PONGAOPEIYU 18
18
Babilon Kaotayu
1Haithaisü Enou kukhe rakivamai alinou rakivanou takouyu ngaoe. Puhvei dushoyu soulousü khouko bue, alia puhvei khouko avanou deiphao teiteisü varu loure. 2Puhnou puhvei chihshoyu painou haibüa shapae: “Kaotare, kaotare Babilon adunasü! Chuwo puhsü rashitao ea sheemoyu rakotaonou haoyubuh datare; alia sheemoyu ea ngaorayu raohou tyalinou buyubuh soubaire. 3Daiolouzü tahrüh khemai hrülainou puhvei khulou souyu vei chihshoyu zhaoh nasü shozhi loure. Deiphaohi vemaitao nou puhye koa khulou vah souloure, alia deiphao hi huh-ha souyu maitao nou puhvei loküyu kini sütao vanou hanisho loure.”
4Süthaisü kukhe pai alinou rakivanou haibüa paoyu Enou choue,
“Amaikhemai, puh hinou tapalo!
Molouzü neletao-a puhvei mah hisü koa zha ngaozho shulai;
molouzü neletao-a puhvei veahoyu hisü koa zha ngaozho shulai!
5Daiolouzü puhvei mahtaosü rakicha kukhere,
alia Ramai nou puhvei vah ashitaosü licho loure.
6Puhnou peiyu kua puh hisü peikhaio;
alia puhnou souyu vahtao thaifüa puh hisü zha ahai koua paorü peikhaio.
Puhnou neletaoye donou lathou chohpeiyu pai süna hinou puhye donou zha ahai chihkoua lathou chopeikhaio.
7Puhnou daizhozhou lah puhye sü paosho peiresa ea souvasho peiresa,
süzhou veahoyu ea dopfüyu sü puh hia peikhaio.
Daiolouzü puhlah puhle hinou haibüa paoe:
‘Veopai Esü buh haihinou chobue,
Ewo meamaipfü moe, Ewo dopfüyu ngaokhai laimoe!’
8Südonou puhvei veahoyu, süolouzü sounou,
dopfüyu ea tokaayu sü teithe alikhei hinou puh hi velai;
Alia puhye sü meinou deiwulai;
daiolouzü puhye chikuyu Ramai Mapaowosü khou-chihwe.”
9Alia puhye koa khulou vah souyu ea vashoa hrüyu deiphao hi vemaitao nou puhye meideiyu meikhao süna ngaolouyu kisü puhye donou puletaosü kralai ea dopfülai. 10Puhvei veahoyu hi lou zha ngaozhoyu sü ngaopi-a puletaosü adou konou la-a haibüa paolai, Daizhozhou ngaopisa! Daizhozhou ngaohisa! Oh dushoyu nuhdu, Oh khoukhoulai nuhdu, Babilon! Teilecho ali levai hinou nevei hakayu sü veloure!
11Deiphao hi huh-ha souyu maitao-a puhye donou krae ea dopfüe, daiolouzü maitalinoua puletao huhsü hüpupeikhai more; 12huh sütaowo louzü sana, shahu, muhteiyu chuh, mukta chuh, puletao vei jüyusah, maomüyu sah, soumai sah, alia horoyu sah; kai veiyu süütya veishi, pao huhnou souyu na teitei, muhteiyu süü, baosa hu, hu, chara chuh; 13alia sheesükao, vusa vunou, kaivei süüthea, theadzü kaivei, mei taoloure kaivei süüthea; darkha zhaoh, theadzü, sou avei ea sou thouh, cho ea zhaotu, rhei ea rhei lukitao, qilatao, alia emai, hrirai koute, haitaoe. 14Huh souyu maitao nou puh hi paoe, “Nenou züpayu na teiteisü ne hinou takhaire, alia nevei kini ea nevei avei veilai taosü hazhei tare, alia nenou sütaosü hakia ngaopu khailou hore;” 15Nuhdu süna hinou na sütao zholoua hani louyu huh-ha souyu maitaosü adou kounou la-a bulai, daiolouzü puletaosü puhvei veahoyuhi lou zha ngaozhoyu sü ngaopiwe. Puletao sü kralai ea dopfüa 16haibüa paolai, “Daizhozhou ngaopisa! Veishoyu jüyu sah, maomüyu sah ea horoyu sahnou banouyu, alia sana, muhtei chuh ea mukta chuhnou tupfüa laiyu dushoyu nuhdu süna donou daizhozhou ngaopisa! 17Alia teilecho alikhei hinou sübüyu puhvei dushoyu kini teiteisü souhare.”
Alia dzüluki paopu maitao, dzüluki hinou veih-hao souyu maitao, dzüluki veimaitao ea kukhe zai hinou huhsoutoua hrüyu maitao hrülainou adoukou nou laloure, 18alia puhye meideiyu vei meikhao sünasü puletao nou ngaolouyu kisü haibüa shusoua raoloure. “Dushoyu nuhdu haina büyu kukhe nuhdu lia bukhai mohie!” 19Alia puletao nou puletao peiva nai polaipa khailoua kra-a ea dopfüa paoe: “Daizhozhou ngaopisa! Dushoyu nuhdu haina donou daizhozhou ngaohisa! Puhsü puhvei kini vanou zai hinou dzüluki pfüa laiyu maikhemai hrülaiye panou hani louyu nuhdu sünasüe! Alia teilecho alikhei hinou puhvei na teiteisü souhare!”
20Oh raki! Oh sheeyu maitao, sei-atamaitao ea rachi paolamaitao, neletao puh vanou lesalo, daiolouzü puhnou neletao pei hi soupeiyu süna thaifüa Ramai nou puhpei hisü khühphou peire!
21Sükisü khoushoyu rakivamai alinou dushoyu thouh veiyu chuhpa deiyu chuhli poloua süsü zaihi polaithouloua paoe, “Haibüyu zhai hinou dushoyu Babilon nuhduye sü chihsho-a polaithouwu-a panou ngaopukhai laimoe. 22Alia lanabvü aduna kho, emai pai, shaa houngyumai pai ea bekhosü hakia nehinou choupukhai laimoe! Alia bahsha vah hinou raiyumai taliye hakia nehinou ngaopukhai laimoe; alia thouh veiyu chuhpa vei kholia nehinou choupukhai laimoe! 23Meibvü vei avasü ne hinou hakia ngaopukhai laimoe. Sheerepu ea nghirepai lapaisü hakia ne hinou choupukhai laimoe. Nevei huhsouyu maitaosü deiphao buh veishi hinou dukayu maitaoe, alia nevei madayu khei-khupado nou deiphao hi maikhemai hrülaiye sümah-sümo peire!”
24Alia rachi paolamai, sheeyu maitao ea deiphao hinou southeawuyu maikhemai hrülai vei zhesü puh hinou ngaolouyu vanou Babilon ye sü tudee peire.
Currently Selected:
PONGAOPEIYU 18: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
