ROMMAI 15

Lah Neye moa Kukhemai Züpa Soulo

1Lü hinou khoua buyu Eletao nou lah Eletao züpa soumoa lülou hoyu puletao vei kou pfükhayu kaoe. 2Eletao hrülainou Eletao kinapaye lü hilonou soudupa peiloure donou lah puletao vei avei donou le sousa peilai. 3Daiolouzü Khrista-a lahye le sousa moe; ana haibüa rüthouyu kue, “Nehi sou ahrao peiyu laikhai khaitouyu sü Apei hi dekoure.” 4Daiolouzü sheeyu larübvü nou Eletao hi peikhai touyu shameayu ea le soudu peiyu vanou Eletao nou reitei-a buloure donou daoraikinou rüthoukhai touyu teitei sü Eletaoye doupeire donou rüthoukhai toue. 5Alia shameayu ea le soudupeiyu vei Ramai nou neletao hi Khrista Jisu vei zhai hinou alinou liye koa kaona-a hrüloure sü peiloutheo. 6Sübüa neletao hrülainou koa paili soua Eletao Mapao Jisu Khrista vei Ramai ea Puoye sü paosholai.

Tahrüh Kukhemai donou Ko Avei

7Südonou, Ramai adusho panou paoloure donou Khrista nou neletaoye popeiyu kua neletao-a alinou liye sasa-a popeio. 8Daiolouzü Enou neletao hi paowe süolouzü puopaomai taohi apaopei khaitouyu süsü soutsü loure donou Ramai hai chechewe touyu pongao loure Khrista nou hee rodeyu maitao vei kuvahmai souloure, 9alia sübüa tahrüh kukhemai taonou Ramaiye puh vei zhuvea vanou paosho loulai. Haisü sheeyu larübvü nou paoyu büe,

“Südonou Enou neye tahrüh kukhemai hrohinou paosholai;

Enou nehi shoyu lou soulai.”

10Alia haibüa paopu khaitoue,

“Tahrüh kukhe maitao,

Ramai vei maitaoye koa salo!”

11Süthaia haibüa paoe,

“Tahrüh kukhe hrülainou

Mapaoye sholo;

Mai hrülainou puhye sholo!”

12Alia Isaiah nou paopue,

“Jesse vei tyaonah ali velai;

puhnou tave tahrüh kukhe maiye kha-sahrülai,

alia puletao nou puh hinou rei-a bulai.”

13Areih dzüla vei Ramai nou Rako Mashi vei khouko vanou neletao vei areih nasü panou thaokhaimoa dupa loure donou neletao vei lülouche-a buyu hisü sayu ea kaonayu pfüphounou thouphou peiyu souloukhaio.

Paul nou Khuveia Rüyu Qo

14Athaihou jürai khemai, lah Enou sütoua bue süolouzü neletao hai aveinou phoupeia ea tsü teiteinou phoua bue, alia neletao sü alinou liye doupei lousüa bue. 15Ana chiko daotu vanou neletaoye panou licholoure donou Enou neletao hi khuveishoa rüe; Enou khuveiyu haiwo louzü Ramai nou Ahi puhvei zhuvea peikhaitoua 16panou tahrüh kukhe maitao donou vah souloure Khrista Jisu vei kuvahmai ali soupeiyu donoue. Sübüa tahrüh kukhe maitao hai Rako Mashi nou soushee peiyu Ramai nou polouveiyu popeiyu na ali souloure donou Enou Ramai hinou veyu Ko Avei nasü paodoua napaomai alikua kuvah soue. 17Südonou, Khrista Jisu ye koa ali soulouyu hinou Enou Ramaiye donou souyu Avah vanou kathe paolou süe. 18Enou khuveia bulai ea Khrista nou tahrüh kukhe maitaoye panou Ramai chi züre donou süthou peiloure Avanou dai soupeiresa touyu likheithe Enou paobailai. Haisü puhnou chipao ea vah vanou soupeire, 19alia haisü shee ea khupa vah ea Ramai Rako khouko vanou souloure. Alia haibüa Jerusalem hinou Illurikam hi koute taveyu veihdu hisü Enou Khrista vanou Ko Avei nasü soutaosoua paodoue. 20Avei acho nawo louzü, mai kukhe alinou soushupa khaitouyu kifü süna hinou soupapu more donou, Khrista zhih choukhai moyu buhtao hinou Ko Avei paodouyu süsüe. 21Haisü sheeyu larübvü nou paoyu kue,

“Puh vanou paongao peikhai moyu puletao nou ngaolai,

alia puh vanou choukhai moyu puletao nou sülai.”

Paul nou Rom hi Tave Zhure donou Soudayu

22Alia qo haina vanou Eye neletao hi vere hinou lüh taoli nuchaore. 23Alia chuo deizha hailova hisü Enou soure Avah sü souche louyu donou ea po haizhozhou doukoua Enou neletao hi taveloua neletaoye tave zhuyu sü züpa shoyu donou, 24Enou chuo sübüa soulaire tea rei-a bure. Enou Spain hi tayu Avei veihdu hinou neletaoye tave zhunüwe, alia neletaoye tave zhuloua phajü koa sazho louyu thaisü buh sühi vere donou panou neletaoye sapao peilai. 25Ana chu bühio louzü lülouyu thaihou jürai maitao donou soukhavei sapeina pove peiloure Esü Jerusalem hi talai. 26Daiolouzü Makedonia ea Akhaia hi lüloumaime taonou Jerusalem hi buyu lüloumaitao hronou toure hayu maitaoye soukhare donou sa-a thou-sha khapeire le laloure. 27Haibüa souyu sü puletao nou züpa loure, alia chechenou haisü puletao nou souzüe; daiolouzü Jihudimai taonou puletao vei rako hilovei ha nasü koa tahrüh kukhe maiye zha ngaozho louyu donou, tahrüh kukhe maitao-a puletao pfüphao hilovei ha nasü koa Jihudimaiye zha ngaozhoa soukha peizüe. 28Südonou Enou vah haina soucheyu kisü ea puletaoye donou khadzükhai touyu pousha teitei hai puletao bah hi thoupei cheyu kisü, Esü Spain hi talai ea sühi vere ludu hinou neletaoye tave zhulai. 29Enou neletao hi veyu kisü, Esü Khrista vei hanou phoutsüpoa veshulai touyu sü süwe.

30Athaihou jürai khemai, Eletao Mapao Jisu Khrista vanou ea Rakonou peikhai touyu leshi süna vanou Enou neletao hi khowe: Eye koa lenoushoa Ramai hinou Eye donou veachi paopeikhaio. 31Judea hi buyu lüloumomaitao bah hinou Eye khailu papei loure donou ea Jerusalem donou soua buyu Avei kuvah sü sühi sheeyumai taonou popei loure donou veachi paopeikhaio. 32Alia sübüa Ramai vei leli hinou Esü lesayu nou phoutsüpfüa neletao hi velai, ea Eletao koa alinou liye daoa sazholai. 33Alia chuo kaonayu vei Ramai nou neletao hrülaiye koa buyu sü souloutheo. Amen.

Currently Selected:

ROMMAI 15: POUMBSI

Highlight

Copy