SEI-ATAMAI VAHTAO 28

Malta Zaipeidei hinou Tave Soyu

1Zaipehi tupa louyu kisü, Eletao nou zaipeidei süsü Malta tea kuwe touyu sü süloure. 2Alia teidei sühi maitao nou alaosou Eletao hi khuleshi peie, daiolouzü sükisü teirü shoyu ea seishoyu donou puletao nou mei soutu khaitoua Eletao hrülaiye sasa-a sheloue. 3Sükisü Paul nou süükhuli kopoveloua süsü meihi pothouyu kisü meinou rouyu donou nghouvo alisü meihinou chopaloua puh bah hipa zhatei loure 4Nghou sünanou Paul bah hinou taozhu-a buyu sü teidei sühi maitao nou ngaolouyu kisü puletao alinou lihi haibüa paoe, “Mai haina hai veikhaimoa maiye southeayu mai ali-a malae. Alia puhnou zai hinou tupalou khaia, Ramai vei acheche chikuyu sünanou panou puhye hrikhai laimoe.” 5Ana Paul hi halia sou shiyu soukhaimoa puhnou nghou sünaye meihi zhilai thoure. 6Sükisü puh vasou hai mapa shulai moa puh hai thala-a kaokou thaibai shulai tea puletao nou zhia bue. Ana puletao nou phashona zhia bua puh hisü ha kaoshiyu lia ngaomoyu kisü puletao tsü hai daloua, “Puh hai ramai alie!” tea paoe.

7Alia buh süna ngheiki zaipeidei süna paopu soua buyu Publia tea kuyu mai sünavei füdei taoli bue. Puhnou sasa-a Eletaoye sheloua teithe asü hai puh kihinou Eletaoye soutaosoua vaitoupeie. 8Sükisü Publia puo hai rakee-a ea zheteia züh hinou züa bue. Paul nou puh hi taveloua veachi paopeie ea puh bahsü puh pei hi lakhai peiwu-a puhye sü souvei peie. 9Sübüyu vanou zaipeidei sühi buyu kukhe sounou maitao hrülai-a tave ea puletaoye souvei peie. 10Puletao nou Eletao hi sapeina taoli peie, alia Eletao nou dzüluki hi nou tare kisü Ehye donou dzüpei veihduhi moshi laiyu tousona taoli dzüluki hi pove thoupeie.

Malta hinou Rom hi Tayu

11Khou asü thaisü Eletao nou Alejandria hinou veyu, “Nahbei ramai hai,” tea kuyu saiki hi zaipeidei nou chao-a buyu dzüluki süna hinou saopoa tae. 12Alia Eletao nou Surakus nuhdu hi tave louloua sühinou teithe asü nai-a bue. 13Süthaisü sühinou Eletao nou taloua Regia nuhdu hi veloue. Thainaisho sü khekou lonou teikhai sü hükheloua Eletao nou teithe ahai levai hinou Puteoli nuhdu hi velou loure. 14Sühinou Eletao nou thaihou jüraimai kamai taoye tave daoloue, alia Eletaoye nou teithecho ali puletaoye koa naire donou kuloue. Süthaisü Eletao nou Rom hi velouloue. 15Alia Rom hi buyu thaihou jürai khemainou Eletao ko choulouyu kisü Ehye daore donou Appai nuhdu hupobuh hi koute doushoa ea kukhemai taonou Shechaoki Asütao tea kuyu nuhdu hi koute takoue. Paul nou puletaoye ngaolouyu kisü Ramai hi kalo paoe ea puhsü khuh veisho loure.

Paul nou Rom hi Velouyu

16Alia Eletao nou Rom hi veloulouyu kisü, reihmai aliye panou Paul ye khoa lah puh dosoua bure aetou peire. 17Teithe asü thaisü Paul nou buh sühi Jihudimai peichamai taoye kuve dzüloue. Alia puletao nou tave dzülouyu kisü puhnou puletao hi paoe, “Athaihou jürai maitao, Enou Ehmaitao pei hi moa Eh puopao maitao vei zhaiye hashilia soukhai moyuma Jerusalem hinou Eye hukha hi nüthouloua Rom maitao bah hi thoupeire. 18Rom maitao nou Ahinou chi nouloua thaizüyu mahlia puletaonou ngaoloumoyu kisü Eye phapei nüloure. 19Ana Jihudimai taonou balouyu kisü, Enou lah Amaitao pei hi mah dukhaire hakhai-a Kaisar hi Achi kupeire donou khopu molou hore. 20Südanou Enou neletaoye daoloure ea chi phakure kuvewe. Daiolouzü Eye hurainou haibüa phukhai touyu hai Israel maitao nou zhia buyu süna vanoue.”

21Alia puletao nou puh hi paoe, “Ehnou Judea hinou ne vanou seiko lia ngaokhaimoe, moa sühinou taveyu thaihou jürai maitalinoua ve chi lia paongao moe moa ne vanou halia paoshi moe. 22Ana nenou lichoyu hai daisa touyu sü Ehnou ne hinou chounüwe; daiolouzü buh liki hi nou maikhe mainou nenou tatouli soua koa laiyu me hainaye paoshiwe touyu sü Ehnou süwe.”

23Südonou puletao nou Paul ye koa khoukha ali dadeloure, alia teithe sükisü maikhemai alaosou puhnou buyu buh hi tave. Alia puhnou puletao hi shona hinou koukhe koute sü Ramai Vedei vanou soutaosoua paodou peie, alia puhnou Jisu vanou Moses vei razhai ea rachi paolamaitao vei larütao hinou popa paodoua puletaoye douposhu louche peire donou te-e. 24Puh chipao hinou kamaisü louche loure, ana kamainou louche peimoe. 25Südonou puletao hrohinou alinou liye veiva-a puletao sü potare, ana Paul nou chipao haina paomo jühiwo louzü puletao hai pota mohie, süolouzü “Daizhozhou veishoa Rako Mashinou Isaiah rachi paolawona mü hinou neletao puopao maitaohi paopeisa! 26Daiolouzü puhnou haibüa paoe,

‘Mai haitao hi taho paokhaio:

Neletao nou keikhai keikhailai, ana sülaimoe;

Neletao nou zhukhai zhukhailai, ana ngaolaimoe.

27Daiolouzü mai haitao tsü sü shitare,

alia puletao nou sü kangiwure ea puletao nghithou sü mailoure.

Sükumore toulouzü puletao nghithounou ngaoloushulai,

puletao nounou choulou shulai,

ea puletao tsünou sülou shulai alia puletao sü Ahi khaive puloua

Enou puletaoye souvei peiwu shulai.’ ”

28Alia Paul nou akhaisoua paoe, “Südonou neletao sülouwo, süolouzü Ramai vei khailu peiyu chipao haina hai tahrüh kukhe hi seita peiwure alia puletao nou kei loulai!” 29Puhnou chi haitao paocheyu thaisü Jihudi maitao nou lah puletao hrohinou veivaloua ratare.

30Po ahai donou Paul nou ki li ngaloua bue alia puhye daore donou veyu mai hrülaiye sü puhnou sasa-a süpeie. 31Khuveishoa alia halinoua khangiyu ha-a Ramai vei Vedei vanou puhnou ko paopeie alia Mapao Jisu Khrista vanou doupeie.

Currently Selected:

SEI-ATAMAI VAHTAO 28: POUMBSI

Highlight

Copy