RUTH 3
3
Ruth nou Cha Ngaolouyu
1Süthaisü honapai nai Naomi nou puh hi paoe, “Anahpaire, E neye panou nghire donou tsüchomoa bailaiwu, mokhaia panou vasa-a buloure ki phoumoa baikhai laiwu? 2Neye koa vah souyu naotu taovei paopu, Boaz hai Eh tyarai mai movu? Zhoukhei puhnou vakhai touyu chathai hi bulai, 3südonou dzükhüloua nou theadzü nalouo, alia sabanü veihnou nouloua nou puhvei chathai hisü tawo, ana puhnou vah souche loua touso tou cheloumo koute neye pa ngaolousouo. 4Puhnou zütayu thai, puh daikinou züe touyu zhuloua nou puh phi hi kouh zülouo; süthai puhnou ne hi daie souwo touyu paopeilai.”
5Süthai honapai nou chila peie, “Nenou paoyu teitei Enou sübüa soulai.”
6Südonou honapai nou thai hisü hotare alia puh nai Noami nou paopeiyu büa souwe. 7Boaz nou vah souchewua tou-so touchelouyu thai, puhnou vashoa routhou pokojü khaitouyu kikaili hinou zütare. Süthai honapai nou kaokaosoua talou sasü hrapaloua puh phi hinou zütare. 8Khei touchü kouyu phaki puhnou alilova dapakhaie, puhnou naotumai ali puh phi hinou züa buyu sü ngaoloure. 9Puhnou noue, “Ne thaowe?”
Hounapai nou chila peie, “E ne kilaipai Ruth-e; zhuvea nou ne sah kainghou tinou ne kilaipai-a hopeio, daiolouzü Eye zhupeire akityarai sü ne baie.” 10Süthai puhnou paoe, “Mapao panou neye hapeiyu sü souloutheo, anah paire; nenou raiki jünoua kihikhamai lihie souzü vah hai soupuwure, daiolouzü nenou nahle maiye phoutare phasü phoumoe. 11Südonou chuo, anah paire, ngaopisouo, Enou neyesü nenou khoyu teitei soupeilai, daiolouzü nuhdu haihi buyu mai hrülai nou ne hai koyu naotu alie touyu süwe. 12E hai ne tyamaie touyu hai cheche-e, ana A jünou hipuyu kityarai mai buhie. 13Südonou zhoukhei haihi bulouo, alia dosho shonanou, puhnou kityarai mai lihie souzü vah sü ne hi soupeilai toulouzü veire, panou puhye sü souwo; ana puhnou kityarai lihie souzü vah sü soulou hore toulouzü, süthainou, Mapao hai hriyu thaifüa, Enou souzü vah nasü neye donou soupeilai. Teithemo koute haihi nou züo.”
14Südonou honapai nou puh phi hinou teithemo koute züe, ana teitherara payu phaki, maizhu shilou hoa bukinou honapai nou kushuloure, alia puhnou paoe, “Maiye panou thai haihi naotumai vewe touyu sülousouo.” 15Alia puhnou paoe, “Nenou bayu sah nahai haihi pokou jokhaio.” Honapai nou puh sahsü pokou joloue, ae puhnou shithou bo arou phali honapaiye thoupeie, süthaisü honapai nou nuh hisü vetare. 16Honapainou kihi velouyu thai, puh nai nou noue, “Anah paire, nenou tayusü kabüe?”
Süthai honapai nou kabüa puh hi soupeiyu teitei hai puh nai hisü paoe. 17Haihi buyu shithou bo arou phali puhnou Eye thoupeie, alia puhnou haibüa paoe, “Ne bah sa-a ne nai hisü dakhai veyu kaomoe!”
18Puh nai nou chila peie, “Anahpai, daie palai touyu ne khoa buwo, daiolouzü puhnou haihai soushee cheloumo koute ngasoua bulai moe.”
Currently Selected:
RUTH 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.