ROMMAI 14

Ne Thaihou Jüraiye Chikuso

1Lü hinou lülouhoa buyu puhye sü neletao nou sasa-a popeio, ana lah puhvei li-choyu vanou neletao nou veivawuso. 2Daiolouzü mailinou hatali toua veie tea louchewe, ana lü hinou lelou hoyu puhnou vu-pou likheithe toubaiwe. 3Hatali touyu puhnou toumoyu puhye sü ngaorawuso; alia vu-pou likhei toubaiyu puhnou-a hatali touyu puh pei hi sü chikuwuso, daiolouzü Ramai nou puhye sü popeire. 4Mai kukhe alivei kilaiye chikuyu ne sü thaoh-e? Puh hai laloue moa kaotare touyu chi kupeire sü lah puhvei paopunou bailai. Alia puhnou laloulai, daiolouzü Ramai nou puhye sü soula peilousüe.

5Mailinou teithe alinou kukhe teitheli jünou veikou hie tea chowe, mai kukhe alinou teithe pfüphou hai zho khaibaie tea chowe. Maili linou lah lahvei le hinou sheetoua lalouyu souloukhaio. 6Teitheli ku-a reiyu puhnou süsü Mapaoye tsükhoua reiwe; hatali toua buyu puhnou süsü Mapaoye tsükhoua toubaie, daiolouzü touso süna donou puhnou Ramai hi kalo paowe. Touso kamai toumoyu puhnou süsü Mapaoye tsükhoua toumobaie, alia puhnou süvanou Ramai hi kalo paowe. 7Eletao maitalinoua lah puhye donou likhei hrübai moe, alia Eletao maitalia lah puhye donou likhei thaibai moe. 8Eletao nou hrilouzü, haisü Mapaoye donou hribaie ea Eletao nou thailouzü, haisü Mapaoye donou thaibaie. Südonou Eletao sü thai-a hri-a Mapao veibaie. 9Südonou Khrista nou thaimai ea hrimai ahai pei hi Mapao souloure donou puhnou thai-a thaipeire ea hria hrida shuloure. 10Südonou vu-pou likhei toubaiyu ne daidonou ne thaihou jürai pei hi chikuwe? Alia hatali touyupu ne daidonou ne thaihou jüraiye ngaorawe? Daiolouzü Eletao hrülai hai Ramaiye panou chikure donou puhvei chikuyubuh nghojünou lalai. 11Daiolouzü sheeyu larübvü nou paoe,

“Mapaowo nou paoe, Enou hriyu donou,

mai hrülainou Anghojünou kou khou khülai,

alia mali pfüphounou Ramaiye paosholai.”

12Südonou Eletao hrülainou lah lah vei pa-louchi hai Ramai hi peilai.

Thaihou Jüraiye panou Phi Süwuso

13Südonou Eletao nou alinou liye chi kupu khailai mokhe, ana nenou hakia ne thaihou jüraiye panou phi süloure moa mah hi kaodu louloure hatalia soukhai laimoe touyu hisü le latoulo. 14Enou Mapao Jisu ye koa ali soulouyu hinou sütoua bue süolouzü touso talia süna vuzü hisü sheemoyu lia hae; ana maita linou touso kamai hai sheemoe tea louche louzü, süthaisü süsü puhye donou sheemo tare. 15Nenou touyu süna vanou, ne thaihou jüraiye le souveawu louzü, süthaisü leshi hinou nehai vah soukhai more. Nenou toua buyu touso sünanou Khrista nou puhye donou thaipeiyu mai sünaye souhawuso! 16Südonou neletao nou veie tea poyu nasü panou paoshiwuso. 17Daiolouzü Ramai Vedei hai ha tou-sho loure nali moe, ana acheche, kaonayu ea Rako Mashi hinou sayu süna süe. 18Alia haibüa maita linou Khrista kuvah souyu kisü, puhnou Ramai züpa souwe ea mai kukhenou ae-ao tea popeiwe.

19Südonou Eletao nou kaonayu pove loure ea alinou liye soutsü peiloure hi soukha peiyu na sütaoye zhia bulaikhe. 20Touso donou Ramai vahsü souhawuso. Touso pfüphou hai sheekhaibaie, ana mai tali donou puhnou touyu sünavanou kukhe maiye panou phi sülouyu hai mah-e. 21Sou toumoyu, zhaoh shomoyu moa ne thaihou jüraimaiye panou phi süloure hatali soumoyu nanou veie. 22Südonou ko haina vanou nenou louche-a buyu nasü Ramai nehai kole hi khaiwuwo. Puhnou kao-züe tea soukhai touyu hisü lahnou chi kumoyu puhsü rako veie! 23Ana puhnou toua buyu süna vanou leki louzü, puhnou süna touyu kisü Ramai nou puhye mah dukhaire, daiolouzü puhnou lü vanou vah soulou moe. Alia lü vanou vemoyu hatali sü mahbaie.

Currently Selected:

ROMMAI 14: POUMBSI

Highlight

Copy