ROMMAI 16
16
Maili lihi Seiyu Khurüyu vei Chidoh
1Kenkhria hi buyu lüloumaime vei vahlümaipai soua buyu Eletao tupai Phoebe ye Enou neletao bah hi thoupeiwe. 2Mapaowo zhih hinou sheeyu maitao nou ngaozüyu sühinou puhye sü popeio, alia neletao hinou puhye donou molou shilaiyu hatali bulouzü puhye sü soukhapeio; daiolouzü puh hai maitaoli donou ea Eye donoua samai aveili soua bue.
3Khrista Jisu vei kuvah hinou Enou koa vah souzhoyu Priscilla ea Aquila hi Enou khurüyu chidoh seiwe. 4Ahrirai donou puhai vei ngu daodere kaozhoushi koute pfüdopeie. Puhai hisü E likheithe baimoa tahrüh kukhemai vei lüloumaime pfüphounou kalo paowe. 5Puhai ki hinou tave meime-a buyu lüloumai meye-a khurüyu chidoh sü seiwe.
Asia deizha hinou raikaia Khristaye louche louyu Enou leshiyu asa Epinetas ye khurüwe. 6Neletaoye donou teshoa vah souyu Meri ye khurüwe. 7Atarai soua buyu ea Eye koa hukhahi louzhoyu Andronikas ea Junias ye-a khurüwe; puhai sü sei-atamaitao hrohinou zhih tashowe, alia Enou Khristamai soutamo jühinou puhai sü souloure.
8Mapaowo hinou Enou leshiyu asa Amphiatas ye khurüwe. 9Khrista vei kuvah hinou koa vah souzhoyu Urbanas ea Enou leshiyu asa Stakhi ye-a khurüwe. 10Khrista hinou, veahoyu hronou chechea ngaolouyu Apelles ye khurüwe. Aristobulas kikhamai taoye khurüwe. 11Atarai Herodion ye khurüwe, alia Narkisa kikhahi buyu Khristamai thaihou jüraitaoye khurüwe.
12Mapao vei kuvah soua buyu Truphina ea Truphosa hi Avei khurüyu chidoh sü seiwe, alia Mapaowo donou vah alao soulouyu leshiyu asa Parsis ye khurüwe. 13Mapao vei kuvah hinou Mapaowo nou lah puhvei souvu züre donou dopa louyu Rufus, alia Eye puh nahpoutu büa phabusanou popeiyu puh pfü hi Enou khurüyu chidoh seivewe. 14Asunkritas, Phelegon, Herme, Patrobas, Harmas, alia puletaoye koa buyu kukhe thaihou jüraimai hrülaiye khurüwe. 15Philologas ea Julia, Nereus ea puh tupai, Olimpas ea puletaoye koa buyu sheeyumai hrülaiye khurüwe.
16Thaihou jüraiye leshia mümuyu zhai süna hinou alinou liye khurükhaio. Khrista vei lüloumaime teiteinou puletao vei khurüyu chidoh sü neletao hi seivewe.
Akhaisoua Doupeiyu Chi
17Athaihou jürai khemai, Enou neletao hinou khowe: neletao nou ngaolouyu doupeizhai sünaye motouyu, maikhe maiye southou me kuku peiyu ea maikhemai lü soudadou peiyu puletaoye sü leikei-a zhulo. Puletao hinou doua bulo! 18Daiolouzü haibüa souyu puletao sü Eletao Mapao Khristaye kuvah soumoe, ana lah puletao vei pou donou soubaie. Puletao vei lakovei ea müpouyu sünanou puletao nou khosümoyu maikhe maiye labaiwe. 19Neletao nou Ko Aveina hinou cheche-a buyu sü mai hrülainou choukhaire, alia qo haina vanou Esü neletao vanou lesawe. Enou neletaoye panou aveina vanou tsü veia buyu züpawe, ana ashina vanou khosümoa buyu sü panou sounüwe. 20Süthaisü kaonayu vei Ramai nou Saitan ye thala-a neletao phi khenou taisasa-a khailai.
Eletao Mapao Jisu zhuvea nou neletaoye koa buyu sü souloutheo.
21Eye koa vah souzhoyu Timothi ea Atarai soua buyu Lukia, Jason ea Sosipatar nou puletao vei khurüyu chidoh sü neletao hi seivewe.
22Seiko haina rüyu Tartius Enou Mapaowo hilonou neletaoye khurüwe.
23Lüloumaimeye panou puh ki hinou vedzüa buyu Avei shepao Gaias nou neletao hi puhvei khurüyu chidoh seiwe; nuhdu vei thou-sha podzü-apeio Erastas ea Eletao thaihou jürai Quartas puhai vei khurüyu chidoh sü neletao hi seivewe. 24(Eletao Mapao Jisu Khrista vei zhuvea nou neletao hrülaiye koa buyu sü souloutheo.)
Paoshoyu vei Akhai Veachi
25Eletao Ramaiye paosho laikhe! Enou Jisu Khrista vanou paodouyu Ko Aveina ea dao deiphao soushu rainou khei-a khaikhai touyu kheitsüna pongao peiyu thaifüa, puhnou neletaoye panou neletao vei lü hinou khouchi-a lalou süe. 26Sütoukhaia chuo, rachi paolamaitao vei larübvütao vanou achechena süsü dua vakouhi popa ngaopeire; alia mai hrülaiye panou loucheloua züloure donou akhai hayu Ramai vei chikhanou süsü tahrüh hrülai hi paosü peire.
27Likheithe tsü veibaiyu Ramai puh hisü, Jisu Khrista vanou teisanou paosholoutheo! Amen.
Currently Selected:
ROMMAI 16: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
