ROMMAI 2

Ramai nou Chikuyu

1Südonou O Asa, newo kukhe maiye chi kuwu? Ne sü maitalikhaia, neye donou halia khaipeire hae. Daiolouzü nenou maiye chikulukhu puletao nou souyu sübütoua nenou soubaiwe, sübüa nenou lah neye mah paodu khaiwe. 2Haibüyu vah souyu maiye Ramai nou chikuyu hai kuzüe touyu sü Ehnou süwe. 3O Asa, haibüyu vah souyu maiye nenou chiku lukhu newo Ramai nou chi kuyu hinou tupalousüe tea chowu? 4Moa newo dushoyu puhvei zhuvea, khopeilou süyu, alia shamea peiyu haitaoye ngaorawu? Veimosoua Ramai hai zhuvea peilousüe touyu sü nenou süwe, daiolouzü puhnou neye panou le daloure tewe. 5Ana nevei le khouyu ea le dabayu lethou buyu donou ne sü lah nepei hi Ramai nou puhvei acheche chi kulaiyu pongao laiyu puhvei rarou Teithe ki donou Ramai vei rarou nasü podzü khaibaiwe. 6Daiolouzü Ramai nou mai alili hisü lah paomainou soukhai touyu vah süna thaifüa buu peilai. 7Mai kamai sü thaokhaimoa avei vah soua, khouko ava, tsükhouyu ea halouho ahri phoua bue; puletao hisü Ramai nou teisa ahri peilai. 8Kukhemaitao sü dutounüwe ea acheche nasü zübawe, ana ashi nasü züwe, südonou puletao pei hi sü Ramai nou puhvei rarou ea lekha nasü lakou thoupeilai. 9Ashi souyu mai hrülai donou veahoyu ea souyu sü raia Jihudimai donou ea tahrüh kukhemai donou-a bulai. 10Ana avei souyu mai hrülai hisü süolouzü raia Jihudimai hi ea tahrüh kukhemai hi-a Ramai nou khouko ava, tsükhouyu ea kaonayu sü peilai. 11Daiolouzü Ramai nou maikhemai hrülaiye zhai alikhei hinou chikuwe.

12Razhai pomoa mah souyu mai hrülai sü razhai pomoa habailai, alia razhai khehinou mah souyu mai hrülai sü razhainou chikulai. 13Daiolouzü Ramai nghojünou checheyu maitao hai razhai keilouyu maitao moe, ana cheche maiwe tea paopeire maitao hai razhainou paoyu süna souyu maitaoe. 14Razhai hayu tahrüh kukhemai taonou razhainou moshilaiyu taosü zhai thaifüa soulouzü, puletao vei razhai hakhaia, sütao sü lah puletao vei razhai baie. 15Puletao vei zhaihrünou razhainou chikha peikhai touyu sü puletao lethou hi rüthou khaitoue touyu sü pongaowe. Puletao vei lekhe tsünou-a haisü chekhaoe touyu sü lapeiwe, daiolouzü chachaki sü puletao vei tsünou puletaoye mah dukhaiwe ea chachaki sü puletaoye vupeiwe. 16Alia, südonou Enou paodouyu Ko Aveina thaifüa, Ramai nou Jisu Khrista vanou emai hrülai vei kheitsüye chi kuyu Teithe kisü hai kheihaoa palai.

Jihudimai ea Razhaina

17Newo kakuwe? Nenou lah neyenou Jihudimai ali toue; newo razhaiye lüa bue ea Ramai vanou khaophu soua bue; 18Ramai nou neye panou dai sounüsa touyu sü nenou süwe, alia razhai hinou nenou kakua avei veilai naye dolou laisa touyu sü douloure; 19nehai nghicha maiye süthai-apeimai alie touyu sü nenou soutaosoua süwe, alia teizhi hi bumaitao donou ava nasüe, 20avomaiye dou-apeimai ea halia sümo maiye dou-apeio alie touyu sü süwe. Razhai hinou tsü ea acheche vei hateitei bue touyu sü nenou sütoua bue. 21Kukhemaiye nenou doupeiwe. Daidonou ne lah doulou moe? Nenou, “Maivei vaoso,” tea paodoue. Ana lah newo vaovaomoe? 22Nenou, “Khulou vah souso,” tea paoe. Ana newo khulou vah sousoumoe? Nenou basharaye ngaorawe. Ana newo rathokitao vao vaomoe? 23Newo Razhai bue tea khao souwe. Ana newo puhvei razhai soukhowu-a Ramai pei hi ahrao pove peipeimoe? 24Sheeyu larübvü nou haibüa paoe, “Jihudimai neletao vanou, tahrüh kukhe mainou Ramaiye paoshiwe.”

25Nenou Razhai sü züa bulouzü, nevei hee rodeyu sü muh bue; ana nenou Razhai nasü zümo louzü, nevei hee rodeyu nasü hee rode khaimoyu bübailai. 26Hee rode moyu tahrüh kukhemai taonou razhai vei chikha taosü züa bulouzü, Ramai nou puhye sü hee rodeyu kua popeilai mowu? 27Alia sükuyu donou nele Jihudimaiye tahrüh kukhe mainou mah dukhai peilai daiolouzü neletao vei razhai nasü rüthou khaikhaitoua bua ea hee rodeyu nasü bukhaia, nenou razhai nasü soukhore; ana puletaowo vasou hinou hee rodemokhaia, puletao nou razhai nasü züloure. 28Südonou, thaohnou cheche Jihudimai nae, hee rodeyu puhnouwu? Vasou hilonou hee rodeyu vakou hinou Jihudimai soua buyu mai sünanou moe. 29Ana süjünou, chekhaoyu Jihudimai süwo lekhe hinou süolouzü puh le hinou hee rodeyu mai süna süe, alia haisü Ramai Rako vei vah-e, rüthoukhai touyu razhai vei vah moe. Haibüyu mai alinou puhye paosho peiyu sü mai hinou moanou Ramai hinou ngaoloue.

Currently Selected:

ROMMAI 2: POUMBSI

Highlight

Copy