1 SAMUEL 1
1
Elkanah alia Puhvei Kikhamai
1Ephraim maivei deichi hinou nuhdu ali Ramah tea bue. Sühisü Elkanah tea kuyu maipou ali hrüe. Puh hai Ephraim mai khü hinou hrüveyu Zuph vei pfümounah-e. Puh sü Jeroham nahpoutue alia Elihu tyao-e. 2Elkanah hai maipfü ahai bue, puhai zhih nou Hannah ae Peninnah touwe. Peninnah hai nahmai bue, ana Hannah hai nahmai hae. 3Po patsü Elkanah hai puhnou buyu nuhdu hinou rathore donou ae Khoukhoulai Mapao hi posheelare donou Eli ae puhvei nahpoutu ahai, Hophni ae Phinehas nou Mapao vei napao soua buyu Shiloh nuhdu hisü tawe. 4Elkanah nou posheela peiyu tsü sü puhnou sou zha ali hai Peninnah ye peiwe, ae puhvei nahmai ahai hi-a zha chükhei peiwe. 5Puhnou Hannah ye leshi sho-a buyuma honapaiye sou zha alikhei peia baiwe, daiolouzü Mapao nou honapaiye sü panou nahmai hrümore. 6Mapao nou honapaiye panou nahmai hrümoyu donou honapaiye ngaoba-a buyu Peninnah nou puhye jünüa ngaophou moyu vah khesü soupeia baiwe. 7Po taoli hai, puletao nou Mapao vei ki hi veyu tsü sü Peninnah nou Hannah ye lesouvea peia baiwe, südonou Hannah nou ha touba-a kra-a bue. 8Puh khapu Elkannah nou honapai hi noue, “Hannah, ne daisounou kra bue? Ne daisounou ha toubawe? Ne daisounou leveawe? E nahpoutu mai kirou buyu jünoua neye kopu hi mowu?”
Hannah ae Eli
9-10Vuli puletao nou Shiloh hi buyu Mapao vei ki hinou hatou louyu thai, Hannah nou kushuloua levea shopoa Mapao hinou kra-a veachi paoe. Süphaki napao Eli hai lah puhnou teisa nou buyu kikhu phi hinou bue. 11Hannah nou chaachou soua haibüa veachi paoe, “Oh Khoukhoulai Mapaowo, ne kilaipai Eye zhupeio! Enou veahoyu hai sü zhuloua Eye ngaipeiso! Nenou Eye nahpoutu ali peilouzü, Enou puhye sü poa neye puhvei hrümai teitei nou peilai, ae puh peishu sü panou bi khailai moe.”#1.11 puh peishu sü panou bi khailai moe: Hrümamai nou Mapao hi peithouwure touyu vei shee soungaowe.
12Hannah nou Mapao hi teile sholi veachi pao-a buyu sü Eli nou zhua nou bue. 13Honapai nou pai pamoa lekhe hinou mü lüa veachi pao-a bue. Eli nou süsü ngaolou khaie, honapai hai zhaoh sozhi phare tea poloure. 14Südonou Eli nou honapai hi paoe, “Ne teile kasho zhaoh sozhi-a bulaige? Ne zhaoh sopu khaiso.”
15Ana Hannah nou puh hi chila peie, “Moe, apaopuwo, E zhaoh sozhi moe, E hai veashoa buyu naotumai ali baie. E zhaoh sokhai moe, ana Enou avei veahoyu sü Mapao hi pao-a bubaie. 16Eye naotu ashi mai aliye tea chopeiso, daiolouzü Enou veaho shoyu donou haibüa veachi pao-a bubaie.”
17Süthaisü Eli nou paoe, “Kaonayu sü ngaolou theo, ae nenou khoyu nasü Israel maivei Ramai ye panou peiyu sü soulou theo.”
18Hannah nou napao Eli hi chila peie, “Ne kilai pfüpaiye ne hinou teisa panou zhuvea leshiyu sü ngaolo.” Süthaisü honapai nou buh sühinou tare, ae taho ha phoutou loure, alia leveapu more.
Samuel ye Nalouyu ae Mapao hi Popeiyu
19Thainesho shona sü Elkanah ae puhvei kihikha maitao nou kushuloua Mapao ye tholoua lah puletao vei Ramah nuhdu hisü dakhai tare. Süzhou khei Elkanah nou puh chapfü Hannah ye koa züe, ae Mapao nou honapai vei veachi sü noupeiwure. 20Südonou honapai nou pou pfüloua nahpoutu ali naloure. Honapai nou puh zhih sü Samuel#1.20 samuel: Hebrew maila hinou “samuel” touyu hai “Ramai vei Zhih” touwe, ana hai haio “kholouyu” touwe. tea sapeie, daiolouzü honapai nou haibüa paoe, “Enou puhye sü Mapao hinou kholoue.”
21Elkanah ae puhvei kihikhamai nou Shiloh hi taho po patsü Mapao ye tho-a posheela peire teile sü vere. 22Ana zhouvu hai Hannah nou tamore, daiolouzü honapai nou puh chapu hisü haibüa paoe, “Nahtou nanou nao phalouzü Enou puhye saloua Mapao vei ki hi save peilai, ae puhye panou teisa sühinou puhvei kuvah soua bulai.”
23Elkanah nou chila peie, “Nenou veilai tea tsüchoyu nasü soulo, puhnou naonao phamo koute sü ne hi ko-a buwo. Mapao panou nevei chaachou soukhai touyu nasü vete louyu sü soulou theo.” Südonou Hannah hai Shiloh hi tamoa nahtou naye zhua ki hinou bure.
24Honapai nou puhye nao khoyu thai, puhye sa-a po asü payu chode ali, southou sühcho kirou ae darkha zhaoh souhee lekha ali pfüloua Shiloh hi buyu Mapao vei rathoki ki hisü tare. Süphaki Samuel hai nasho hie. 25Süthaisü puletao nou chode nasü dathaloua posheela peia nahtou naye sü Eli hi save peie. 26Ae honapai nou Eli hi paoe, “Oh apaopuwo, E buh hai hinou Mapao hi veachi pao-a buyu naotupai nasü E-e, ne Eye taiho taimosa! 27Enou nah hainaye donou puh hi veachi paoe, ae puhnou avei veachi sü noupeia Eye nahpoutu haina hai peie. 28Südonou chuo Enou nahpoutu hainaye sü Mapao hi popeiwe. Puhye panou hria bukisa sü Mapao vei kuvah panou soulai.”
Süthaisü puletao nou Mapao ye buh sühinou tho-e.
Currently Selected:
1 SAMUEL 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
