KOPAODOUWO 12
12
1Ashi teithetao vemo jünou, alia nenou “E savayu hare,” teanou paolaiyu poteitao nghivemo jünou, neye Sou-apeio ye sü ne nahle-a bukinou licholo. 2Khouh teinghi ae ava, alia teivuh haitao zhitamo jünou alia teihao nou teiro thai khaivemo jünou; 3ki khoyu mainou pinguyu teithe vemo jünou, alia khouchiyu maitaoye rashayu, alia thou saoyu naotu taonou mai chileyu donou saomoa baimo jünou, alia vabomü hinou zhupayu phaki rara-a ngaotamo jünou, 4kijüdu hi kikhutao khumo jünou, alia thousaoyu kho choulouho tamo jünou, alia raohou rayu süloua tashuyu phaki, alia lou souyu nahnaotutao pai khosü khaitamo jünou; 5aku buhtaoye pitamo jünou, alia ngaopiyu nou ludu hi bumo jünou; khuhshibe nou pahpa mojünou, alia khahzü nou chopa mojünou ae jüpa hatamo jünou; daiolouzü mai hai teisa puletao vei ki hi veta bailai, alia dongai pfüyu mainou jüdu hinou talai. 6Shahu rai detamo jünou, moa sana khaosao petamo jünou, moa likhou hai dzühou hinou petamo jünou, moa lukiphi hai dzübvü hinou petamo jünou, 7alia naihü hai lezhai soua dei hi dakhai tamo jünou, alia rako hai peiyu paopu Ramai hi khaitamo jünou neye sou-apeio ye sü ne nahle-a bukinou licholo.
8Hamako vei hamako baie tea Kopaodouwo nou paoe; teitei hai hako baie.
9Tsüveiyu bai moa nou, Kopaodouwo nou maikhe maiye tsüsüa doupeie, sühdouyu ae tsüphouyu alia soutaosou tsüchi zekoyu hai-a doupeie. 10Kopaodouwo nou keivei shoyu lako phou-e, puhnou maiche-a cheche hinou rüe. 11Tsüvei maivei chipao hai chokhaorü khoyu maivei süda büe, alia hushu veachü tukhaiyu li büa zhaokho mai livei chipao pojü khaitiyu hai.
12Anahna, haitao jünou latayu hatali vanou leikeilo. Larübvü popayu hai akhai hae, alia alaosou tsüphouyu hai pfüzoye donou veayu alie.
13Haina vei akhai soua; teitei sü chouloure. Ramai ye ngaopilo, alia puhvei kharochi zülo; daiolouzü haina hai mai hrülai nou souzüyu vah-e. 14Daiolouzü Ramai nou haso teitei hai chikuyu hisü pothoulai, khei-a nou soukhai tiyu vah pfüphou nou, veiyuma shiyuma chikuyu hisü popa thouvu zülai.
Currently Selected:
KOPAODOUWO 12: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
