ROMMAI 1

Khurüyu Chidoh

1Jisu Khrista kilai ea Ramai puhnou puh Ko Aveina paodou loure donou dolouyu ea kulouyu sei-atamai Paul hinoue.

2Sheeyu larübvü hinou rüthouwuyu kua Ramai nou puhvei rachi paolamaitao vanou dao raikinou Ko Avei nahai apaopeire. 3Ko Avei haina sü puh Nahpoutu Eletao Mapao Jisu Khrista vanoue: vasou hilonou zhulai toulouzü, puh hai David tyaonah alisoua nakoue; 4puh vei sheeyu ramai hrü hilonou zhulai toulouzü; puhye sü athai hinou panou hrishu louyu vanou puh hai Ramai Nahpoutue touyu sü dushoyu khouko noupu pongao peire. 5Puh vanou Ramai nou Ahi Khristaye donou sei-atamai ali souloua tahrüh hrülaiye panou louche loua paoyu züyu hi süthai loupeire donou teile zhou avei peikhaitoue. 6Haisü Jisu Khrista hi buloure Ramai nou kulouyu Rom hi buyu neletao-a louwe.

7Südonou Enou Ramai nou leshiyu ea lah puhmai souloure donou kulouyu Rom hi buyu neletao hrülai hi rüwe:

Eletao Puo Ramai ea Mapao Jisu Khrista nou neletao hi zhuvea ea kaonayu sü peitheo.

Kalo Paoyu

8Raikaia, neletao hrülai donou Jisu Khrista vanou Enou A Ramaiye kalo paowe, daiolouzü deiphao teiteinou neletao vei lü vanou choua bure. 9Enou puh Nahpoutu vei Ko Avei paodoua, Ale pfüphounou kuvah souyu Ramai puhnou kakua Enou neletaoye donou lichoa tobai soukhaimoa veachi pao-a busa touyu sü zhopaoh souwe: 10alia chuo akhai hinou Ramai leli vanou Eye panou neletao hi velou loure donou ludu houpei loure veachi paowe. 11Daiolouzü neletaoye koa rako hilovei ha zha ngaozholoua neletaoye soukhou peiloure donou Enou neletaoye tave zhunüshoa bue. 12Enou pao-a buyu kowo louzü alinou liye süolouzü neletao vei lünou Eye ea Avei lünou neletaoye soukha loure donoue.

13Athaihou jürai khemai, neletao nou süpeikhaio, süolouzü vuh taoli Enou neletao hi vere donou soudawe, ana süsü vetelou more donou halinou Eye khua buloure. Enou tahrüh kukhe hrohia souyu kua neletao hrohia hayu rakoye Enou nilou nüwe. 14Daiolouzü Esü maikhemai hrülai hi süolouzü dushu louyu ea dushulou moyu, ha süyu ea sümoyu maitao hrülai hi soumo shilaiyu vah bue. 15Südonou Rom hinou hrüa buyu neletao hi-a Ko Avei paodou peire sü Enou züpashoa bue.

Chipao Avei Khouko

16Daiolouzü chipao Avei vanou Esü ahrao moe; haisü lü loucheyu mai hrülai süolouzü raikai-a Jihudimai ea süthai tahrüh kukhe maiye-a khailu peire Ramai vei khouko nasüe. 17Daiolouzü chipao aveinou kakua Ramai nou maikhe maiye puhye koa souzü peie touyu sü pongaowe; souzü peiyu hai shurainou akhai koute sü lü vanoue. Haisü sheeyu larübvü nou paoyu kue, “Lü vanou Ramaiye koa souzü louyu puh sü hrilai.”

Emai Mah

18Daiolouzü Ramai vei rarou hai ramaiye sümoyu ea acheche naye süloure hinou nukhaiyu mai ashi maitao vei vah ashitao pei hi sü rakinou pongaowe. 19Ramai nou puletaoye tudeewe, daiolouzü puletaoye donou Ramaiye süloure sü lapa baiwe, daiolouzü Ramai puh lahnou süsü puletao hi pongao peire. 20Ramai nou deiphao soushu rainou shua nghithounou ngaolou hoyu puhvei zhaido nasü süolouzü akhai hayu puh khouko ea puhvei razhu nasü soukhai touyu natao vanou sheesha-a sülouwe. Südonou puletaoye sü hatakia khaipei loure alia hae. 21Puletao nou Ramaiye sükhai-a puhye sü Ramai hie tea puletao nou tsükhou peimoe moa puh hi kalo paomoe. Süjüwo, puletao tsü sü voteih tare, alia puletao vei sakhaiyu le sü azhinou phouloure. 22Puletao sü tsü veie tea paoe, ana puletao sü avomai khaire, 23alia athai hayu Ramaiye thoyu tsü, puletao nou thailou veiyu emai moa raohou moa khaosou moa pounou sürou tayu khaonatao zhu raiyu bashara sütaoye thotare.

24Südonou Ramai nou puletaoye sü lah puletao lenou züpayu shimoyu vahtao panou souloure thoupeire, alia puletao lahnou lah hi ahraoyu vahsü soua bue. 25Puletao nou Ramai vei acheche naye sü amadaye polyawe, alia teisanou shozüyu sou-apeio puhye shoyu tsü puletao nou Ramai nou soukhai touyu sünaye thowe ea sünavei kuvah souwe! Amen.

26Qo haina vanou, Ramai nou puletaoye sü ahraoyu pfüphao vei züpa hi thoupeire. Puletao vei naotumaitao koutenoua zhai thaifüa koa buyu sünasü zhai moyu vah sünanou lyaloure. 27Sübüa poutu maitao nou-a zhai thaifüa naotumaiye koa buyu zhai nasü thaowu-a lah puletao alinou liye züpasho loure. Poutumai taonou alinou lihi ahraoyu vah souwe, alia sükuyu donou puletao vei mah vanou puletao nou ngaozüyu tudee nasü puletao nou lah puletao pei hi sü povewe.

28Alia puletao nou Ramai vanou chekhaoyu tsü nasü puletao vei tsü hi khaibayu donou, puhnou puletaoye sü ashi tsü hi ea kao-zümoyu zhaido hi thoupeire. 29Puletao hisü ashitya tyalinou phoupei loure, süolouzü: ashi, loküyu ea linou lihi ashi souyu bue; puletao sü maiye ngaoraiyu, maiye southeayu, tai-da vayu, maiye layu ea kukhemai pei hi ashi shilai chokhai peiyu sü bue. Puletao nou mai chi kuwe, 30alia alinou li chi paoshiwe; puletao sü Ramai ngaoba maitaoe, puletao sü alinou liye sou ahrao peiwe, khaophu souwe ea adusho khawe; puletao nou ashi soupure tsü chowe ea pfüpuo chi zübawe; 31puletao hisü lekhe tsü hae; puletao sü puletao nou apao khaitouyu sü zümoa, alia maiye zhuveayu moa khuleshi peiyu hae. 32Razhai hinou haikua hrüyumai sü thaizüe tea paokhai touyu sü puletao nou süwe. Sütoukhaia, puletao nou haitao likhei souyu baimoa sütao soua buyu maitaoye sü ae-ao toupeiwe.

Currently Selected:

ROMMAI 1: POUMBSI

Highlight

Copy