RUTH 4
4
Boaz nou Ruth ye Nahlouyu
1Boaz nou nuh mainou chikuyu robomü hisü ve buloure, alia Boaz nou paoyu Elimelech kityarai tao-a sühisü ve bure. Süthai Boaz nou puletao yesü kure, “Asamai taore, hailo kou bulouo.” 2Alia puhnou nuh hi tsüsoua buyu mai kirou kuloua, “Haihi kouh bulouo” teanou paoe. Puhnou kuyu thaifüa puletao nou sühisü kouhbu loure. 3Süthai puhnou kityarai taohi paoe, “Moab mai teidei hinou dakhai veyu Naomi nou chuo puhvei ludou nasü Elimelech tyaraitao hi zonüa bure. 4Südonou Enou neletao hi paongaolai teanou cho-a buyu nasü veloua buyu maitao alia nuh hi tsüsoua buyu maitao nghoujünou süsü hülouo teanou paowe. Neletao nou süsü hüloulai toulouzü hrü dakhailouo; ana hülouhoe toulouzü, Ahi paopeio, süsü nenou hülai moe toulouzü nethai mai kukhe hae, E moa nou.”
Süthai puhnou paoe, “Süsü Enou hüdakhai loulai.”
5Süthaisü Boaz nou paoe, “Nenou Naomi vei dei hülouyu teithe nou, meamai pfü soua buyu paiye sü panou thaitayu mai zhih kuhriloure donou Moab pfüpai Ruth noupu koa süsü hüdakhailai.”
6Süthaisü kaa ngaozüa buyu nanou paoe, “Sünahaio Eye donou hüdakhailou hore, daiolouzü avei kaalo-a koa nou hashulai. Enou ngaozü doua buyu kaa nasü ne polouo, daiolouzü E hai süna hüdakhai louhore.”
7Na hülaiyuma mokhai lealaiyuma daorai kinou Israel mainou haibüa souyu zhai bue, hüloure mokhaia lealoure touyu shee soure donou puh phikha phaloua mai hi peiyu thaie. Sübüa Israel mainou süna hai sousheewure touyu shee souyu bue.
8Südonou kaa thaozüa buyu nanou Boaz hi “Nenou sünasü hüloua baio” teanou paowua puh phikhasü phapeiwure. 9Süthaisü Boaz nou tsümai taohi alia mai hrülai hisü paoe, “Neletao hrülainou Enou zhou Naomi hinou Elimelech vei na teitei, alia Chilion ae Mahlon vei kaa teitei hüloure touyu shakidao. 10Alia Mahlon khapfü Ruth, Moab meamaipfü paia akhapfü soure donou Enou hülure dao, süsü panou thaimai kikha maivei natao alia puletao zhih hamoa nuh mai hi puh zhih sü panou buloure donoue. Sühai neletao nou zhou lahpeire dao.”
11Süthaisü sühi buyu tsümaitao ae mai hrülai nou paoe, Ovai Etaonou süsü lapeiwe. Mapao ye panou ne khapfü soure napai hisü Israel maiye soushu peiyu Jakob ye nahmai taoli hrüpeiyu Rachel ae Leah büloutheo. Neye panou Ephrathah hinou hangia hrütheo alia Bethlehem hinou zhih tayu maili souloutheo. 12Nahle pfüpai va hinou Mapao nou neye peire nahmaitao yesü panou Judah ae Tamor nahpoutu Perez kihikhamai büa souloutheo.
Boaz alia Puhvei Tyaonahtao
13Südonou Boaz nou Ruth yesü saloure alia puh khapfü soure; Mapao nou honapaiye sü hapeie, südonou honapainou poupfüloua nahpoutu ali naloue. 14Süthaisü nuh hi naotu maitao nou Naomi hisü paoe, “Mapao ye sholouo! Puhnou zhou neye kipeire donou tyaotou ali peie. Puhye panou Israel mai hi zhih tayu maili souloutheo. 15Ne mou nou neye leshiyu hai nahpoutu mai anai jünoua koupu hie. Alia honapai nou zhou neye donou nahpoutu ali naloure, alia ne tsüpayu phaki puhnou neye kiko peilai.” 16Süthaisü Naomi nou nahpoutuye daopoloua nou pokhe puh khao hisü khailoue,#4.16 nahpoutuye daopoloua nou pokhe puh khao hisü khailoue; moa nahpoutu naye sü puhnou saloure. alia puhvei nasa soure.
17Puh kinapamai pfütaonou puh zhih sü sapeie, alia “Naomi nou nahpoutu ali naloure” teanou paopeie. Puletao nou puh zhih hai Obed teanou sapeie; puh hai Jesse puo-e, alia Jesse nou David puoe.
18Perez tyaonatao hai haitaoe: Perez hai Hezron puoe, 19Hezron hai Ram puoe, Ram nou Amminadab puoe, 20Ammi-nadab nou Nahshon puoe, Nahshon nou Salmon puoe, 21Salmon nou Boaz puoe, Boaz nou Obed puoe, 22Obed nou Jesse puoe, alia Jesse nou David puoe.
Currently Selected:
RUTH 4: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.