PONGAOPEIYU 17
17
Zhihta Shoyu Khakhapai
1Süthaisü pai anai poa buyu rakivamai anaitao hrohinou alinou Ahi taveloua paoe, “Tavelo, rei alao ngheiki hinou soupakhai touyu nuhdu aduna, süolouzü zhih tashoyu khakha paiye chikuyu sü Enou ne hi pongaolai. 2Deiphao hi vemaitao nou puhye koa khulou vah souwe, deiphao hi maikhe maitao nou puhvei khulou vah souyu zhaoh süsü sholoua zhitei tare.”
3Sühinou rakivamai sünanou Eye rako hilonou sataloua rekouhi saho khaipeie. Sühinou Enou naotumai aliye Ramaiye paoshiyu zhihtaonou rüthou phoukhai touyu horoyu khaosou ali phaova hinou chobua ngaoe, alia khaosou süsü pei anai ea kai kiruo pfüe. 4Naotu süpaisü maomüyu ea horoyu sabanüh nou bah nouwe, alia puhsü sana touhtao, chuh muhtei ea mukta chuhvei nataonou tupfüa bue. Puhbah hisü puhvei khulou souyu vei ngaorayu ea sheemoyu nataonou phoua buyu sana paili poa bue. 5Puh puhisü haibüyu, “Dushoyu Babilon, deiphao hi khakha maitao ea ngaorayu hrülai vei pfü, touyu khei zhih ali rüthou pfülaie.” 6Alia sheeyu maitao vei zhe ea Jisu hinou cheche-a buyu vanou southeayu maitao vei zhenou shozhia buyu naotupai sünaye sü Enou ngaoe.
Enou puhye ngaolouyu kisü, Esü khupasho loure. 7Ana rakivamai sünanou Ahi noue, “Ne daidonou khupawe? Naotu süpaivei, alia pei anai ea kai kiruo pfüa puhye pfütayu khaosou sünavei khei kosü Enou nehi paongao peilai. 8Nenou ngaoyu khaosou sünasü teile alihi hria bue, ana chuwo hrikhai more, alia sünasü akhai hayu raobvü hinou tapare hinou bure ea puhvei hakayuhi tawe. Teideiphao soushurai hinou ahri larübvühi zhih rüthoulou moyu deiphao hinou hria buyu maitao nou khaosou sünaye ngaolouyu kisü khupalai, daiolouzü puhsü teile lihi hrie, chuwo hrikhai more, ana puhsü vepukhailai.
9“Hai nanou ratsü pfüloure ea sütouloure kuwe. Pei anaitaosü naotupai sünanou chobua buyu deichitaoe. Alia sütaosü vemai anaitaoe. 10Puletao angousü kaotare, aliwo buhie, alia kukhe aliwo velai hie; ana puhnou velouzü, puhsü phajü donou likhei vesoua buvuzü bailai. 11Alia teile alihi hria buyu khaosou sünasü chuwo hrikhai more ea sünasü veo acha chenasüe. Puhsü anaitao hrohinoue ea puhsü hakayu hilo tawe.
12“Alia nenou ngaoyu kai kiruo taosü chu vedei ngaoloumoa buyu veo kiruotaoe, ana puletaosü khaosou sünaye koa teilecho alikhei vemaitao soua hrüre khouko ngaobailai. 13Puletao lesü ali khei soubaie, alia puletao vei khouko ea soulousü zü nasü khaosou sünahi peire. 14Puletao nou Zhaotu süna pei hisü reih soulai; ana Zhaotu sünanou puhvei kulouyu, dolouyu, alia cheche-a puhthai fülaimaitaoye koa puletaoye sü koloulai, daiolouzü puhsü paopumaitao pei hi Mapaoe ea vemaitao pei hi Veo nasüe.”
15Süthaisü rakivamai sünanou Ahi paoe, “Naotu khakhapai sünanou chobua nenou ngaoyu dzü alao sütaosü tahrühtao, maikhe maitao, maitya khemaitao ea lataoe. 16Nenou ngaoyu kai kiruotao ea khaosou sünanou khakhapfüpai sünaye ngaoralai. Puletao nou honapaihi buyu ha teiteisü potaloulai ea puhye sü baitoua thaowulai. Puletao nou puhvei vasousü touloulai ea puhye sü meinou deiwulai. 17Daiolouzü Ramai vei chipaotao vetemo koutesü puletaoye panou tsüle ali souloua ea puletao vei tukha-sahrü loure khouko sü khaosou sünahi thoupeiwu-a Ramai puhvei lichoyu sü souloure tsü nasü Ramai nou puletao lehi thoupeire.
18“Alia nenou ngaoyu naotupai sünasü deiphao hi vemaitao pei hi tukha sahrüyu dushoyu nuhdu sünasüe.”
Currently Selected:
PONGAOPEIYU 17: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
