SOLOMON VEI LOU 1
1
1Loutao vei Lou, haitao hai Solomon vei lou-e.#1.1 Solomon vei lou-e; moa Solomon vanou souyu lou-e, moa Solomon hi peithou khaitouyu lou-e.
Lou Araina
Naotupai
2Nenou Eye ne mümu nanou mütei peio!
Daiolouzü ne lesha hai zhaoh jünou veipue,
3nenou noupeiyu theadzü taosü kainü veishoe,
ne zhih sü lapa khaitouyu kainüvei theadzüe;
südonou naotu maitao nou neye leshiwe.
4Eye ne thailao paikoulo,
ahai koa thashoa ta-a bailai she.
Ne avei veo soulo alia Eye ne kidü hi salou khailo.
Ahai koa vashoa nou asalai,
Etao nou asah soua ne leshaye zhaoh jünou pua paosholai;
kaotou-a puletao nou neye leshiwe.
5Oh Jerusalem hi nah naotu maitaore,
Ewo teishowe ana#1.5 ana; moa alia. hüvei showe,
Kedar sahpao büa tei-e, ana Solomon vei haosah büa hüveie.
6Eye sou teiwe tea ngaophou moa zhutei tiso,
daivanou touyuo teinghi nou Eye phuh thewure.
Apfü vei nahpoututao sü apei hi rarouwe,
puhtao nou Eye darkha kipei khonapai pa soue;
ana lah avei kipei sü Enou kholou moe!
7Ahi paopeio, ahrümai nou loua leshiyu nare,
nevei zhaokhome pa daiki nou pou toulai,
daikinou pa heako kouh dazüa bulaige?
Daisounou Eye panou zhaokhome kukhe hinou neye phou-a laiwe?#1.7 Phoure 7 nahai Hebrew hi sheesha moe.
Poutuna
8Oh naotu maitao hrohinou hüvei khapai,
Nenou avei buh sümolouzü,
zhaokhome vei bosü fülo,
alia ne zhaotu tyoututao sü zhaokhowo vei sahpao pe hinou pa poutoulo.
9Aleshi pai, ne hai Pharaoh vei rheiluki pfüyu rheilou ali büa maiye souva peiwe.
10Ne baiva zaokouyu zhusanatao hai daizhou koute ngaoveisa,
ne ngu hi mutei chuh raizaotao toupfüa laiyu hai daizhou koute hüveisa!
11Etao nou neye sana nou tou soupeilai,
alia shahu nou zhusanatao sou peilai.
Naotupai
12Veo nou züphao hi dazüyu phaki,
avei poukaivei na kainüvei sü phapeie.
13Aleshiwo nou anao ahaiko hi buyu phaki,
poukaivei myrrh bvü nahai ahi buyu büwe.
14Aleshiwo hai Engedi kipei hinou kainü veishoa pahyu henna poupa büe.
Poutuna
15Oh aleshipai, ne hai daizhou koute hüveisa,
ne nghithou haisü khao nghithou büe!
Naotupai
16Oh aleshipu, ne-a daizhou koute hüveisa,
cheche vujünou ne hai mainü hrüe.
poudai sünou ahai vei züphao soulai;
17ahai vei ki deka khesü sedar süünou soulai,
ahai vei kivo sü haosü nou khalai.
Currently Selected:
SOLOMON VEI LOU 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
