhai touwe.
9Veo Solomon ye kaopore buh nahai veikayu Lebanon hi vaosü nou soukhai toue.
10Süna vei deka khesü shahu nou soukhai toue,
phaovü nasü sana nou soue,
alia buh bure nahisü zaiyu sah nou khukhai toue,
süsü Jerusalem hi naotumai taonou hüvei shoa nga southou pei khaitoue.
11Oh Zion hi nah naotumai taore,
takou veo Solomon ye zhukhaio.
Puh hai puh pfünou puhvei shanghi souyu teithe,
puhvei asayu teithe hi rüpeiyu vepeirü nasü rüpoa laire.
Currently Selected:
SOLOMON VEI LOU 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
