SOLOMON VEI LOU 2
2
1Ewo Sharon hinou buyu rose poupa alie,
alia deikho hinou pahyu lily poupae.
Poutuna
2Aleshipai nou naotu maitao hrohinou buyu hai lily poupa alinou shube hrohinou buyu büa baie.
Naotupai
3Aleshipu nou nahle maitao hrohinou buyu hai Phobe linou vaohro hinou buyu büa baie,
Lesa shoa E puh khunghu khe hinou bue,
alia puhvei rashithou sü Eye donou touvei shoe.
4Puhnou Eye sa-a nünüyu ki hi save-e,
alia puhnou ape hinou lesha sah sü hrapae.
5Eye kikhai touyu darkha thou nou vaih peio,
alia phoshi nou ale souhrü peio;
daiolouzü lesha vanou Esü lelou hore.
6Oh, puhvei bah nalao nou apei khe thaithou,
alia puh bah zhoulao nou Eye khopeie.
7Oh Jerusalem hi buyu naotu maitao,
E neletao hi khowe,
taveiyu kho-shu zhih hinou:
lesha nahai lah puh jüpa souche loumo koute neletao nou puhye daishu moa daikailai moe tea chaachou soupeio.
Lou Ahaina
Naotupai
8Oh, A leshipu vei pai sü Enou choou-e!
Zhukhaio, puh sü laire,
deichi hinou chopo-a, deitao pei hinou kapoa laire.
9Aleshipu hai nahleyu kho-shu ali büe.
Zhukhaio, puhsü bouvo thailao nou lawe,
puhnou vabomü hinou phithouwe,
ki chayu hinou chozhua bue.
10Aleshiwo nou ahi paoe.
Poutuna
Tashulo, aleshipai,
avei jüpapai, tapalo;
11daiolouzü zhukhaio, chuo teisai sü latare, teiro sü chere alia tare.
12Poupa khesü pahpare,
lou souyu teile sü laire,
Chingu paisü Etao teidei hi chou-a bure.
13Doube nou doushithou shikoure,
alia darkhabe taosü pah pare;
puhtao nou kai veihsü peipare,
tashulo, aleshipai, avei hüveipai, tapalo.
14Ne hai lya qulu hinou tuchüa buyu khrao büre,
Oh aleshipai, Eye pa nepa ngaowuo,
Eye pa nepai chouwuo,
daiolouzü nepai sü keivei shoe,
alia ne pasü ngaovei shoe.
15Darkha kipei ve soushi-a buyu lakhaotao,
Lakhao taitya Eye nüpeio,
daiolouzü Ahai vei kipei hisü darkha pah papha-a bure.
Naotupai
16Aleshipu sü aveie, alia Esü puh veie,
puhnou puhvei zhaokhome sü lily poupatao hrohinou pa poutouwe
17Shona teikhai hümo koute alia khungu hatamo koute.
Aleshipu, nahleyu kho-shu alinou Bether deichi#2.17 Bether deichi; moa hishiyu deichütao hinou tayu büa ahi dakhai vepeio.
Currently Selected:
SOLOMON VEI LOU 2: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
